Kapetulu 7
Komana Muchisaka Chenu Mudi Wunadikañi?
1, 2. (a) Chishimwinyi chatili Yesu hakulumbulula kubula kushinshika kwawanlomboli ansakililu jawaYuda? (b) Chumanyi chitwatela kudizila kuchishimu chaYesu kutalisha hadi anyikwenzi?
H ENOHU kunashali dehi mafuku antesha nakufwa, Yesu wenhwili izanvu dansakililu yawakulumpi jawaYudeya lwihu lwayileñeleli kutoñojoka chikupu. Wahosheli nindi: “Indi enu munatoñojokidi? Muntu wumu wadiñi nawanyanindi amayala ayedi. Hakwinza kudi wakusambila nindi, Mwanami, yaku nakukalakala mwitempa danyivinyu lelu. Yena hakumwakula nindi, Nukuya mwanta. Ilaña kuya nehi. Hakwinza kudi wamuchiyedi, hakumwila mwomumu. Yena nindi Kwonti kwami. Kutwala muna hakubalumuka hakuya. Awa ayedi, welili muchima watata yawu wumwodihi?” Alomboli jawaYudeya amwakwili nawu: “Wakukumininaku [NW.]”—Matewu 21:28-31.
2 Yesu wahosheleña hakubula kushinshika kwawanlomboli jawaYudeya. Adiñi neyi mwana wakusambila, akanini kwila nkeñelu yaNzambi ilaña hiyakoñeli mwokuku. Ilaña anvwali amavulu anateli kwiluka nawu chishimu chaYesu chashindameneni hakwiluka chachiwahi chihandilu chachisaka. Neyi chalumbulwiliyi Yesu muchishimu, kakavulu chakalaña kwiluka yuma yinakutoñojokawu atwansi hela yikwilawu. Kansi nateli kuleta kukala kwashiyashana hampinji yachidiyi mukwenzi, ilaña wukukula nakwikala muntu walumbuluka. Dichuma chitwatela kwiluka neyi tunakuhosha hansañu yakudikaña kwawanyana.
INDI MUKWAKUDIKAÑA HINYI?
3. Muloñadi anvwali chikubulilawu kunyakala kutena mwanawu nawu himukwakudikaña?
3 Kakavulu, mwatiyaña nawu anyana anakudikaña chikupu nawanvwali jawu. Hadaha mweluka nichisaka mwekala mwana chiluwañimbi. Hela chochu, chakalaña kwiluka neyi mwana himukwakudikaña chikupu. Dichi, chakala kwiluka chaleñelaña muchisaka chochimu anyana amakwawu kudikaña, ilaña amakwawu nehi. Neyi anvwali eluka chikupu nawu mwanawu nakutachika yililu yakudikaña, chumanyi chatela kwilawu? Hakwila twakuli ilu lwihu, tusambilenu kwiluka chekalayi mukwakudikaña.
4-6. (a) Indi mukwakudikaña hinyi? (b) Chumanyi chatela kwilukawu anvwali neyi mwanawu wavulaña kudikaña?
4 Mukwihihisha, mukwakudikaña himuntu wabulaña kwovwahila mumushikila hela wakanaña wulomboli. Hakwila ‘wusupi wekala mumuchima wakansi.’ (Yishimu 22:15) Anyana ejima adikañahu dehi nawanvwali jawu hela nawanlomboli. Ichi chamwekanaña sweje-e hampinji yakukula kumujimba nimuyitoñojoka kwatenañawu nawu kuhimpa kufuma kuwukwenzi nakwikala mukulumpi. Kuhimpa kudi kwejima muchihandilu chamuntu kwaleñelaña kwakama, nawa mpinji yawukwenzi yaletaña kuhimpika kwakuvulu. Mwanenu wamukwenzi hela chañadima nakukula kufuma kuwansi nakwikala mukulumpi. Hamuloña wanichi, muyaaka yawukwenzi, anvwali amakwawu nianyanawu hiyatiyashanañaku. Kakavulu anvwali chakadi kwiluka afwilaña kukañesha iku kuhimpika, ilaña atwansi akeñaña kuhimpa swayi.
