Hinyi Wayulaña Kanu Kaayi?

Antu amavulu ashikenaña kwakula ilu lwihu nawu—Nzambi diyi. Henohu Bayibolu hiyashimuna nawu Yesu Kristu hela Tata yindi diwu anyuli akanu kaayiku. Ilaña, Yesu wahosheli nindi: “Ichi dinu mwanta wayulaña mpata yamunu mwishina hakwikala chimwañaji.” Nawa watwalekeluhu nindi: “mwanta wayulaña mpata yamunu mwishina hakwinza; niyena hakweti chuma mudamuku.”—Yowanu 12:31; 14:30; 16:11.

Komana nyuli wampata yamunu mwishina nakumuzuñañesha Yesu. Indi iwu nyuli hinyi?

Yuma Yinakumwekana muKaayi Yinakuhana Wunsahu

Hela chakwila antu akweti luwi anakuzata nañovu, kaayi kanayandi chikupu muyaaka yejima yinahituhu. Chumichi chaleñelaña akwamaana kuhayama, neyi chahayamini wushiwawu David Lawrence nsoneki wansañu nindi: “‘Kuwunda hamaseki’—muntu wejima wakwikeñaña. Antu amavulu mukaayi akombelelaña akwawu antu—‘kuhanda chachiwahi.’ Hanu dinu chumanyi chinaluwankani? Muloñadi chikwekalila njita hela chakwila antu akeñaña kuwunda?”

Ilaña yuma yinakutaminaku hohu, hidimuku? Hela chakwila antu akeñaña kushakama mukuwunda, ilaña anakudihela nikudijaha wumu namukwawu—nandulu yayeni. Toñojokenu hawukatu wasweja wakujahañana chakadi kutiyila luwi. Antu azatishaña tupeka twampepela yawulembi, yilombu yakuyandishilamu antu, mata anyizuzu yakesi, nyitenda nzumbu, ninjila jikwawu jatama jakuyandishilamu nikudijaha chakadi luwi.

Komana munakutoñojoka nenu antu, akeñaña kuwunda nimuzañalu, anateleli kuleta kutama kwamuchidiwu hadi akwawu antu? Anyi akojejaña antu kwila yuma yatama yamuchidiwu hela ayileñelaña kukoña yuma yakuhayamisha? Mwatoñojokahu dehi neyi chakwila ñovu jatama, jabulaña kumwekana dijaleñelaña antu kwila madombu amuchidiwu?

Anyuli aKanu Kaayi Anayishimuni

Kwosi wunateli kujina haniyi nsañuku, muloña Bayibolu yashimuna hatooka nawu muntu wamaana, wabulaña kumwekana diwunakuyula antu ninyuza. Bayibolu yahosha nawu: “Mpata yamunu mwishina yashakamaña mudi owu watama.” Nawa yamushimuna nawu: “Owu . . . atenañawu nawu Diyabolu, diyi Satana wadimbaña antu ampata yamunu mwishina ejima.”—1 Yowanu 5:19; Chimwekeshu 12:9.

Mpinji yimu ‘yamwesekeliwu Yesu kudi Diyabolu,’ Yesu hajinokeli chifulu chaSatana hamu neyi nyuli wakanu kaayiku. Bayibolu yalumbululaña chamwekeni nawu: “Diyabolu hakumutwala hampidi yayilehi nankashi, hakumuleja mawanta ampata yamunu mwishina ejima, nikulema kwawu; hakumwila nindi, Neyi wukudinata heseki nakudifukula kudami, nukukwinka yuma yejimiyi. Yesu hakumwila nindi, Fumaku eyi Satana.”—Matewu 4:1, 8-10.

Toñojokenu. Satana wamwesekeli Yesu kuhitila mukumuleja ‘mawanta ampata yamunu mwishina ejima.’ Komana kuhana kwaSatana kwadikwikala kweseka kwalala neyi chakwila Satana hadiña nyuli wanawa mawantaku? Inehi, hikwadi kwikala kwesekaku. Nawa ilukenu nenu, Yesu wetejeli nindi nfulumendi jejima jamukaayi jadiña jaSatana, neyi Satana hadiña nañovu hanawa mawantaku mutenowu Yesu wadi kukaana. Komana, Satana Diyabolu mwalala diyi nyuli wabulaña kumwekana wakanu kaayi! Nawa, Bayibolu yamutenaña nawu “nzambi yampata yamakonu.” (2 Akorinda 4:4) Hanu dinu, iwu muntu watama wekalili ñahi hanichi chifulu cheneni?

Iwu muntu wekalili Satana wadiña kañelu waleñeliwu kudi Nzambi, ilaña watachikili kufwila chifulu chaNzambi. Wajinokeli wuswa waNzambi wakuyula. Muniyi njila wazatishili kapela hamu neyi wakumuhoshelaku hakudimba mumbanda watachi, Evu, nawa waleñesheli Adama niEvu kwila chakeñeleñayi yena kubadika kumwovwahila Nzambi. (Kutachika 3:1-6; 2 Akorinda 11:3) Wahosheli cheñi nindi anyana kaAdama naEvu akavwalika wakayiheñula kufuma kudi Nzambi. Dichi Nzambi wamwinkeli Satana mpinji kulonda yeli mwahosheliyi, ilaña Satana nakañanyi.—Yoba 1:6-12; 2:1-10.

