Andemoni Akoleshaña Kudikaña naNzambi
Tushidikilu tukwawu twashindamena hantwambi yakwila nawu afu atwimonaña
Muloñadi Satana niandemoni jindi chiyazatilañawu nañovu kulonda adimbi antu? Muloña akeñaña nawu tudibombi mukudikaña kwawu. Akeñaña nawu tudifukuleña kudi wena. Akeñaña tukuhweleli makudi awu nakwila yuma yahelayi Yehova. Yaaku yayivulu yeniyi yabombelamu tushidikilu twakundama kudi afu.
Kufwa kwamuntu yitwakeña hichuma chaneñeshaña chikupu, nawa chekala chachiwahi nawa chashikila kutiya chineñi chamuchidiwu. Hanyima yakufwa kwebwambu dindi Lazaru, Yesu ‘wadilili.’—Yowanu 11:35.
Kwekala tushidikilu twatuvulu twakundama kukufwa, nawa tushidikilu twenitu twambuka chikupu mwahita kaayi kejima. Tushidikilu twatuvulu twashiyashana nanshimbi yamuBayibolu. Hela chochu, yaaku yikwawu yashindamena hayitoñojoka yakwila nawu afu ekala amomi nawa nawu amonaña antu amomi. Kuchiisha hachipenji, kusweja kudila niyidika yasweja kutoha yahachipenji yashindamena hawoma wakuchiina kuhilisha aspiritu awafu. Chineli afu “hiyeluka chumaku,” antu akoñaña yuma yamuchidiwu atandishaña kutwamba kwaSatana.—Mukwakutaŋisha 9:5.
Tushidikilu tukwawu twashindamena hakutwamba kwakwila nawu afu akeñaña wukwashu wetu
Tushidikilu tukwawu hela yidika yafuma kuyitoñojoka yakwila nawu afu akeñaña wukwashu kufuma kudi amomi nawa nawu anateli kukatisha amomi neyi chakwila ayihilisha. Mumatuña amakwawu elaña yidika nikuhana nyilambu hamafuku 40 hela chaaka chamukuma hanyima yakufwa kwamuntu. Chumichi achimonaña neyi chakwashaña mufu ‘kwawuka’ nakuya muwanta wawaspiritu. Chaaku chikwawu chavula kudi antu hikuhana yakudya niyakunwa kudi afu.
Yaaku yeniyi yatama muloña yatandishaña kutwamba kwaSatana kutalisha hadi afu. Komana Yehova nateli kutwiteja kudibomba mutushidikilu twashindamena hantañishilu yawandemoni? Kwakulehi!—2 Akorinda 6:14-18.
Ambuña Nzambi walala hiyadibombaña muyaaku yatwalaña hambidi kutwamba kwaSatanaku. Ilaña, hamuloña wakukeña azatishaña mpinji yawu hakukwasha nikukundeja amomi. Eluka nawu neyi muntu nafwi, Yehova hohu diyi wunateli kukwasha muntu yeniwu.—Yoba 14:14, 15.
Kupesha Akwikanisha Kudi Nzambi
Antu amakwawu atiyañanaña aweni nawandemoni hela kuhitila mudi mukwakuzakuka akishi. Chumichi achitenaña nawu kupesha. Kulowañana, wuloji, kupanda, kuleja muntu yuma yakamwekana kumbidi, nikuhanjeka nawafu yejima yekala hinyichidi yakupesha.
Nzambi wahela iyi yuma yatama. Wakeñaña kumulemesha chikupu nkawindi.—Kwidika 20:5
Bayibolu yakanisha yumiyi nakuhosha nawu: “Kudeyi bayi kwakamwekana . . . mukwakuhoña, hela mukwakuhoña natutumbwa, hela wasansa nyiseñu, hela mukwakupanda, hela mukwakukaya, hela mukwakupesha, hela katepa, hela kadañuku. Muloña antu ejima elaña yumiyi Yehova wayimona nindi hiyakwakushimana; muloña kwena kushimaniku diku kwakuyitemwinayi Yehova Nzambi yeyi kuwukuyeyi.”—Kuhituluka 18:10-12.
Muloñadi Yehova chatwikonkomwenayi chikupu kulonda tuleki yaaku yeniyi?
Yehova watwikonkomwena kuleka nyichidi yejima yakupesha kulonda twikala nanshakaminu yayiwahi. Wakeña antu nawa wayakamenaña, nawa weluka nindi ana adibombaña nawandemoni akumona yihuñu.
Muntu wumu wamweni yihuñu wadiña Nilda, wadiña mukwakuzakuka akishi muBrazil. Andemoni amukabishili chikupu mumbanda yeniwu. Wahosheli nindi: ‘Aspiritu . . . adiña nakunyula, nakunleja yuma. Nadiña hakachi kakwiluka yuma nikubula kwiluka yuma, nawa anshili mukaleya hamuloña wamatachi. Andemoni ankabishili nankashi chakwila niwuswa wami wakutoñojoka waluwankeni. Natachikili kunwa makanya mpinji yejima niyitumbu yatulu. Chumichi chasendeli yaaka yayivulu.’
Antu apeshaña kakavulu amonaña kukala. Anateli kujimbesha itala dawu, waana wawu wakukasunuka, hela tuhu wumi wawu
Chimwahitili mpinji, nawukwashu waYehova niaYinsahu jindi hamaseki, Nilda wapulukili kuwufwinda wawandemoni nawa chayinu mpinji nakushakama chachiwahi hama. Wahosheli nindi: ‘Inakukolesha ejima nami, bayi adikundaña nawaspiritu [atamaku] hela tuhu kapampa kamu.’