MPANJI 50
Ambanda Ayedi Omika
A ISARELA chaneñiliwu mukukala, hiyakumudilila Yehova. Yehova hakuyakula kuhitila mukuyinka anlomboli omika akuyikwashaku. Bayibolu yatenaña awa anlomboli nawu ansompeshi. Yoshuwa diyi wadiña nsompeshi watachi, dichi ansompeshi amakwawu enjili hanyima yindi adiña neyi Otiniyeli, Ehudi niShamagari. Ilaña ayedi hadi awantu akwashiliku Isarela hiyambanda majinawu diwu aDebora naYahela.
Debora hikaprofwetu wamumbanda. Yehova wamulejaña nsañu yakumbidi, dichi yena hakulejamu antu mwanahoshiyi Yehova. Debora niyena hinsompeshi. Washakamaña mwishina damutondu wamukoma mwituña damapidi, antu enzaña kudi yena kulonda ayikwashi nyiloña yawu.
Haniyi mpinji Yabini diyi mwanta wakuKenani. Wukweti makalu anjita 900. Mashidika indi akola chakwila aIsarela amavulu ayikanjikijli kwikala añamba jaYabini. Mukulumpi wamashidika aMwanta Yabini ijina dindi diyi Sisera.
Ifuku dimu Debora hakutemesha mazu kudi Nsompeshi Baraka nakumuleja nindi: ‘Yehova nahoshi nindi: “Sendaku amayala 10,000 wuyilomboli kuMpidi yaTabori. Kwenoku nakamuleta Sisera kudeyi. Nakakwinkayi kulonda wakayishindi amashidika indi.”’
Baraka hakumuleja Debora nindi: ‘Nukuya neyi neyi wukuya nanami.’ Debora hakuya hamu nindi, ilaña hakumuleja Baraka nindi: ‘Hiwakatiyakenamu mpuhu yakushindaku, muloña Yehova wukamuhana Sisera mumakasa amumbanda.’ Ichi nawa dichinazatiki.
Baraka hakukunkumuka haMpidi yaTabori nakubulakana mashidika aSisera. Yehova hakukojeja dibaji chakuyibajimwisha, amashidika amavulu hiyakujiya. Ilaña Sisera hakufuma mwikalu dindi nakutemuka.
Haleheli chanti Sisera hakwinza kwitenti daYahela. Yahela hakumuleja kwiñila mwitenti, yomwinka nimayeli. Awa mayeli hiyakumuletela tulu, hohenohu hakuholokela nimutulu twatweni. Dichi Yahela anona nilubwambu lwetenti nakumupopa nachu iwu muntu watama mumutu. Nkumininaku chanenziyi Baraka, Yahela hakumwekesha Sisera wafwa dehi! Dichi wunateli kwiluka neyi mwahosheliyi Debora mwadiña mwalala.
Nkumininaku, Mwanta Yabini amujahili niyena, aIsarela hiyakwikala mukuwunda hakapinji kantesha.
Ansompeshi 2:14-22; 4:1-24; 5:1-31.