MPANJI 25
Chisaka Chinayi kuEjipitu
YOSEFU kutwesha kuduñumika nehi. Hakuleja añamba jindi ejima kwidika mukapeka. Chanashaliyi nkawindi nawa ana kwindi, Yosefu hakutachika kudila. Tunatweshi kutoñojoka ochu ana kwindi chahayaminiwu, muloña hiyaneluki muloña wunakudililayiku. Nkumininaku hakuhosha nindi: ‘Yami Yosefu. Tata yami wuchidi wamumi?’
Ana kwindi ahayamini chakwila akañanya nikuhosha. Anatiyi woma. Ilaña Yosefu hakuhosha nindi: ‘Mwani swilenu kwakwihi.’ Chanaswiliwu hakuhosha nindi: ‘Yami mana kwenu Yosefu yimwalandishili kuEjipitu.’
Yosefu hakutwalekehu kuhosha mumesu akuwunda nindi: ‘Bayi mutiya chikela nachina chimwalandishili munuku. Nzambi diyi wantemesheli kuEjipitu kulonda nihandishi wumi wawantu. Fwaro nañilishi dehi nyuli yetuña dejima. Dichi dinu nyakalenu funtenu kudi tata yami mukamuleji mwejima. Nawa kamulejenu enzi nakushakama kunu.’
Yosefu hakwinka makasa indi hadi ana kwindi, nawa hakuyikumbata nakuyipwepujola wejima wawu. Chanachitiyiyi Fwaro nindi ana kwa Yosefu anenzi, hakumuleja Yosefu nindi: ‘Yileji asendi matemba ayi nakusenda tata yawu niyisaka yawu afunti kunu. Ami nakayinka mpata yayiwahi yamwituña daEjipitu.’
Ichi dicheliliwu. Hanu wunatweshi kumona Yosefu nakubulakana tata yindi hampinji yenjiliyi muEjipitu hamu nichisaka chindi chejima.
Chisaka chaYakoba chatoheli nankashi. Wonsu wawu adiña 70 hayiliwu muEjipitu, kuyichinda aYakoba ninyanindi niejikulwindi. Ilaña kwadiña cheñi añodi jawu, hamu tuhu niañamba amavulu. Wejima wawu ashakamini muEjipitu. Ayiteneneña nawu aIsarela, muloña Nzambi wamuhimpili Yakoba ijina nindi Isarela. A Isarela ekalili antu alema kudi Nzambi neyi chitukumona kumbidi.