MPANJI 28
Chamupulwishiliwu Mosi Hadiñayi Mukeki
TALAÑA iwu mukeki wunakudila iku nakwati kumunu wachañadima. Diyi Mosi. Wunamwiluki iwu chañadima walubanji? Hika Ejipitu mwana kamwanta Fwaro, mwanindi wamumbanda.
Mama yaMosi waswekeli mwanindi kushika nimpinji yashikijiliyi tukweji tusatu muloña hakeñeli nindi amujahi kudi eniEjipituku. Ilaña welukili nindi Mosi hekwawu akumumona, ichi dicheliliyi hakwila nindi amupulwishi.
Wanoneli chimpaya nakuchijika kulonda menji abuli kwiñila mukachi. Wamwinkelimu Mosi, anona nichimpaya achisha nimumatahu amalehi kuchikumu chaKaloña Nile. Muhelindi Miriyami amulejeli kwimana kwakwihi kulonda atali chikumwekana.
Chakubula kuhita mpinji mwana kaFwaro wamumbanda wenjili nakuwela kuKaloña Nile. Dichi wamweni chimpaya mumatahu amalehi. Walejeli wumu hadi añamba jindi awambanda nindi: ‘Yaku wunoneli china chimpaya.’ Mwana kamwanta chenzuñwiniyi muchimpaya, wamweni yenowu mukeki okuwaha! Mosi wadiña nakudila, dichi mwana kamwanta wamutiyilili wushona. Hakeñeli nindi amujahiku.
Hohenohu, Miriyami wenjili. Wunatweshi kumumona hamwevulu. Miriyami wamwihwili mwana kaFwaro wamumbanda nindi: ‘Niyi nikutambikili mumbanda wakaIsarela kulonda akuleleliyi mukeki?’
Mwana kamwanta wahosheli nindi: ‘Yaña.’
Miriyami watemukili lufuchi nakutambika mama yindi. Chenjiliyi mama yaMosi kudi mwana kamwanta, mwana kamwanta wahosheli nindi: ‘Sendaku iwu mukeki wunleleliyi nakakufweta.’
Dichi mama yaMosi wadihembeleleli mwanindi. Chakuliliyi Mosi, wamutwalili kudi mwana kaFwaro wamumbanda, mwana kaFwaro wamuhembeli neyi mwanindi. Ichi dichakuliliyi Mosi mwitala daFwaro.