Kudiza 8

Shankaminu ya Chisemi Chamuzan̂aleshan̂a Nzambi

Iyala wukweti chifulunyi ha chisemi? (1)

Munjilanyi iyala mwanatwesheliyi kuhemba n̂odindi? (2)

Nyidimunyi yikwetiyi tatayawantu? (3)

Mbadinyi yazatan̂ayi mumbanda hakachi kachisemi? (4)

Chumanyi Nzambi chaken̂an̂ayi kudi anvwali ni kudi anyana? (5)

Himwenunyi yaBayibolu hadi kwambuka ni hadi kudisen̂a? (6, 7)

1. Bayibolu yahoshan̂a nawu iyala diyi mutu wachisemi. (1 Akorinda 11:3) Iyala watela kwikala na mumbanda wumuhohu. Atela kudisumbula chachiwahi kwesekana namwaya nshimbi.—1 Timotewu 3:2; Titusa 3:1.

2. Iyala watela kuken̂a n̂odindi neyi chadiken̂ayi yomwinindi. Watela kuhemba n̂odindi munjila oyu Yesu yahembelan̂amu atumbanji twindi. (Aefwesesa 5:25, 28, 29) Hatela kuhumpulan̂a n̂odindi hela kumuyandisha munjila yidi yejimaku. Ilan̂a, watela kumwinka n̂odindi kalemesha ni kavumbi.—Akolose 3:19; 1 Petulu 3:7.

3. Tatayawantu watela kuzatan̂a nan̂ovu hakuhemba chisemi chindi. Watelela kuletan̂a yakudya, yakuvwala ya n̂odindi na wanyanindi nikulon̂esha itala mwakushakama. Tata yawantu watelela nawa kulon̂eshela chisemi chindi kukabila kwakuspiritu. (1 Timotewu 5:8) Watwamininan̂a nikukwasha chisemi chindi kudiza kumwiluka Nzambi ninken̂elu yindi.—Kuhituluka 6:4-9; Aefwesesa 6:4.

4. Mumbanda watela kwikala nkwashi wakashinshi kudi mfumwindi. (Kutachika 2:18) Watela kukwashan̂a mfumwindi mukudizisha ni kufumba anyanawu. (Yishimu 1:8) Yehova waken̂an̂a ambanda ahemban̂a chisemi chawu mumuzan̂alu. (Yishimu 31:10, 15, 26, 27; Titusa 2:4, 5) Watela kwikala nakavumbi kudi mfumwindi.—Aefwesesa 5:22, 23, 33.

5. Nzambi waken̂an̂a anyana ovwahilen̂a anvwali jawu. (Aefwesesa 6:1-3) Wakuhwelelan̂a anvwali kufumba ni kolola anyanawu. Anvwali atela kwikala na mpinji yakushakama hamu nawanyanawu ni kudizilan̂a Bayibolu hamu nawu, nikuyikwashan̂a kuspiritu ni muyiton̂ojoka. (Kuhituluka 11:18, 19; Yishimu 22:6, 15) Anvwali bayi afumban̂a anyanawu munjila ya kuzuwa na kushintaku.—Akolose 3:21.

6. Neyi adi muwuluwi anakukan̂anya kutiyan̂ana atela kweseka kuzatisha kufumba kwa mu Bayibolu. Bayibolu yatushinjilan̂a kwikala nakuken̂a ni kwanakena. (Akolose 3:12-14) Izu daNzambi hidalejan̂a kwambuka neyi kwiji diyi njila yakumanishilamu kukala kwanteshaku. Ilan̂a mumbanda nateshi kutonda kufuma kudi mfumwindi neyi iyala (1) haken̂an̂a kukwasha chisemi chindiku, (2) wudi na madombu chakwila tuhu wumi windi ni kuhanda kwindi kudi muwubanji, (3) neyi nasweji kukan̂esha chakwilatuhu nakukan̂anya nikulomba kudi Yehova.—1 Akorinda 7:12, 13.

7. Adi muwuluwi atela kwikala anshishika kudi wumu na mukwawu. Wuvumbi hinshidi yakuvulumuna kudi Nzambi ni kudi mukwawu wamuwuluwi (mwinikwindi). (Aheberu 13:4) Wujila diwu mulon̂a wetija Nsona kudisen̂elahu nikwin̂ila chen̂i mumaluwi. (Matewu 19:6-9; Aroma 7:2, 3) Yehova wahelan̂a neyi antu akudisen̂a nakwin̂ila muwuluwi namuntu wachen̂i chakubula mulon̂a wetijewa Munsona.—Malaki 2:14-16.

[Nyevulu yidi hefu 17]

Nzambi wakuhwelelan̂a anvwali kudizisha anyanawu ni kuyolola

[Mwevulu wudi hefu 17]

Tata yawantu waken̂a chisemi chindi wayilon̂eshelan̂a lwakumujimba ni kuspritu