5 Mukwenzi wunadikañi wakanaña kufumba kwawanvwali. Ilukenu nenu, kubula kwovwahila muyuma yantesha hikwaleñelaña muntu kwikala mukwakudikañaku. Nawa kunsañu yakuspiritu, hakutachika anyana amakwawu akanaña hela hiyakeñeshaña chalala chamuBayiboluku, ilaña hichinayi mukwila nawu hiyakwakudikañaku. Hakwikala anvwali, bayi munyakala kumutena mwanenu nenu himukwakudikañaku.
6 Komana yaaka yawukwenzi yawatwansi ejima yekalaña hohu yakudikaña nawanvwali? Inehi. Mwalala, wunsahu wamwekeshaña nawu, akwenzi antesha hohu diwu adikañaña chikupu. Indi neyi mwana wachinchika nawa wavulaña kudikaña? Chumanyi chamuleñelaña kudikaña?
YUMA YALEÑELAÑA KUDIKAÑA
7. Indi yuma yidi mukaayi kaSatana yinateli kuleñela ñahi mwana kudikaña?
7 Chuma chacheni chaleñelaña kudikaña hituña daSatana mutwashakama. “Mpata yamunu mwishina yashakamaña mudi owu watama.” (1 Yowanu 5:19) Kaayi kanakuyulewa naSatana kanaleti yaaku yatama yatela kushindawu akwaKristu. (Yowanu 17:15) Yaaku yeniyi yamajilu, yafwana chikupu, nawa yinakuluwañesha chikupu kubadika mpinji yakunyima. (2 Timotewu 3:1-5, 13) Neyi anvwali akuleka kudizisha, nikusoñamisha, nikukiña anyanawu, atwansi akuyiluwañesha kudi “diyabolu, wakoñeshaña katataka mudi akwakujikwa.” (Aefwesesa 2:2) Chuma chikwawu chaleñelaña hiikakeja dawakwawu. Bayibolu yahosha nawu: “Wadikunda nawayisupi wakamwenamu jakala.” (Yishimu 13:20) Chochimu, muntu wadikundaña nawantu akweti spiritu yakanu kaayi anateli kumuluwañesha kudi spiritu yeniyi. Atwansi akeñekaña kuyikwasha mpinji yejima kulonda eluki nawu kwovwahila nshimbi jaNzambi dihashindamena chihandilu chachiwahi.—Isaya 48:17, 18.
8. Yumanyi yinateli kuleñela mwana kudikaña?
8 Chuma chikwawu chaleñelaña anyana kudikaña hinshakaminu yahetala. Chakutalilahu, neyi nvwali wateñuka dehi nawalwa, wazatishaña yitumbu chatama, hela wahumpulaña mwinikwindi, mwana niyena wukukisika. Hela tuhu mwitala mwekala kuwunda, mwana nateli kudikaña neyi yamona nindi anvwali jindi hiyamukeñaku. Hela chochu, mpinji yejima anyana hiyadikañaña hamuloña wakuyiluwañesha kudi antu acheñuku. Anyana amakwawu adiwulaña kufumba kwawanvwali jawu hela chakwila anvwali jawu alondelaña nshimbi yaNzambi nikukiña anyanawu chikupu, kuyuma yamukaayi. Muloñadi? Hadaha chuma chikwawu chaleñelaña kudikaña, hikubula kuwanina. Pawulu wahosheli nindi: “Kudi iyala wumu [Adama] nshidi yeñilili mumpata yamunu mwishina, ninshidi yaleteli kufwa; chochenochu nawa nikufwa kwashikeneni antu ejima, muloña wejima wawu avulumwini.” (Aroma 5:12) Adama wadiñi mukwakudikaña nawa walwisu, dichi anyanindi wayishilili wuswana watama. Anyana amakwawu afuukulañahu kudikaña, neyi chelili ankakulula jawu.
