MPANJI 3

Iyala Watachi niMumbanda Watachi

CHAMBWINYI chidi haniwu mwevulu? Eña, hiyantu adihu. Diyi iyala watachi nimumbanda watachi. Hinyi wayileñeli? Nzambi diyi. Wamwiluka ijina dindi? Ijina dindi diyi Yehova. Awa eyala namumbanda ayiteneneña nawu Adama niEvu.

Ichi dichi chamuleñeliwu Adama kudi Yehova Nzambi. Wanoneli lunkuñu lwamaseki hakuwumba nachu mujimba wawanina, mujimba wamuntu. Dichi hakumonena muntu mumazulu, Adama wekalili mumi.

Yehova Nzambi wadiña namudimu wakumwinka Adama. Wamulejeli Adama kuyitumba majina anyitundu yejima yawanyama. Adama watela wayishinshikili anyama hampinji yayilehi, dichi watela wayitumbili majina ayitelela. Hampinji yadiña Adama nakutumbayi anyama majina, watachikili kumona chuma chimu. Wunachiluki ochu chuma?

Anyama ejima adiña niyala nimumbanda. Kwadiña nkuñulu yanzovu ninzovu wamukaji, kwadiña nawa mutupa weyala nimukaji wamutupa. Ilaña Adama hadiña namuntu watela kwikala ñodindiku. Dichi Yehova wamukamikili Adama tulu twatweni, hakumunonaku lubavu lumu. Yehova wazatishili lubavu lwenilu kumutuñila nachu Adama mumbanda kulonda ekali ñodindi.

Owu muzañalu wadiña naAdama! Toñojokaku nawa muzañalu wadiña naEvu hakumwinka mwitempa dadiwahi ñana kulonda ashakameñamu! Dichi ateleli kuvwala anyana nakushakama hamu amuzañalu.

Yehova wakeñeleña Adama naEvu kushakama haya nyaka. Wakeñeli nindi elishi iseki dejima kwikala dadiwahi neyi itempa daEdeni. Owu muzañalu watiyiliwu Adama naEvu hakutoñojoka kwila mwenimu! Komana hiwadi kutiya kuwaha kudibombamu mukubalumuna adinu iseki kwikala itempa dadiwahiku? Ilaña muzañalu waAdama naEvu hiwatwalekelihuku. Tutalenu ntahi chaletesheli.

Masamu 83:18; Kutachika 1:26-31; 2:7-25.