MPANJI 30
Chiputa Chinakwati Kesi
MOSI wayili kumpidi yaHorebi nakukeña matahu awanyikoku jindi. Kweniku wamweni chiputa chinakwati kesi, ilaña chiputa kusukuma nehi!
Mosi watoñojokeli nindi, ‘Ichi chuma kanda nichimoneñahu dehi. Nikuya kwakwihi kulonda nikachitalishi chiwahi.’ Chayiliyi kwakwihi, izu dafumini muchiputa hidikuhosha nawu: ‘Bayi wukundama kwakwihiku. Subulaku nkwabilu yeyi, muloña wunemani heseki dajila.’ Nzambi diyi wahosheleleña kuhitila mudi kañelu, dichi Mosi hakudibuta kumesu indi.
Nzambi wahosheli nindi: ‘Namoni antu ami chanakuyandawu muEjipitu. Dichi nikuyifumishamu, nawa yeyi yinukutemesha kulonda wulomboli antu ami kufuma muEjipitu.’ Yehova wakeñeleña kuyitwala antu jindi mwituña dadiwahi daKenani.
Ilaña Mosi wahosheli nindi: ‘Ami yaminyi. Nukutwesha kwila ñahi chumichi? Dichi neyi nayi, aIsarela añila nawu, “Hinyi wunakutemeshi?” Nakahosha namidi?’
Nzambi wamwakwili nindi, ‘Ichi dichiwakahosha.’ ‘“YEHOVA Nzambi yaAbarahama, Nzambi yaIsaka, Nzambi yaYakoba, diyi nantemeshi kudenu.”’ Yehova wabombelelihu nindi: ‘Idi didu ijina dami haya nyaka.’
Mosi wamwakwili nindi: ‘Indi neyi abula kuñiteja chinayileja nami yeyi wunatemeshi.’
Nzambi wamwihwili nindi: ‘Chumanyi chidi muchikasa cheyi?’
Mosi wakwili nindi: ‘Mbwechi.’
Nzambi wamwilili nindi, ‘Yinati heseki.’ Mosi chayinatiliyi mbwechi heseki, yabalumukili kapela. Yehova wamumwekesheli cheñi Mosi chihayamisha chekwawu. Wahosheli nindi: ‘Iñijaku chikasa cheyi munkanji yeyi.’ Mosi weñijili, dichi chachidishiliyi chadiña chitooka to-o neyi mpemba! Chikasa chamwekeni neyi kwiji chidi namusoñu watenañawu nawu mbumba. Chalondelelihu Yehova wamwinkeli Mosi ñovu yakwila chihayamisha chamuchisatu. Nkumininaku wahosheli nindi: ‘Neyi wila iyi yihayamisha aIsarela aketeja nawu Yami nakutemeshi.’
Hanyima yanichi Mosi wafuntili kumukala nakumulejamu Yetero nindi: ‘Mwani añiteji nifunti kudi antaña jami kuEjipitu nikayitali chanakuhandawu.’ Dichi Yetero wamwitejeli Mosi kuya, nawa Mosi watachikiliku lwendu lwakufunta kuEjipitu.