ELI MUKWAWUTOTU NIREHOBOWAMI MUKWAKUKALISHA
9. Yumanyi yinateli kuletesha mwana kudikaña?
9 Chuma chikwawu chaleñelaña anyana kudikaña, hiyitoñojoka yawanvwali yakubula kwiluka mwakukumina kutalisha hakuhemba anyana. (Akolose 3:21) Anvwali amakwawu ashinshika aswejaña kukalisha nikubabesha anyanawu. Amakwawu ahembaña nyanawu wutotu, hiyayifumbaña anyanawu achidi kanda eluki yuma yayivulu kulonda kuyikiñaku. Kwiluka mwakukumina haniyi yuma yiyedi chekala chakala. Chochashiyashana nyana nikufumba kwashiyashanaña. Wumu anateli kumufumbaña nankashi kubadika mukwawu. Hela chochu, yakutalilahu yiyedi yamuBayibolu yikutukwasha kumona wubanji wekala mukusweja kukalisha hela kuhemba anyana wutotu.
10. Hela chakwila Eli wadiña kapristu muneni washinshika, muloñadi chadiñileñayi nvwali wabula maana?
10 Eli kapristu muneni wamuIsarela wakushankulu wadiña nvwali. Wakalakeli hadi yaaka 40, nawa Nshimbi yaNzambi wayilukili chikupu. Eli wazatileña chikupu nyidimu yindi yawupristu nakashinshi nawa watela wayidizishili chikupu anyanindi awamayala, aHofwini naFwinehasi Nshimbi yaNzambi. Hela chochu, Eli wahembeleña anyanindi wutotu. Hofwini niFwinehasi akalakeleña nyidimu yawupristu, ilaña adiña “antu amukunkulwayi,” akeñeleña hohu kuditiyisha aweni kuwaha nayuma yatama. Dichi, chakoñeleñawu yuma yazonda heluña dajila, Eli hadiñi nawuswa wakuyifumisha hanyidimu yawupristuku. Wayizuwilili hohu chantesha. Hamuloña wakulela anyanindi wutotu, Eli walemesheli anyanindi kubadi Nzambi. Chafuminimu, anyanindi adikañili nakudifukula kwaYehova kwakadi majilu nawa chisaka chindi chejima cheñilili mukukala.—1 Samweli 2:12-17, 22-25, 29; 3:13, 14; 4:11-22.
11. Chumanyi chatela kudizilaku anvwali kuchakutalilahu chatama chaEli?
11 Hampinji yamwekeni iyi yuma, anyana kaEli adiña akulumpi, ilaña iyi nsañu yamwekeni kunyaka yinakumwekesha wubanji wekala mukuhemba nyana wutotu. (Esekejenu Yishimu 29:21.) Anvwali amakwawu anateli kukañanya kwambula kukeña nakuhemba wutotu, nikukañanya kusha nshimbi yapela, kulonda ayilondelaña. Akañanyaña kubabesha nyana munjila yayiwahi, hela chakwila anafumpi nshimbi jaNzambi. Hamuloña wakuyihemba wutotu, anyanawu anateli kuleka kutiyilila kufumba kwawanvwali hela wunlomboli wudi wejima.—Esekejenu Mukwakutaŋisha 8:11.
12. Chumanyi chaluwañesheliyi Rehobowami hadiñayi mwanta?
12 Rehobowami wamwekesheli chakutalilahu chikwawu chatama kutalisha hawunlomboli. Wadiña mwanta wakukumishaku muwanta waIsarela wanuñañana, ilaña wadiña mwanta watama. Rehobowami waswanini mpata mwashakamineña antu adiña nachineñi chikupu hamuloña wayisenda yayitwikiluwu kudi tata yindi Solomoni. Komana Rehobowami wayitiyilili antu luwi? Inehi. Chelili antemesha amuleji kukeheshaku yisenda yayitwikiliyi antu, wakaanini kutiyilila kufumba kwakuwahi kwawakulumpi nawa wahosheli nindi wukuyilunjikilahu yisenda yawu. Kudivwimba kwindi kwaleñeleli antu amutaña wakukabeta kaluwunda kudikaña, nawa wanta awambwili hayedi.—1 Anyanta 12:1-21; 2 Kushindulula 10:19.
