Kudiza 9

Ambun̂a Nzambi Atela Kwikala Awunyonji

Mulon̂adi twatelela kwikala akadi majilu munjilajejima? (1)

Chabalumunan̂adi kwikala wakadi majilu kuspiritu? (2)

nayililu yakadi majilu? (3)

yiton̂ojoka yakadi majilu? (4) mujimba wakadi majilu? (5)

Mazu amuchidinyi akasawuntu twatela kutondwelela? (6)

1. Yehova Nzambi wekala wakadi majilu nawa wajila. Waken̂an̂a akwakumulomba kwikala akadi majilu—kuspiritu, muyililu, muyiton̂ojoka, ni kumujimba. (1 Petulu 1:16) Kwekalan̂a kuzata nan̂ovu hakwikala wakadi majilu kumesu aNzambi. Twekala mwitun̂a dawuzondu. Tukweti nawa ndombu yakuzun̂a nakufwila kwanetu awenu kwahen̂a. Ilan̂a hitwatela kulekaku.

2. Kubula Majilu Kuspiritu: Neyi tunakukena kumuzatila Yehova, hitwatela kutwaleka kutiyililan̂a kuntan̂ishilu hela tushidikilu twakwitiya kwa kutwambaku. Twatela kufuma mukwitiya kwakutwamba ni kuleka kuyikwasha munjila yidi yejima. (2 Akorinda 6:14-18; Chimwekeshu 18:4) Neyi tunadizi dehi walala wa Nzambi, twatela kubabala bayi kutuluwan̂esha kudi antu atan̂ishan̂a yakutwambaku.—2 Yowanu 10, 11.

3. Yililu Yakadi Majilu: Yehova waken̂an̂a akwakumulomba kwikala nan̂endelu yawiniKristu mpinji yejima. (1 Petulu 2:12) Wamonan̂a yuma yejima twelan̂a, hela yitwelen̂a kumbadi. (Aheberu 4:13) Twatela kutondwelela wuvumbi na yuma yikwawu yawuzondi yadinu itun̂a.—1 Akorinda 6:9-11.

4. Yiton̂ojoka Yakadi Majilu: Neyi muyiton̂ojoka yetu tukushamu yuma yalumbwa, yalon̂a, nyendelu yetu yikwikala yakadi majilu. (Fwilipi 4:8) Ilan̂a neyi tukushindamena hayiton̂ojoka yabula kulon̂a, yikutulen̂ela kwila yuma yatama. (Matewu 15:18-20) Twatela kutondwelela yisela oyu yinatweshi kuvundan̂esha yiton̂ojoka yetu. Tukwinzesha maana etu nayiton̂ojoka yalon̂a kuhitila mukudiza Izu daNzambi.

5. Mujimba Wakadi Majilu: Mulon̂a akwa Kristu amwimenaku Nzambi, nyijimba yawu ni yakuvwala atela kuyihemba yakadi majilu. Twatela kwisuka kumakasa hanyima yakuzatisha chimbusu, nawa twatela kwisuka henohu kanda tutachiki kudya hela kukwata ku yakudya. Neyi hitukweti chimbusu chashikilaku, majilu ejima atesha kujikewa. (Kuhituluka 23:12, 13) Kuhemba mujimba wakadi majilu chakwashan̂aku kwikala na kuhanda kwakuwahi. Itala damwiniKristu datela kwikala dawunyoji nawa dakadi majilu mukachi ni hanji. Datela kwikala chakumwenaku hamukala wejima.

6. Mazu Amawahi: Ambun̂a Nzambi atela kuhoshan̂a mazu alala mpinji yejima. Akakutwamba hiyamba ken̂ila muWanta waNzambiku. (Aefwesesa 4:25; Chimwekeshu 21:8) Akwa Kristu hiyazatishana mazu atamaku. Hiyatiyililan̂a kuyihosha yansonyi hela nsan̂u yawuzondiku. Mulon̂a wahonshelu yawu yayiwahi, ekala ambukaku na wantu amakwawu ha nyidimu, hela hashikola ni mwatun̂ilawu.—Aefwesesa 4:29, 31; 5:3.

[Nyevulu yidi hefu 18, 19]

Ambun̂a Nzambi atela kwikala akadi majilu mumbadi jejima