Mamembala Ayedi Amaha aMwizanvu Dalombolaña
HAOCTOBER 5, 2024, kwadiña kubidika kwadimena hakubulakana kwahachaaka: Amanakwetu aJody Jedele nawaJacob Rumph ayitondeli kwikala mamembala aMwizanvu Dalombolaña dawaYinsahu jaYehova. Awa amanakwetu ayedi anamukalakeli Yehova nakashinshi hadi yaaka yayivulu.
AJody Jedele nawañodawu, aDamaris
Manakwetu Jedele wavwalikilili muMissouri, U.S.A. nawa amukulishilili muchalala. Chisaka chawu chashakamineña kwakwihi neluña mwabulili kushimwinawu nankashi kudi aYinsahu jaYehova. Muloña wachumichi, wadilukili nawamanakwetu niahela amavulu adiña nankulilu jashiyashana enjileña nakukwashana kushimwina nsañu yayiwahi. Kukeña nikunuñañana kwamwekesheleñawu kwamukwashili nankashi. Wapapatisheweli henohu wuchidi kansi, haOctober 15, 1983. Wadiluñishileña kuzata mudimu wakushimwina, nawa chamanishiliyi shikola yasekondali, watachikili wupayiniya wampinji yejima muSeptember 1989.
Manakwetu Jedele hachidiñayi kansi, anvwali jindi ayisendeleña yena nimuhelindi kuya nakuhempula haBeteli. Iyi ntanjikilu yayisañumwini anyanawu kwimika chikonkwanyi chakuzatila haBeteli, nawa nkumininaku, wejima wawu ayedi ashikijili chikonkwanyi chawu. Manakwetu Jedele washikili haBeteli yakuWallkill muSeptember 1990. Watachikili kuzatila kuDipatimenti yaWunyonji nawa mukuhita kwampinji, watachikili kuzatila kuDipatimenti Yatalaña haWumi.
Haniyi mpinji, yipompelu yadiña mukamwihi mwahosheleñawu idimi daSpanish yavulilileñaku nawa kwakeñekeleña amanakwetu akulombola. Dichi Manakwetu Jedele watachikili kupompa nachipompelu chimu haniyi yipompelu, nawa watachikili kudiza idimi daSpanish. Hashimbwili wanyi, watachikili kudiluka naDamaris, muhela wadiña nakuzatila wupayiniya muñinza yoyimu. Nkumininaku, adisumbwili, nawa atachikili kuzatila hamu haBeteli.
Mu 2005 afumini haBeteli nawa ayili nakwakamena anvwali jawu ashinshika. Haniyi mpinji, azatileña wupayiniya wampinji yejima. Manakwetu Jedele watañishiliku muMashikola aMudimu wawuPayiniya, nawa wazatili muKometi Yatiyañanaña naYipatela nimuKometi Yakutuña Matala aWanta.
Mu 2013, Manakwetu niMuhela Jedele ayitambikili kuya nakuzatila cheñi haBeteli kumudimu wakutuña kuWarwick. Kufuma haniyi mpinji, anazatili cheñi haPatterson nihaWallkill. Manakwetu Jedele nazati naDipatimenti yaMudimu Wakutuña niDipatimenti Yatalaña Nsañu yaNyidimu yaChipatela. MuMarch 2023, amutondeli kwikala nkwashi kuKometi yaMudimu. Kutalisha hanyidimu yejima yinazatiyi, wahosheli nindi: “Neyi wunatambwili mudimu wawuha, mpinji jikwawu wunateli kwakama nankashi. Ilaña dihu dinu hiwatela kwanuka kumushindamena Yehova muloña diyi wakojejaña kwikala mwejima munafuukuliyi.”
AJacob Rumph nawañodawu, aInga
Manakwetu Rumph wavwalikilili muCalifornia, U.S.A. Hachidiñayi kansi, amama yindi azeyeli kuspiritu ilaña azatili nañovu kumudizisha chalala chamuBayibolu. Nawa hachaaka-hachaaka, wayileña kudi ankaaka yindi awambanda, Chinsahu washinshika. Awa ankaaka yindi amukwashili kwikala nampwila yachalala, nawa chashikijiliyi yaaka 13, walombeli nindi atachiki kudiza Bayibolu. HaSeptember 27, 1992, henohu wuchidi kansi, wapapatisheweli. Okuwaha, amama yindi ayikwashili kwikala cheñi nawubwambu wakola naNzambi nawa ejima muchisaka chaManakwetu Rumph atachikili kupama, nawa nkumininaku apapatisheweli.
Hadiñayi mukwenzi, Manakwetu Rumph wamweni nindi apayiniya adiña namuzañalu nankashi. Dichi chamanishiliyi shikola yasekondali, watachikili kuzata wupayiniya muSeptember 1995. Mu 2000, wayili kuEcuador nakuzatila kwadiña kukaankila kweneni. Kweniku watachikili kudiluka naInga, muhela payiniya wafumini kuCanada, nawa nkumininaku adisumbwili. Chadisumbwiliwu, atachikili kuzatila hamu mutawuni yamuEcuador mwadiña izanvu dawakakushimwina antesha. Chayinu mpinji mudi chipompelu chikweti akakushimwina adikita.
Mukuhita kwampinji, Manakwetu niMuhela Rumph ayitondeli kwikala apayiniya adimena, nawa nkumininaku ayili mumudimu wakwenda. Mu 2011 ayitambikili kuShikola yaGiliyadi yanaamba 132. Hanyima yakuhita muniyi shikola, azatilili kumatuña ashiyashana mukaayi nawa adiluñishili nyidimu yayivulu, chidi neyi kuzatila haBeteli, mumudimu wawumishonali nimumudimu wakwenda. Manakwetu Rumph wadiña cheñi nakukooleka kwakuzataku mudimu wakutañisha muShikola Yawakakushimwina aWanta.
Muloña wachipupu chaCOVID-19, Manakwetu niMuhela Rumph afuntili kuUnited States. Ayitambikili kuya nakuzatila haBeteli yamuWallkill, nawa kweniku Manakwetu Rumph amudizishili nyidimu kuDipatimenti yaMudimu. Mukuhita kwampinji, ayilejeli kufunta kukasanji kamutayi kamuEcuador, nawa kweniku Manakwetu Rumph wekalili membala wamuKometi yaMutayi. Mu 2023 ayilejeli kuya nakuzatila kuWarwick. MuJanuary 2024, Manakwetu Rumph amutondeli kwikala nkwashi kuKometi yaMudimu. Kutalisha hamaluña ejima kunazatiliyi, wahosheli nindi, “Chuma chaleteshaña mudimu kwikala wadimena bayi neyi hiiluñaku, ilaña hiyantu iwunakuzatila.”
Twayisakililaña nankashi awa amanakwetu chadikitañawu hama, nawa “[twalemeshaña] chikupu antu adi neyi awa.”—Fwili. 2:29.