Kapetulu 14

Ikalenu aKashinshi muYuma Yejima

“Tunakeñi kushakama chakashinshi muyuma yejima.”—AHEBERU 13:18.

1, 2. Muloñadi Yehova chazañalelañayi neyi yamona tunakuzata nañovu kulonda twikali akashinshi? Hanenu chakutalilahu.

MAMA yawantu nimwanindi wanyanya anediki musitolu. Kukasumuka mwana nemani, naneñi. Nakwati kadoli kanonayi musitolu. Walalamena kukifuntisha hela kumwila mama yindi kulonda yomulandili. Naneñi nawa hakutambika mama yindi kulonda yamukwashuku. Mama yindi hakumukundeja nawa hakumutwala musitolu kulonda yafuntishi kadoli nikulomba kwanakena. Mama yawantu hakuzañalala hakumona mwana nakudanakena. Muloñadi?

² Anvwali azañalalaña chikupu hakumona anyanawu anakudiza kulema kwakwikala akashinshi. Dichatiyañayi niTata yetu wamwiwulu, “Nzambi yansañu yalala.” (Masamu 31:5) Neyi yamonaña tunakupama kuspiritu, wazañalalaña hakumona chitunakufwila kwikala akashinshi. Hamuloña wakukeña kumuzañalesha nikushakama mukukeña kwindi, twembujolaña mazu akapostolu Pawulu akwila nawu: “Tunakeñi kushakama chakashinshi muyuma yejima.” (Aheberu 13:18) Tutalenu hayuma yalema yiwaana yamuchihandilu yinateli kuleñela chitwikalileña kwikala akashinshi mpinji jikwawu. Cheñi tukutala hankisu jafumaña mukwikala akashinshi.

KUDISHINSHIKA ETU AWENI

3-5. (a) Indi Izu daNzambi datusoñamishaña ñahi hawubanji wekala mukudidimba? (b) Chumanyi chatela kutukwasha kudishinshika?

³ Kukala kwatachi hikudiza kwikala akashinshi etu aweni. Hakwikala antu abula kuwanina, chaswayi kudidimba etu aweni. Chakutalilahu, Yesu walejeli akwaKristu muLayodikeya nindi adidimbileña nakutoñojoka nawu aheta, henohu, adiñi ‘atuzweñi, amputamesu, nawa adiña nawuvu’ kuspiritu, mwalala adiñi mukukala kweneni. (Chimwekeshu 3:17) Hamuloña wakudidimba, nshakaminu yawu yekalili muwubanji.

⁴ Cheñi, munateli kwanuka nenu, kambanji Yakoba wasoñamishili nindi: “Muntu wadimonaña nindi nahembaña yijila, iku kufumba idimi dindi nehi, wudi nakudidimba mumuchima, yijila yayeniwu muntu yamukunkulwayi.” (Yakoba 1:26) Neyi tutoñojokaña netu tunateli kumukalakela Yehova chachiwahi hela tunakuzatisha idimi detu chatama, dikwila nawu tunakudidimba. Kudifukula kwetu kudi Yehova kukwikala kwamukunkulwayi. Chumanyi chinateli kutukiña kuwubanji wamuchidiwu?

⁵ Mumavasi amakwawu, Yakoba wesekejeli chalala chezu daNzambi kuchibanjilu. Watulejaña kutala mulushimbi lwaNzambi lwalala nikuhimpa yililu yetu. (Yakoba 1:23-25) Bayibolu yinateli kutukwasha kwikala akashinshi etu aweni nikwiluka yuma yitwatela kwila kulonda tuyiluku hambidi. (Mukeŋa 3:40; Hagayi 1:5) Tunateli cheñi kulomba kudi Yehova kulonda yotwishinshiki, nikutukwashaku kwiluka nikwiteja yiluwa yetu. (Masamu 139:23, 24) Kubula kashinshi hikuzeya kwenzaña chakadi kwiluka nawa twatela kukumona neyi chakwimonañayi Tata yetu wamwiwulu. Yishimu 3:32 yahosha nawu: “Yehova wamonaña muntu waheña, nindi hichishimashima; ilaña yena wayaña hampuña nawakwakwoloka.” Yehova nateli kutukwasha kutoñojoka neyi chatoñojokañayi nikudimona neyi chatwimonañayi. Anukenu Pawulu wahosheli nindi: ‘Tunakeñi kushakama chakashinshi muyuma yejima.’ Hayinu mpinji hitukutwesha kwikala awaninaku, ilaña twafwilaña kwikala akashinshi.

