Kudiza 3

Yesu Kristu Hinyi?

Mulon̂adi Yesu chamutenenawu nawu “Wedi” waNzambi? (1)

Mulon̂adi chamutenenawu nawu “Izu”? (1)

Mulon̂adi Yesu chenjililiyi neyi muntu hanu hamaseki? (2-4)

Mulon̂adi chazatililiyi yihayamisha? (5)

Chumanyi Yesu chakelayi mu mpinji yakumbidi? (6)

1. Yesu wadin̂a mwiwulu mumujimba wakuspiritu hehohu kanda yenzi hanu heseki. Diyi wadin̂i watachi mukulen̂a kwaNzambi, ochu dichi chamutenenawu nawu “Wedi” Mwana kaNzambi. (Akolose 1:15; Chimwekeshu 3:14) Yesu diyi Mwana weyala nkawindi, wuyalen̂eli kudi Nzambi yomwene. Yesu henohu kanda yekali namujimba wawuntu Yehova wamuzatishili, neyi ‘mukalawenu hindi’ hakulen̂a yuma yikwawu mwiwulu nihamaseki. (Yishimu 8:22-31; Akolose 1:16, 17) Nzambi wamuzatishili nawa neyi mukulumpi Wakumuhoshelaku. Ochu dichu chamutenenan̂awu Yesu nawu “Izu.”—Yowanu 1:1-3; Chimwekeshu 19:13.

2. Nzambi watemesheli Mwanindi Weyala hanu heseki, hakutuntulwila wumi windi mwivumu daMariya. Komana Yesu hadin̂i natata yindi wamuntuku. Dichabuliliyi kuswana nshidi yidi yejima hela kubulakulon̂a. Nzambi watumini Yesu hamaseki hanyilon̂a yisatu: (1) Kututan̂isha etu walala waNzambi (Yowanu 18:37), (2) kuhemba kashinshi kakeni kulonda kutushila chakumwenaku etu tulondelen̂a (1 Petulu 2:21), na (3) kuhana wumi windi kulonda kutukuula kunshidi na kufwa. Mulon̂adi ichi chaken̂ekeleli?—Matewu 20:28.

3. Hakubula kutiyilila kukambija kwa Nzambi, muntu watachi, Adama wavulumwini chatenan̂awu mu Bayibolu nawu “nshidi.” Nochu Nzambi wamukasilili kukufwa. (Kutachika 3:17-19) Hatwesheli nawa kushika muchipimu cha Nzambiku, nochu hadin̂i nawa wawaninaku. Wakotelen̂a chovuchovu nawa wafwili. Adama wasambushili nshidi kudi anyanindi ejima. Owu diwu mulon̂a twakotelan̂a, kukata, ni kufwa. Mujilanyi antu mwanateli kuhandilawu?—Aroma 3:23; 5:12.

4. Yesu wadin̂a muntu wawanina neyi chochu chadin̂ayi Adama. Kwambukaku na Adama, dinu, Yesu wadin̂i wovwahila Nzambi chikupu hela mukweseka kwabadika kutoha. Dihu dinu hakuhana wumi windi wamujimba wawuntu wawanina hakufweta hanshidi ya Adama. Imu dimu mwatalishan̂a Bayibolu hakuhosha nawu “wakukula nachu.” Anyana ka Adama dinu atela kukuulewa kufuma kukutanyisha ni kufwa. Ejima owu akukuhwelela mudi Yesu akuyanakena nshidi jawu nawa akatambula wumi wahayanyaka nanyaka.—1 Timotewu 2:5, 6; Yowanu 3:16; Aroma 5:18, 19.

5. Hadin̂ayi hanu heseki Yesu wokilen̂a akata, wadishilen̂a adinanzala, wamwenesheli ni makanda. Wasan̂wili ni afu. Mulon̂adi chazatililiyi yihayamisha? (1) Wayitiyililen̂a wushona antu adin̂i nakukabakana, nawa waken̂elen̂a kuyikwasha. (2) Yihayamisha yindi yamwilililen̂a wunsahu nawu hiMwana kaNzambi. (3) Yashimwinen̂a chakelilayi antu ovwahila mu mpinji yakayulayi neyi Mwanta weseki dejima.—Matewu 14:14; Maku 2:10-12; Yowanu 5:28, 29.

6. Yesu wafwili nawa amusan̂wili kudi Nzambi na mujimba wakuspiritu, nawa wafuntili mwiwulu. (1 Petulu 3:18) Kufuma henohu, Nzambi wamwinka Wanta. Mukunyakashana Yesu wakafumisha yuma yatama yejima ni makabi hadinu iseki.—Masamu 37:9-11; Yishimu 2:21, 22.

[Nyevulu yidi hefu 7]

Nyidimu ya Yesu yabombeleliku kutan̂isha, kuzata yihayamisha, ni kuhana wumi windi hanyilon̂a yetu