MPANJI 9
Nowa Hakutuña Watu
NOWA wadiña nañodindi nianyanindi awamayala asatu. Anyanindi awamayala majinawu adiñi diwu aShemi niHami niYafweta. Anyana ejima adiñi nawañodi jawu. Dikwila nawu muchisaka chaNowa mwadiñi antu atanu nasatu.
Haniyi mpinji Nzambi wamulejeli Nowa kukoña chuma chenyi. Wamulejeli kutuña watu weneni. Iwu watu wadiñi weneni neyi chochekala mbopolu, ilaña wadiñi nakumwekana neyi chikasha cheneni nawa chachilehi. Nzambi wahosheli nindi, ‘wakatuñi matala amakwawu mwishina, amakwawu hakachi, amakwawu hewulu, wakaketolumu tupeka’ nawa. Tupeka twenitu twadiñi twaNowa nichisaka chindi nianyama niyakudya yawu wejima wawu.
Nzambi wamulejeli Nowa cheñi kujikajika watu kuchinisha menji kwiñila. Nzambi wahosheli nindi: ‘Nakaleta dibaji deneni damenji nakajilumuni nachu ituña dejima. Ejima akabula kwikala muwatu akafwa.’
Nowa nichisaka chindi amwovwahilili Yehova nawa atachikili kutuña watu. Ilaña antu amakwawu akuminineña dakuseha. Atwalekelihu kwikala atama. Kwosi muntu niwumu wamukuhweleleli Nowa hampinji yayilejeliyi chuma chafuukwiliyi Nzambi kwila.
Chasendeli mpinji yeneni hakwila nawu atuñi watu muloña wadiñi weneni chikupu. Nkumininaku, mukuhita kwayaaka yayivulu, awumanishili kuwituña. Hohenohu Nzambi walejeli Nowa kwiñija anyama muwatu. Nzambi wahosheli nindi yakeñiji nyichidi yekwawu yawanyama ayedi ayedi, niweyala niwamumbanda. Ilaña nyichidi yekwawu yawanyama Nzambi walejeli Nowa nindi akeñijimu awa atanu nayedi awa atanu nayedi. Nzambi walejeli Nowa cheñi kulonda kwiñija nyichidi yejima yatujila. Nowa welili neyi chochamulejeliwu kudi Nzambi.
Hanyima yanichi, Nowa nichisaka chidi niwena eñilili muwatu. Aha dihu hashinkiliyi Nzambi kwipitu. Nowa nichisaka chindi, adiñi nakuhembelela mukachi kawatu. Chitoñojoki neyi chakwila nineyi wudi nawu mukachi kawatu nakuhembelela. Komana dibaji dakenza neyi chochahosheliyi Nzambi?