KWIKALA AKASHINSHI MUCHISAKA

6. Muloñadi adisumbula chiyatela kwikala akashinshi kudi mukwawu, nawa wubanjinyi watondolwelañawu?

⁶ Kashinshi katela kwikala hichinjikijilu chakwilukilaku chisaka chawakwaKristu. Dichi, eyala namumbanda bayi adidimbañaku. Mumaluwi awakwaKristu himwatela kwikala yuma yatama, yawuzondu, yidi neyi kukenkama namuntu wabula kwikala mwinikweyi, kukwata wubwambu wakusweka haIntaneti, hela kuzatisha nyevulu yanzekesi munjila yidi yejimaku. AkwaKristu amakwawu anadiñiji muyililu yatama yamuchidiwu nakujinda mwinikwawu. Iku hikubula kashinshi. Talenu mazu aMwanta wakashinshi Davidi: “Hinashakami hamu nawantu amaswimbuku; hinukwiñila mwaduwu akwakujinda nsañuku.” (Masamu 26:4) Neyi mudi mumaluwi, chinjila kudiñija muyililu yikuyileñela mujindi mwinikwenu yuma yimunakwila!

7, 8. Yakutalilahwinyi yamuBayibolu yinateli kukwasha anyana kudiza kulema kwakwikala akashinshi?

⁷ Anvwali atela kuzatisha yakutalilahu yamuBayibolu hakudizisha anyanawu kulema kwakwikala akashinshi. Hakuhosha hansañu yawantu abulili kashinshi, kudi yakutalilahu yidi neyi yaAkani, weyili nawa wakeñeleña kusweka yuma yeyiliyi; Gehazi, watwambili hamuloña wakukeña kutambula mali; nawa Yudasi, weyili nikutwamba chikupu kulonda Yesu amujahi.—Yoshuwa 6:17-19; 7:11-25; 2 Anyanta 5:14-16, 20-27; Matewu 26:14, 15; Yowanu 12:6.

⁸ Neyi himukuhosha hansañu yawantu akashinshi, kudi yakutalilahu yidi neyi yaYakoba, walejeli anyanindi kufuntisha mali aweniwu munyifuku yawu muloña watoñojokeli nindi ayishilimu chakuluwukila; nsañu yaYefwata nimwanindi wamumbanda, walemesheli chikaninu chatata yindi hakudihana chikupu; ninsañu yaYesu, wadisolweli kwizaza dawambanji kulonda kushikija wuprofwetu nikukiña amabwambu jindi. (Kutachika 43:12; Ansompeshi 11:30-40; Yowanu 18:3-11) Iyi yakutalilahu yantesha yinateli kukwashaku anvwali kwiluka nsañu yayiwahi yekala Mwiizu daNzambi yinateli kuyikwasha kudizisha anyanawu kukeña nikwiluka kulema kwakwikala akashinshi.

9. Chumanyi chatela kutondolwelawu anvwali neyi anakukeña kudizisha anyanawu kwikala akashinshi, nawa muloñadi chiyatela kwila mwenimu?

⁹ Ntañishilu yamuchidiwu yayinka anvwali mudimu weneni. Kapostolu Pawulu wehwili nindi: “Eyi walejaña mukwenu, hiwadilejaña eyi awenuku, tahindi? Eyi washimunaña neyi wukombi watama, eyi aweni weyaña, tahindi?” (Aroma 2:21) Anvwali amakwawu aluwañeshaña anyanawu kuhitila mukuyidizisha kashinshi henohu wena hiyashinshikaku. Anateli kudiyiñisha neyi anona tuyuma twanyanya nakutwamba nawu “Ho, mwani enisitolu alandaña yuma yayivulu muloña eluka nawu antu eyaña” hela nawu “Nayikuleña hohu hamudiwu. Hosi nikukala.” Kwiya hikwiya, hichikweti muloña nachuma chineyiwuku, nawa kutwamba hikutwamba, hichikweti muloña wansañu yinakushimunawu chili kadizu kamu kakutwamba.a (Luka 16:10) Atwansi anyakalaña kwiluka nsañu yakutwamba nawa yinateli kuyiluwañesha chikupu. (Aefwesesa 6:4) Dichi, neyi adiza kashinshi kudi anvwali jawu, akakula chiwahi nakumulemesha Yehova mukanu kaayi katama.—Yishimu 22:6.

