MPANJI 27
Mwanta Watama Hakuyula muEjipitu
AWA amayala anakukanjikija antu kuzata. Talaña iwu iyala wunakweta wumu hadi akwakukalakala nachikoti! Akwakukalakala hiyakwa chisaka chaYakoba, ayiteneneña nawu aIsarela. Awa amayala anakuyikanjikija kuzata diwu eniEjipitu. A Isarela anekali dehi anduñu jaweniEjipitu. Indi ichi chamwekeni ñahi?
Chisaka cheneni chaYakoba chashakamini yaaka yayivulu mukuwunda muEjipitu. Yosefu wadiña muntu walema nankashi chinlonda chamwanta Fwaro diyi wadiña nakuyihemba. Yosefu wafwili. Dichi Fwaro owu wekalili mwanta wamuha muEjipitu wayiheleli aIsarela.
Dichi iwu Fwaro watama welishili aIsarela kwikala anduñu. Nawa watondeli antu akuyitala aIsarela, antu wenawa adiña nawulumbu niwukatu. Akanjikijileña aIsarela kuzata nañovu nakumutuñilaña Fwaro nyisumba. Hela chikali chochu aIsarela atwalekelihu nakuvula. Mukuhita kwampinji eniEjipitu atiyili woma nawu aIsarela akusweja kuvula nakwikala nañovu nankashi.
Wuneluki cheliliyi Fwaro? Walejeli ankoñu adiña nakukwashaku ambanda awaIsarela hakupaapa nindi: ‘Chiña mujaheña anyana awamayala ejima akusemukaña.’ Ilaña awambanda adiña chiwahi, hiyakeñeli kujaha anyikekiku.
Dichi Fwaro walejeli antu ejima nindi: ‘Jahenu anyikeki awamayala ejima awaIsarela. Chiña anyikeki awambanda hohu diwu akupuluka.’ Ichi komana hichadiña chuma chatama kuleja antuku? Twayenu tutali wumu hadi anyikeki awamayala chamupulwishiliwu.