MPANJI 62
Kukala Mwitala daDavidi
HANYIMA yakwila Davidi natachiki dehi kuyula muYerusalema, Yehova hakukwasha amashidika indi kushinda ayilumbu jawu amavulu. Yehova wasanyikili kuhana ituña daKenani kudi aIsarela. Dichi dinu, kuhitila muwukwashu waYehova, ituña dejima dayisanyikililiwu hidikwikala dawu.
Davidi hinlomboli wamuwahi. Wamukeña Yehova. Chuma chatachi chaneliyi hanyima yakutambula Yerusalema, hikuleta chimbañu chachitiyañenu chaYehova. Nawa hakukeña kutuña tembeli mwakuchinka.
Chanakuliyi Davidi, hakwila chiluwa cheneni. Davidi weluka nindi kutambula chuma chamuntu wacheñi chatama. Ilaña ifuku dimu nampinji yamelela, henohu wudi hetala dahewulu damuchipañu chindi, hakutala heshina hakumona mumbanda wasweja lubanji. Ijina dindi diyi Batisheba, nfumwindi hiwumu hadi amashidika indi wejina daUriya.
Davidi hakusweja kumukeña Batisheba chakwila hakutemesha muntu amuleti muchipañu chindi. Nfumwindi wudi kunjita. Davidi hakukama nindi nawa chimunahiti mafuku mumbanda hakwiluka nindi wudi nevumu. Davidi hakwakamena nankashi, dichi hakutemesha mazu kudi Yowabi mukulumpi wamashidika indi kulonda amushi Uriya kumbidi yanjita kulonda akamujahi. Uriya chinafwiyi, Davidi hakumusumbula Batisheba.
Yehova hakumuhilila Davidi nankashi. Dichi hakutemesha kambuñindi Natani kulonda amukonkololimu nshidi yindi. Wunatweshi kumumona Natani nakuhosha naDavidi hana. Davidi hakuneña nankashi hachuma cheliliyi, nawa Yehova hanamujahiku. Ilaña Yehova hakuhosha nindi: ‘Muloña wuneli iyi yuma yatama, wakekala nakukala kweneni mwitala deyi.’ Okukala kukwetiyi Davidi!
Tachi, mwana kaBatisheba weyala hakufwa. Chalondelelihu mwanindi wawedi weyala Aminoni hakumusenda muhelindi Tamari nakumukanjikija kukama nindi. Mwana kaDavidi Abisalomi hakuhila nankashi muloña wanichi hakumujaha Aminoni. Chimwahitili mafuku, antu amavulu hiyakumukeña Abisalomi, dichi Abisalomi hakudidyisha yomwenindi wanta. Nkumininaku, Davidi hakumushinda muloña Abisalomi amujahili. Eña, Davidi wudi nakukala kwakweni.
Hakachi kampinji yejimiyi, Batisheba hakuvwala mwana weyala wejina daSolomoni. Chinakuliyi Davidi nawa hakukata, mwanindi Adoniya hakukeña kudidyisha yomwenindi wanta. Dichi Davidi hakuleja kapristu wejina daZadoki kumuwayisha Solomoni manji mumutu windi kumwekesha nawu Solomoni wakekala mwanta. Nkumininaku Davidi hakufwa nayaaka 70 yakusemuka. Wayulili hadi yaaka 40, ilaña ichi Solomoni diyi mwanta waIsarela.
2 Samweli 11:1-27; 12:1-18; 1 Anyanta 1:1-48.