MPANJI 38
Akwakwendesha 12
TALAÑA nyikabu yanasendiwu awamayala. Talaña kutoha kwachizokofu chanyikabu yanyivinyu. Ichi chizokofu atela kuchitembeka kudi antu ayedi hamuhañu. Talaña nkuyu nimabula. Indi iyi nyikabu yayiwahi yafumini kudihi? Yafumini kwituña daKenani. Anukaku, kuKenani dikwashakamineña Abarahama, Isaka niYakoba. Ilaña muloña wakwila kwaholokeli nzala, Yakoba nichisaka chindi ayili kuEjipitu. Kwakwihi nayaaka 216, Mosi hakulombola aIsarela hakufunta muKenani. Anashiki dehi heluña datenañawu nawu isaña daKadeshi.
Mwituña daKenani mwashakamaña antu atama. Dichi Mosi hakutemesha akwakwendesha 12 nakuyileja nindi: ‘Katalenu kuvula kwawantu ashakamaña muna, mwiluki nawa neyi akola. Katalenu neyi iseki dadiwahi kutumba mbutu. Nawa chiña mwakaleti nyikabu.’
Chanafuntiwu akwakwendesha kuKadeshi, hiyakumuleja Mosi nawu: ‘Chalala hituña dadiwahi.’ Hakumwekesha wunsahu walala, hiyakumuleja Mosi nyikabu. Ilaña akwakwendesha 10 hiyakuhosha nawu: ‘Antu ashakamaña munidi ituña ataluka nawa akola. Neyi tukweseka netu tutambuli ituña akatujaha.’
A Isarela chachitiyiliwu hiyakutiya woma. Hiyakuhosha nawu, ‘Chadi kuwaha neyi twafwilili muEjipitu hela munu mwisaña. Akatujaha munjita nawa añodijetu nianyanetu akayikwata. Tusakulenu nlomboli wacheñi mwiluña daMosi kulonda tufunti kuEjipitu!’
Ilaña ayedi hadi akwakwendesha akuhwelela mudi Yehova, hiyakweseka kuwundisha antu. Majinawu diwu aYoshuwa naKalebi. Hiyakuhosha nawu: ‘Bayi mutiya womaku. Yehova wudi nanetu. Chakekala chaswayi kutambula ituña.’ Ilaña antu kutiyilila nehi. Hiyakukeña nikuyijaha aKalebi naYoshuwa.
Ichi chamuhilishili Yehova nankashi hakumuleja niMosi nindi: ‘Kwosi muntu niwumu wudi nayaaka yakusemuka 20 nakuya hambidi wakeñila mwituña daKenaniku. Amweni yihayamisha yinakoñeli muEjipitu nimumasaña, ilaña hiyanashi chikuhwelelu mudamiku. Dichi akaluluta mwisaña hadi yaaka 40 kushika tuhu nichakafwa muntu wakukumishaku. Yoshuwa naKalebi hohu diwu akeñila mwituña daKenani.’