KWIKALA AKASHINSHI MUCHIPOMPELU

10. Kutalisha hakuhanjeka chiwahi nawakwetu akwakwitiya, yumanyi yitwatela kwanuka?

¹⁰ Kudikunda nawakwetu akwaKristu kwatwinkaña kukooleka kweneni kwakwikala akashinshi. Neyi chitwadizili muKapetulu 12, twatela kubabala munjila yitwazatishilañamu chawana chetu chakuhosha, sweje-e kudi amana kwetu niahela akuspiritu. Mpanji yitwahoshaña ifuku nifuku yinateli kubalumuka himatuñu, nikutwamba! Neyi tushimunaña mpanji yitunabuli kwiluka netu yalala, dikwila nawu tunakutandisha kutwamba, dichi twatela kuhemba kanwa ketu. (Yishimu 10:19) Munjila yikwawu, hadaha tuneluki netu oyu nsañu yalala, ilaña hichinayi mukwila nawu twatela kuyishimunaku. Chakutalilahu, hekwawu nsañu yeniyi hiyinatwikundamuku, hela hichikuwaha kuhoshahuku. (1 Atesalonika 4:11) Antu amakwawu ahakwilañaku winyi nawu dikashinshi, ilaña nhoshelu yetu yatela kwikala yayiwahi nawa yaluwi.—Akolose 4:6.

11, 12. (a) Indi antu akoñaña nyiloña yamaneni atoheshaña nyiloña yawu munjilanyi? (b) Kutwambanyi kwatiyakeshañayi Satana kutalisha hanshidi yeneni, nawa tunateli kukwishinda ñahi? (c) Tunateli kumwekesha ñahi kashinshi kukuloñesha kwaYehova?

¹¹ Kumwekesha kashinshi kudi anlomboli muchipompelu hichuma chalema nankashi. Amakwawu akoñaña nyiloña yamaneni atoheshaña nyiloña yawu kuhitila mukubuta nshidi yawu nikutwamba kudi aeluda muchipompelu neyi anayihuli. Antu amuchidiwu atachikaña kwenda munjila jiyedi, nakudifwikija neyi anakumukalakela Nzambi henohu anakwila nshidi yeneni. Chikufumamu, yililu yamuchidiwu yikukojeja chihandilu chamuntu kwikala chakutwamba hohu. (Masamu 12:2) Amakwawu niwena alejaña aeluda walala wantesha nakushiya yikuma yayeni. (Yililu 5:1-11) Yililu yamuchidiwu yafumaña mukukeñesha kutwamba kwatiyakeshañayi Satana.—Talenu chikasha hamafu 164-5, “Kutwamba kwaSatana Kutalisha haNshidi yaManeni.”

¹² Cheñi twatela kwikala akashinshi nakuloñesha kwaYehova neyi hitukwakula malwihu kuhitila mukusoneka. Chakutalilahu, neyi hitukusoneka mawola, twatela kubabala kuchina twakenda kasoneka akutwamba. Hohamu, neyi hitukusoneka yipapilu yakwihwilahu mudimu wampinji yejima, bayi tusoneka wunsahu wamakudi hansañu yachihandilu chetu hela yuma yikwawuku.—Yishimu 6:16-19.

13. Tunateli kumwekesha ñahi kashinshi neyi twazataña hela kuzatila akwetu akwakwitiya?

¹³ Kumwekesha kashinshi kudi akwetu akwakwitiya cheñi kwabombelamu nsañu jakulanda nakulandulula. Mpinji jikwawu, amana kwetu niahela akwaKristu atela kuzatila hamu munsañu jakulanda nakulandulula. Atela kubabala kuchina kubomba nsañwiyi nakudifukula kwadifukulañawu hamu Hetala daWanta hela mumudimu wakushimwina. Muwulunda wakulanda nakulandulula, wumu nateli kwikala mwinimudimu mukwawu weñijawu mudimu. Neyi twiñija amana kwetu hela ahela mudimu, twatela kuzata nawu chakashinshi, kuyifweta hampinji yatelela, kuyifweta mali ejima yitwayikanini, nikuyinka wuloku wayinkañawu hela wetejewa munshimbi. (1 Timotewu 5:18; Yakoba 5:1-4) Dichi neyi atwiñija mudimu kudi mana kwetu hela muhela, twatela kuzata chikupu kwesekeja nawufwetu watwinkañawu. (2 Atesalonika 3:10) Bayi tukuhwelela kutuzatisha munjila yadimena muloña wawulunda wetu wakuspirituku, neyi kwiji mwinimudimu chiña tuhu yakwinka mafuku akunooka, wuloku, niyuma yikwawu yabulaña kwinkawu ankoñi amakwawu.—Aefwesesa 6:5-8.

14. Neyi akwaKristu abombela kampani mudi wubanji wakujimbesha mali ilaña yinateli kwidisha mali amavulu, yumanyi yatela kwilawu, nawa muloñadi?