13. Anvwali anateli kutondolwela ñahi chiluwa chakoñeliyi Rehobowami?
13 Anvwali atela kudizilaku yuma yalema kuniyi nsañu yamuBayibolu yaRehobowami. Atela ‘kumukeñakeña Yehova’ kuhitila mukulomba nikuzatisha nshimbi jamuBayibolu hakushinshika jinjila mwahembelañawu anyanawu. (Masamu 105:4) Mukanda waMukwakutaŋisha 7:7 wahosha nawu “nyilami yasupishaña mukwamaana.” Nshimbi yayiwahi yaleñelaña atwansi kukula chachiwahi nawa nikuyikiña kuyuma yatama. Ilaña anyana hiyatela kushakama muchisaka chasweja kukalisha chakwila ayikañesheña kufuukulahu aweni nikudishindamenaku. Neyi anvwali afwilaña kwesekeja iyi yuma yiyedi kwiteja anyanawu kwikala akasunuka nikuyileja mwakukumina, atwansi amavulu hiyakuvulaña kudikañaku.
KUWANISHA YUMA YAKEÑEKAÑA KUNATELI KUKAÑESHA KUDIKAÑA
14, 15. Chumanyi chatela kwilukawu anvwali neyi mwanawu hakukula?
14 Hela chakwila anvwali atiyaña kuwaha hakumona mwanawu nakukula kufuma kuwunkemba nakushika kuwukulumpi, anateli kwakama neyi mwanawu wamukwenzi yatachika kuleka kuyishindamena nakutachika kudimena. Haniyi mpinji yakuhimpika, bayi muhayama neyi mwanenu mpinji jikwawu nakuleta winyi hela hanakutiyililaku. Ilukenu nenu chikonkwanyi chawanvwali akwaKristu chakukulisha mwana yekali mukwaKristu wapama, walumbuluka, nawa wamuwahi.—Esekejenu 1 Akorinda 13:11; Aefwesesa 4:13, 14.
15 Hela chikukala ñahi, anvwali atela kuleka chaaku chakudiwulaña anyanawu akwenzi neyi anakukeña kudimena. Mwana wakeñaña kudikulila, munjila yayiwahi. Mwalala, hampinji yachidiwu atwansi, anyikwenzi amakwawu atachikaña kwila yuma neyi akulumpi. Chakutalilahu, Bayibolu yahosha hadi Mwanta wakansi Yosiya nawu: “Iku wuchidi kansi [kwakwihi nayaaka 15] hakutachika kukeñakeña Nzambi yankakulula yindi Davidi.” Iwu mukwenzi wambukaku wadiña wamuwahi chikupu.—2 Kushindulula 34:1-3.
16. Chumanyi chatela kwilukawu anyana, neyi ayinka wuswa wakudifuukwila?
16 Hela chochu, kwikala wakasunuka kwaletaña kukala. Dichi, mulekenu mwanenu wunakushika muwukulumpi yadimweni wubanji wekala mukudifuukwila nimuyuma yakoñañayi. Lushimbi lwahosha nawu, “yonsu yakudimayi muntu, diyi yakadyayi,” lwazatikaña kudi akwenzi niakulumpi. (Aŋalija 6:7) Anyana himunateli kuyikiñaña mpinji yejimaku. Indi neyi, mwanenu nakukeña kwila chuma chakanishawu chikupu? Chineli mudi anvwali, mwatela ‘kukaana.’ Hampinji yimunakulumbulula muloña wumunakaanini, kwosi chuma chikuletesha muhimpi nakwiteja. (Esekejenu Matewu 5:37.) Hela chochu, mwatela ‘kukaana’ mumesu awunda nawa munjila yayiwahi, muloña “kwakula mukwenu mwamwovu chawundishaña ndombu.”—Yishimu 15:1.
