KUDIZA 1

Nzambi Nakutambiki Wikali Ibwambu Dindi

Nzambi nakukeña wikali ibwambu dindi. Watoñozhokahu dehi neyi wunateli kwikala ibwambu daMuntu wabadika kulema mukuleña kwezhima? Abarahama wadiñaku hanyaka, amuteneni nawu ibwambu daNzambi. (Yakoba 2:23) Antu amakwawu ashimunawu muBayibolu adiluñishili wubwambu naNzambi, nawa ayikiswilili chikupu. Makonu, antu kunyeñumuka iseki dezhima anekali amabwambu zhaNzambi. Nineyi wunateli kwikala ibwambu daNzambi.

Chachiwahi kwikala ibwambu daNzambi kubadika kwikala ibwambu damuntu. Nzambi hatiyishaña nsonyi amabwambu zhindi amwovwahilaku. (Masamu 18:25) Chachiwahi kwikala ibwambu daNzambi kubadika kuheta maheta. Muntu waheta neyi nafwi, mali indi ashalaña nawantu acheñi. Ilaña, antu akukwata wubwambu naNzambi adi neheta dakashi kutuntulukila kudi muntu wacheñi.—Matewu 6:19.

Antu amakwawu anateli kweseka kukañesha kudiza hadi Nzambi. Amabwambu zheyi nichisaka cheyi anateli kwila mwenomu. (Matewu 10:36, 37) Neyi antu amakwawu akukuseha hela kukuchinisha, dihuli neyi, ‘Hinyi yinakukeña kuzañalesha—antu tahindi Nzambi?’ Toñozhokaku: Neyi muntu yakulekesha kudya, watela kumutiyilila? Inehi! Wadyaña yakudya kulonda wuhandi. Nzambi natweshi kukwitezha kushakama haya nyaka! Bayi witezha muntu niwumu yakukañeshi kudiza muwatelela kwikala ibwambu daNzambiku.—Yowanu 17:3.