MPANJI 65
Wanta Wunambuki
WUNELUKI muloña waweni iwu iyala wunakutabwilayi nkanji yindi muyibeli? Yehova diyi wamulejeli kuyitabula. Iwu iyala hikaprofwetu kaNzambi Ahiya. Wamwiluka kaprofwetu? Diyi muntu walejañawu dekulu yuma yikamwekana kudi Nzambi.
Ahiya nakuhosha naYerobowami. Yerobowami diyi muntu wanenkiwu kudi Solomoni wukulumpi wakutala mudimu windi wakutuña. Ahiya chinamubulakaniyi Yerobowami aha hamukwakwa, Ahiya hakwila chuma chenyi. Hakusubula nkanji yindi yayiha yanavwaliyi nakuyitabula muyibeli 12. Hakumuleja Yerobowami nindi: ‘Tambulaku yibeli yeyi 10.’ Wuneluki muloña waweni Ahiya chanamwinkeliyi Yerobowami yibeli 10?
Ahiya hakulumbulula nindi Yehova wukamutambula Solomoni wanta. Hakuhosha nindi, Yehova wukamwinka Yerobowami nyitaña 10. Ichi chinakulumbulula nawu nyitaña yiyedi hohu diyikushala namwana kaSolomoni Rehobowami kulonda ayiyuleña.
Chanachitiyiyi Solomoni chamulejeliwu Yerobowami kudi Ahiya, hakuhila nankashi. Hakukeña kumujaha Yerobowami. Ilaña Yerobowami hakutemukila kuEjipitu. Chimunahiti kapinji kantesha Solomoni hakufwa. Wadiña mwanta hadi yaaka 40, ilaña ichi mwanindi Rehobowami anamwilishi kwikala mwanta. Kuna kuEjipitu Yerobowami chanatiyiyi nawu Solomoni nafwi, hakufunta cheñi muIsarela.
Rehobowami himwanta wamuwahiku. Hakuhemba antu chatama kubadika chadiñayi tata yindi Solomoni. Yerobowami nawantu amakwawu alema hiyakuya kudi Mwanta Rehobowami nakumulomba kulonda ekali chiwahi nawantu. Ilaña Rehobowami kutiya nehi. Kafwampi, hakuswejesha nikutama kubadika hakusambila. Dichi antu hiyakumwilisha Yerobowami mwanta hadi nyitaña 10, ilaña nyitaña yiyedi yaBenjamini naYuda hiyakukakela kudi Rehobowami neyi mwanta wawu.
Yerobowami hanakukeña antu jindi kuya kuYerusalema nakudifukula kutembeli yaYehovaku. Hakwila anyana kañombi awuru ayedi nakwilisha antu awanta wanyitaña 10 kudifukulañaku. Mumpinji yantesha ituña hidikwinzala namadombu niwubanji.
Muwanta wanyitaña yiyedi nimwena mudi kukala. Mukamwihi nayaaka yitanu hanyima yakwila Rehobowami nekali dehi mwanta, mwanta wakuEjipitu hakwinza nakulwisha Yerusalema. Hakusenda yuma yayivulu yalema yamutembeli yaYehova. Mukapinji kantesha hohu tembeli hiyikushala neyi chiyadiña hayituñiliwu.
1 Anyanta 11:26-43; 12:1-33; 14:21-31.