17. Yumanyi yakeñaña akwenzi yatela kuyililawu anvwali jawu?
17 Atwansi akeñekaña kuyikiña kuhitila mukuyifumba mpinji yejima, hela chakwila hiyavulaña kwiteja mwayilejañawuku. Neyi nvwali yahimpaña nshimbi mpinji yejima kwesekeja nachinakutoñojokayi hanoyu mpinji, chatiyishaña kumuchima kutama. Cheñi, neyi atwansi ayikoleshaña nikuyikwasha, kwesekeja nachinakukeñawu, hakwila nawu abuleña kutiya nsonyi, anateli kukula chachiwahi. Nawa atwansi atiyaña kuwaha neyi anvwali jawu ayikuhwelela kwesekeja nanyidimu yawu.—Esekejenu Isaya 35:3, 4; Luka 16:10; 19:17.
18. Yumanyi yatukoleshaña kutalisha hadi akwenzi?
18 Anvwali azañalalaña neyi eluka nawu muchisaka mudi kuwunda, nikukeña, nawa anyana akulaña chiwahi. (Aefwesesa 4:31, 32; Yakoba 3:17, 18) Hela chakwila, atwansi amavulu akulilaña muyisaka yatama, mwekala antu ateñuka dehi nawalwa, ndombu, hela yuma yikwawu yatama, akulaña nakwikala antu amawahi. Dichi, neyi anyanenu mwitala denu eluka nawu akiñewa, nawa mwayikeña, nikuyisha kashinshi—hela chakwila yumiyi yendelaña hamu nakukañesha kwatelela nikufumba kwesekeja nanshimbi yamuNsona, anyana anateli kukula chiwahi nawa akayitiyisha kuwaha.—Esekejenu Yishimu 27:11.
NEYI ANYANA ADI MUKUKALA
19. Hela chakwila anvwali atela kufumba mwana yendi munjila yatela kuyayi, mudimwinyi wekala namwana?
19 Kukulisha anyana chachiwahi kwakuwahi chikupu. Yishimu 22:6 yahosha nawu: “Mufumbi mwana endi munjila yatela kuyayi, chakakulayi hakafuma mwoku.” Hela chochu, indi atwansi anakumona kukala kweneni hela chakwila akweti anvwali amawahi? Komana mwalala hakafuma mwoku? Eña. Hakutiyisha mazu ekala hayishimu mwatela kutala hamavasi amakwawu akonkomwena hamudimu wukwetiyi mwana ‘wakutiyilila’ nikwovwahila anvwali. (Yishimu 1:8) Nvwali nimwana, wejima wawu atela kuzatila hamu hakuzatisha nshimbi jamuNsona hakwila nawu atiyañaneña muchisaka. Neyi anvwali nianyana hiyazatilaña hamuku, chaletaña kukala.
20. Neyi chakwila anyana aluwañesha hamuloña wakubula kushinshika, chumanyi chatela kwilawu anvwali?
20 Chumanyi chatela kwilawu anvwali neyi mwana naluwañeshi nawa wudi mukukala? Diyi mpinji yatela kumukwashawu chikupu. Neyi anvwali eluka nawu mwanawu kanda yeluki yuma yayivulu, anateli kutondolwela chaaku chakusweja kuzuwa. Pawulu walejeli akwaKristu apama muchipompelu nindi: ‘Neyi anawani muntu navulumuni, enu mwendaña muspiritu, mufuntishenu muntu wudi ochu naspiritu yakudizoza.’ (Aŋalija 6:1) Anvwali niwena atela kuzatisha iyi njila neyi chakwila anakukwasha kansi wunakoñi chiluwa hamuloña wakubula kushinshika. Hakumulumbulwila chaluwa chakoñayi nichatela kwilayi kulonda kubula kahiñishahu, anvwali atela kumulumbulwila chikupu nawu yililu yindi diyi yatama, bayi neyi yenaku.—Esekejenu Yuda 22, 23.
21. Hakwimbujola chakutalilahu chachipompelu chawakwaKristu, chumanyi chatela kwila anvwali neyi mwanawu navulumuni chikupu?
