MPANJI 48
Enigibeyoni Amaana 48
NYISUMBA yayivulu yamuKenani yinadiloñeshi kulwa naIsarela. Anatoñojoki nawu atela kuyishinda. Ilaña antu amumusumba wamukamwihi waGibeyoni hiyanatoñojoki ichiku. Akuhwelela nawu Nzambi nakuyikwasha aIsarela, dichi hiyanakukeña kulwa naNzambiku. Hanu dinu wuneluki chaneliwu aGibeyoni?
Anadikasa kulonda amwekani neyi kwiji ashakamaña kwakulehi nankashi. Dichi amayala amakwawu hiyakuvwala yikovwelu yataboka ninkwabilu yasasuboka. Hiyakuloñejeka jinjeki jataboka hayimbulu yawu nakusenda mankendi ominina. Hiyakuya kudi Yoshuwa nakumuleja nawu: ‘Tunafumini kwituña dadilehi, muloña twatiyili mpuhu yaNzambi yenu muneni Yehova. Twatiyili yuma yejima yayikoñeleliyi muEjipitu. Dichi anlomboli jetu atuleja kuloñesha yakudya yahalwendu kulonda twinzi tuhoshi nanenu netu: “Tuyambuñenu. Sanyikenu nenu himwakalwa nanetuku.” Talenu tuhu niyikovwelu yetu chiyinataboki muloña walwendu lwalulehi nawa nimankendi etu anominini aneli nimbuwa.’
Yoshuwa nialomboli amakwawu ayitejeli aGibeyoni. Dichi hiyakuyikana nawu hiyakalwa nawuku. Hanyima yamafuku asatu hiyakwiluka nawu aGibeyoni ashakamaña mukamwihi.
Yoshuwa hakuyihula nindi, ‘Muloñadi chimwatulejeleli nenu mwafuminini kwituña dadilehi?’
A Gibeyoni hiyakwakula nawu: ‘Twelili ñana muloña atulejeli nawu Nzambi yenu Yehova wayikanini kuyinka dinu ituña dejima daKenani. Dichi twatiyili woma netu mukutujaha.’ Ilaña aIsarela hiyakuhemba chikaninu chawu nawa hiyanayijahi aGibeyoniku. Hela chochu hiyakuyilisha añamba jawu.
Mwanta wakuYerusalema hakuhila muloña aGibeyoni anatiyañani nawaIsarela. Dichi hakuhosha nawanyanta awana nindi: ‘Twayenu munkwashiku kulwa naGibeyoni.’ Ichi nawa dichaneliwu awanyanta atanu. Indi aGibeyoni adiña namaana hakutiyañana naIsarela chinaleteshi awanyanta atanu kwinza nakuyilwisha? Tukumona.