Kudiza 2

Nzambi Hinyi?

Nzambi walala hinyi, nawa ijina dindi hinyi? (1, 2)

Wekala na mujimba wamuchidinyi? (3)

Yililunyi yindi yabadikamu? (4)

Komana twatela kuzatisha ankishi ni yifwikija hakumulomba? (5)

Hinjilanyi jiyedi mutwatela kumwilukila Nzambi? (6)

1. Antu alombelelan̂a yuma yayivulu. Ilan̂a Bayibolu yatulejan̂a nawu kwekala Nzambi WALALA wumu hohu. Walen̂eli yuma yejima mwiwulu ni heseki. Mulon̂a watwinka wumi, Nkawindi hohu diyi twatela kulombelela.—1 Akorinda 8:5, 6; Chimwekeshe 4:11.

2. Nzambi wukweti nkumbu jajivulu ilan̂a wukweti ijina dimu hohu. Nodi ijina diyi YEHOVA. Mu maBayibolu amavulu ijina daNzambi adifumishamu, nakuhin̂ishamu nkumbu ja kutena nawu MWANTA hela NZAMBI. Ilan̂a hasonekeluwu Bayibolu, ijina da Yehova damwekenan̂a mapampa 7,000!—Kwidika 3:15; Masamu 83:18.

3. Yehova wukweti mujimba, ilan̂a hiwudi neyi yetuku. “Nzambi hispiritu,” dichahoshan̂a Bayibolu. (Yowanu 4:24) Spiritu himuchidi wawumi wambukaku chikupu nawumi wetu. Kosi muntu wamonahu dehi Nzambi. Yehova wekala mwiwulu, ilan̂a wamonan̂a yuma yejima. (Masamu 11:4, 5; Yowanu 1:18) Indi, komana, spiritu wajila hichumanyi? Himuntu neyi chekalayi Nzambi wanyi. Mukwambukaku, hin̂ovu ya Nzambi yazatikan̂a.—Masamu 104:30.

4. Bayibolu yatumwekeshelan̂a etu wuntu wa Yehova. Yashimunan̂a nawu yililu yindi yabadikamu yowu kuken̂a, wun̂anji, maana ni n̂ovu. (Kuhituluka 32:4; Yoba 12:13; Isaya 40:26; 1 Yowanu 4:8) Bayibolu yatulejan̂a nawu wukweti nawa wushona, luwi, kwanakena, ikoku, ni kuwunda. Etu neyi anyana ovwahila, twatela kweseka kumwimbujola yena.—Aefwesesa 5:1, 2.

5. Komana twatela kufukamina hela kudifuukula kudi ankishi, nyevulu, hela yifwikija mukulomba kwetu? Nehi! (Kwidika 20:4, 5) Yehova nindi chin̂a kumulomba yena hohu nkawindi. Hanatweshi kubombashana kulema kwindi namuntu wen̂i hela chuma chen̂iku. Ankishi hiyakweti n̂ovu yakutukwashaku.—Masamu 115:4-8; Isaya 42:8.

6. Twatelan̂ahi kumwiluka Nzambi chiwahi? Njila yatachi yakushinshika hayuma yalen̂ayi, nikuyiton̂ojoka ochu yatulejan̂a. Yalen̂ayi Nzambi yatulejan̂a nawu wukweti n̂ovu jamaneni ni maana. Tunatweshi kumona kuken̂a kwindi muyejima oyu yalen̂ayi. (Masamu 19:1-6; Aroma 1:20) Njila yikwawu twatela kumwilukilamu Nzambi yowu kudiza Bayibolu. Dimu mwatulejelan̂ayi jajivulu hanoochu chekalayi yomwini Nzambi. Watulejan̂a nawa ochu chafukulayi, noochu chaken̂an̂ayi kudi etu.—Amosa 3:7; 2 Timotewu 3:16, 17.

[Nyevulu yidi hefu 5]

Twamwilukan̂a Nzambi kuhitila muyalen̂ayi ni kufuma mu Bayibolu