21 Indi neyi yililu yamwana yinasweji kutaminaku? Neyi chikala mwenimu, mwana yeniwu nakukeñeka kumukwasha nikumulombola munjila yayiwahi. Neyi muntu wamuchipompelu yavulumuna chikupu, watela kubalumuka mumuchima nakuyilejamu aeluda kulonda amukwashi. (Yakoba 5:14-16) Chabalumukayi mumuchima, aeluda azatilaña hamu nindi kulonda yakoli cheñi kuspiritu? Muchisaka, anvwali diwu akweti mudimu wakukwasha mukwenzi wunavulumuni, hela chakwila atela kuhanjeka nsañu yeniyi nawaeluda. Dichi hiyatela kuyisweka aeluda nshindi yeneni yinakoñi mwanawuku.
22. Hakumwimbujola Yehova, anvwali atela kumwekesha yililu yamuchidinyi neyi mwanawu navulumuni chikupu?
22 Neyi anyana avulumuna chikupu, nvwali wekalaña mukweseka kweneni. Hamuloña wakuhila, anvwali anateli kumuchinisha mwana wunadikañi; ilaña kwila mwenimu kwamuleñelaña kusweja kuchinchika. Ilukenu nenu chihandilu chamwana chakumbidi chinateli kushindamena hachimunakumuhemba haniyi mpinji yakala. Cheñi, ilukenu nenu, Yehova wadi kuyanakena antu jindi hampinji yalekeluwu kwila mwaloña, neyi chakwila abalumukili mumuchima. Tiyenu Yehova chahosheliyi chachiwahi nindi: “Inzenu tutiyañanenu, hela neyi nshidi jenu jichinana jakatooka to-o neyi mpeza; hela neyi jichinana nge, jakatooka neyi wanda.” (Isaya 1:18) Ichi hichakutalilahu chachiwahi kudi anvwali!
23. Neyi mwana navulumuni chikupu, chumanyi chatela kwilawu anvwali nikutondolwela?
23 Dichi, mwatela kumukwasha mwana wunapwapuki yahimpi yililu yindi. Mwatela kulomba wukwashu kudi anvwali nawaeluda muchipompelu eluka yuma yayivulu. (Yishimu 11:14) Bayi munyakala kwila yuma mulufuchi hela kuhosha mazu akuleñela mwana yakañanyi kufunta kudenuku. Bayi musweja kuzuwa hela kuhemba nkunyuku. (Akolose 3:8) Bayi munyakala kuleka kumukwashaku. (1 Akorinda 13:4, 7) Hela chakwila mwahela yuma yatama, bayi muchinchikisha muchima nikumuhilila mwana. Chuma chalema chikupu, anvwali atela kufwila kwimika chakutalilahu chachiwahi nikwikala nachikuhwelelu chakola mudi Nzambi.
CHAKUKWASHA MWANA WUNADIKAÑI CHIKUPU
24. Chumanyi chawushona chamwekanaña mpinji yikwawu muchisaka chawakwaKristu, nawa nvwali watela kwila ñahi?
24 Mpinji jikwawu chamwekanaña hatooka nawu mukwenzi nafuukuluhu kudikaña nikukana chikupu nshimbi jawakwaKristu. Muniyi njila mwatela kusha kashinshi hakukwasha hela kukolesha anyana amakwawu. Babalenu kulonda mubuli kumanishila mpinji kudi mwana wunadikañi, nakudiwula anyana amakwawu. Chatela mujindi chisaka chenu kukala kweniku, hanjekenu nachisaka chenu haniyi nsañu mumpinji yatelela nawa munjila yakuyikolesha.—Esekejenu Yishimu 20:18.
25. (a) Kwesekeja nalushimbi lwamuchipompelu chawakwaKristu, anvwali atela kwila ñahi neyi mwana nadikañi chikupu? (b) Chumanyi chatela kwilukawu anvwali neyi mwanawu nadikañi?