Cheñi nawa, Satana hayulaña dinu ituña nkawinduku. Watwesheli kukokola añelu amakwawu kudibomba nindi mukudikaña naNzambi. Awa añelu ekalili andemoni, aspiritu amukwashaña. Bayibolu yahoshaña hadawa añelu hakukonkomwena eniKristu nawu: ‘Dikañenu namaana aDiyabolu akudimbana. Muloña hitwalwishaña nawantu akweti nyijimba namashuku, twalwishaña . . . nawakwakuyula mwidima wamakonu, nawaspiritu atama amumawulu.’—Aefwesesa 6:11, 12.

Kaanenu aSpiritu Atama

Awa anyuli atama amukaayi abulaña kumwekana, afwilaña kuluwañesha antu, kulonda abuleña kudifukula kudi Nzambi. Aspiritu atama elaña mwenimu kuhitila mukutiyakesha ntañishilu yakwila nawu muntu hafwañaku, henohu Izu daNzambi dashimunaña chikupu nawu afwa hiyeluka chumaku. (Kutachika 2:17; 3:19; Ezekeli 18:4; Masamu 146:3, 4; Mukwakutaŋisha 9:5, 10) Dichi, spiritu yatama yasombojolaña izu damuntu wafwa, yinateli kuhosha nawantaña hela nawamabwambu jamuntu wafwa, kuhitila mudi chimbuki hela “mwizu” damumpepela dakadi kumona. “Izu” dikutiyakana neyi damuntu wafwa, komana hindemoni!

Dichi chimwatiya “izu” damuchidiwu bayi mutiya womaku. Kaanenu mudikuhosha, nawa hoshenu neyi chahosheliyi Yesu nindi: “Fumaku eyi Satana!” (Matewu 4:10; Yakoba 4:7) Bayi mufwila kwiluka chekala wanta wawaspirituku. Muloña kukuyileñela kudikunda nawaspiritu atama. Kudikunda kwamuchidiwu akwitenaña nawu kupesha, nawa Nzambi wakonkomwenaña akwakudifukula indi kutondolwela nyichidi yejima yakupesha. Bayibolu yahishaña ‘muntu wahoñaña . . . hela mukwakupesha, hela katepa, hela kadañu.’—Kuhituluka 18:10-12; Aŋalija 5:19-21; Chimwekeshu 21:8.

Chineli kupesha kwaleñelaña muntu kudikunda nawandemoni, tondolwelenu yaaku yejima yakupesha hela chakwila kwamwekanaña neyi kwazañaleshaña, hela kwakuwahi. Mukupesha mwekala wuloji, kukanyika, kuhoña nachibanjilu, nikutala nyijila yamumakasa. Cheñi andemoni aletaña ipumba niyuma yikwawu yamwekanaña mumatala muyelaña mwawu mwakushakama.

Cheñi nawa, aspiritu atama akolelaña hanshidi yawantu kuhitila munyikanda, nyivwimbimbi, nimaprogilamu ahayisanji yanyivwimbimbi yamwekeshaña yuma yatama niyililu yawuvumbi. Andemoni eluka nawu yitoñojoka yatama neyi kuyifumisha mumutu nehi yatwalekañahu nawa yaleñelaña antu kwila yuma yatama—neyi yelaña andemoni.—Kutachika 6:1, 2; 1 Atesalonika 4:3-8; Yuda 6.

Eña, antu amavulu anateli kudiwulu yitoñojoka yakwila nawu dinu ituña anakudiyula kudi aspiritu atama. Nawa kadiwu kawu hikatwihayamishañaku, muloña Bayibolu yahoshaña nawu: “Satana wadifwikijaña neyi kañelu kachejeji.” (2 Akorinda 11:14) Kafuta kindi keneni kekala kakuputisha antu amavulu mesu nawu Satana niandemoni jindi kwekala kwosi. Ilaña bayi ayidimbaku! Diyabolu niandemoni jindi ekala kwoku, nawa mwatela kutwalekahu kudikaña nawu.—1 Petulu 5:8, 9.

Ilaña chinakutuzañalesha, muloña mpinji yakumufumishahu Satana niamabwambu jindi yinashiki dehi mukamwihi! Bayibolu yatulejaña nawu, “Mpata yamunu mwishina [kubombelahu niandemoni anakuyula] yikuhita, hakwinza muntu welaña muchima waNzambi washakamaña haya nyaka.” (1 Yowanu 2:17) Wenowu muzañalu wutwakatiya chakafumishahu andemoni atama! Komana, twikalenu hakachi kawantu anakwila nkeñelu yaNzambi nawa tukadiluñishi wumi wahaya nyaka mwituña daNzambi dadiha dakuloña.—Masamu 37:9-11, 29; 2 Petulu 3:13; Chimwekeshu 21:3, 4.

Nsona yitunazatishi yinafumi muBayibolu yaLunda yamu 1962. Ilaña neyi mukuwana tunazatishi NW yinalondeli hansona, dikwila nawu nsonoyu yinafumi muBayibolu yawundeli yaNew World Translation of the Holy Scriptures.

[Mwevulu wudi hefu 1]

Komana Satana wadi kumwinka Yesu jinfulumendi jejima jamukaayi neyi chakwila hijadiña jindiku?