25 Kapostolu Yowanu wahosheli hadi muntu wadikañili chikupu muchipompelu nindi: “Bayi mumutambula mwitala, hela kumwim[u]shaku.” (2 Yowanu 10) Anvwali anateli kwila momumu namwanawu wunadikañi chikupu nawa wakula dehi. Hela chakwila kwila mwenimu kwakala chikupu, mpinji yikwawu chekala chalema kulonda kukiña anashali muchisaka. Chisaka chenu chinakukeñeka kuchikiña nikutwalekahu kuchakamena. Dichi, twalekenuhu kuyilumbulwila chachiwahi, yililu yatela kulondelañawu, mukwesekeja. Mwatela kuhanjekaña nawanyana anashali muchisaka. Dichi mwatela kwiluka chinakuzatawu kushikola nimuchipompelu. Nawa, yilejenu nenu mwahela yililu yamwana wunadikañi, ilaña mwana yomweni himwamuhelaku. Tanyishenu yililu yatama, bayi mwanaku. Anyana kaYakoba ayedi chaleteluwu ihuñu muchisaka hamuloña wakwila yuma yatama, Yakoba waheleli yililu yawu yatama, bayi anyanaku.—Kutachika 34:1-31; 49:5-7.
26. Chumanyi chatela kwilukawu anvwali amawahi chikuyikundeja neyi mwanawu yadikaña?
26 Hadaha munateli kutoñojoka nenu yenu munaleñeli mwana yadikañi muchisaka. Ilaña neyi munazatiluhu chikupu nikulombelahu, nikulondela kufumba kwaYehova, himunateli kudinka muloñaku. Dichi mwatela kwiluka chikupu nenu hikwekala nvwali wawaninaku, ilaña munazati nañovu yenu yejima kulonda mwikali nvwali wamuwahi. (Esekejenu Yililu 20:26.) Neyi muchisaka mudi mwana wunakudikaña chaneñeshaña chikupu, nawa neyi chiyimwekena, mwatela kwiluka nenu Nzambi welukaña nawa hashiyaña ambuñidi adihanaku. (Masamu 27:10) Dichi fwilenu kuhemba chisaka chenu chachiwahi, nikuyikiña anyanenu anashaluhu kuspiritu.
27. Neyi mwanuka chishimu chamwana wajimbeli, anvwali yamwana wunadikañi atela kukuhweleladi?
27 Hela chochu, bayi muzeyaku. Chineli mwamudizishili mwanenu wunapwapuki chachiwahi, mukuhita kwampinji nateli kuhimpa muchima. (Mukwakutaŋisha 11:6) Yisaka yayivulu yawakwaKristu niwena achimonahu dehi, nawa amakwawu anyanawu apwapukili afunta, neyi chelili tata yawantu muchishimu chaYesu chamwana wajimbeli. (Luka 15:11-32) Chuma chochimu chinateli kumwekena nikudenu.
INDI IJI NSHIMBI JAMUBAYIBOLU JINATELI KUKWASHA . . . ÑAHI NVWALI KUKAÑESHA KUDIKAÑA CHIKUPU MUCHISAKA?
Neyi kumukwasha mwana nehi, anateli kumuluwañesha kudi spiritu yetuña.—Yishimu 13:20; Aefwesesa 2:2.
Anvwali atela kwiluka mwakukumina kutalisha hakukalisha nikuhemba anyana wutotu.—Mukwakutaŋisha 7:7; 8:11.
Munateli kukañesha yililu yatama, kuhitila muspiritu yakudizoza.—Aŋalija 6:1.
Antu akukoña yiluwa yamaneni anateli ‘kukola’ neyi abalumuka mumuchima nakwiteja wukwashu.—Yakoba 5:14-16.
[Chikasha chidi hef 82]
LEJENUMU ANVWALI JENU
Anyikwenzi ajinookaña nikwakama hamuloña wakudimena. Anateli kwakamena munjila yatela kudihembelawu mukaayi. Chidi neyi anakwenda munjila yasenena. Enu atwansi, yilejenuña anvwali jenu yuma yayitiyishaña woma niyayileñelaña kwakama. (Yishimu 23:22) Hela neyi mumona nenu anvwali jenu anasweji kukalisha, hoshenu nawu kulonda mwikali akasunuka. Fwilenu kuhanjeka nawanvwali jenu mumesu awunda nawa hampinji yinabuluwu nyidimu. (Yishimu 15:23) Ikalenu nampinji yakuditiyilila.
[Mwevulu wudi hefu 83]
Neyi anvwali akwashaña nyanawu kumanisha kukala kwamonañawu muwukwenzi, anateli kukula chiwahi