¹⁴ Indi neyi twabombela kampani mudi wubanji wakujimbesha mali ilaña yinateli kwidisha mali amavulu, hadaha kuswekeja mali muyuma hela kutambula loni? Bayibolu yahana lushimbi lwaluwahi: Mwatela kusoneka yuma yejima. Chakutalilahu, chelili Yeremiya nalandi dehi mpata, wasonekeli yipapilu yawunsahu yiyedi, kumesu awayinsahu, nawa wayihembeli chiwahi nindi yakazatika. (Yeremiya 32:9-12; talenu cheñi Kutachika 23:16-20.) Neyi mwabombela kampani nawakwenu akwakwitiya, kusoneka nsañu yejima chiwahi, nikufwachika, nikwikala nachipapilu chawunsahu hichinayi mukwila nawu himwayikuhwelela akwenuku. Ilaña, chatukwashañaku kubula kuleta mpami, nsonyi, nimapumba akojejaña yambu. AkwaKristu ejima anakuzatila hamu atela kwiluka nawu mudimu wawu wamabomba hiwunateli kukañesha kuwunda nikunuñañana kwamuchipompeluku.b—1 Akorinda 6:1-8.

KWIKALA AKASHINSHI MUDINU ITUÑA

15. Indi Yehova watiyaña ñahi nawupwapoki wamukulanda nakulandulula, nawa akwaKristu amonaña ñahi yililu yamuchidiwu?

¹⁵ MukwaKristu hatela kwikala nakashinshi muchipompelu hohuku. Pawulu wahosheli nindi: ‘Tunakeñi kushakama chakashinshi muyuma yejima.’ (Aheberu 13:18.) Neyi twazataña mudimu wakwituña, Nleñi yetu wakeñeshaña kumona kashinshi mudi etu. Mumukanda waYishimu hohu, asonekamu pezu yakutwamba mapampa kawana. (Yishimu 11:1; 16:11; 20:10, 23) Kunyima, hakulanda nakulandulula antu avulileña kuzatisha pezu niyesekelu kulonda eluki kulema kwayuma yinalanduwu nimali anazatishuwu. Akwakulandisha ayipwapoki, azatishileña yesekelu yiyedi nipezu yakutwamba yakudimba nachu akwakulanda.c Yehova wahela yililu yamuchidiwu! Hakwila tushakami mukukeña kwindi, twatela kutondolwela wupwapoki wejima wamukulanda nakulandulula.

16, 17. Jinjilanyi jawupwapoki jinavuli mukanu kaayi, nawa akwaKristu alala anafuukuluhu kwiladi?

¹⁶ Muloña Satana diyi nyuli wakanu kaayi, hitwatela kuhayama hakumona antu abula kashinshuku. Mpinji yejima tunateli kwikala mukweseka kwakubula kumwekesha kashinshi. Neyi antu hiyakusoneka yuma yelukawu hakwiñila mudimu, avula kutwamba nikulebumuna, nikulumbisha nsañu yamudimu wakoñeluwu nichiyakulukawu yitembi. Neyi antu anakusoneka mafomu akuyiteja kuya mwituña dacheñi, nyisonku, inshuwalansi, nimafomu amakwawu, avula kutwamba kulonda atambuli chuma chinakukeñawu. Akashikola amavulu atwambaña neyi hiyakusoneka kweseka, hela neyi hiyakusoneka yituñi niyileji yashikola, anateli kuya haIntaneti nakubuwa nsañu yikuwanawu, nakubalumuna nsañu yambala neyi kwiji yawu. Neyi antu anakuzata nawakwanshimbi afwa hamali, avula kuyinka maseleka kulonda atambuli jinakukeñawu. Twatela kukuhwelela yumiyi mukanu kaayi mudi “akwakudikeña, akwakufwila mali, . . . abulaña kukeña yayiwahi.”—2 Timotewu 3:1-5.

¹⁷ AkwaKristu alala afuukulahu kubula kwila yuma yamuchidiwu. Mpinji jikwawu chakalaña kwikala nakashinshi muloña antu elaña yuma muwupwapoki anakuhanda chiwahi nikuheta mukaayi kamakonu. (Masamu 73:1-8) Ilaña, akwaKristu anateli kuyanda nawuzweñi wamali muloña anakufwila kwikala akashinshi ‘muyuma yejima.’ Komana kudihana kwamuchidiwu kwekala kwalema? Eña! Muloñadi? Nkiswinyi yafumaña mukwikala akashinshi?

NKISU JAFUMAÑA MUKWIKALA AKASHINSHI

18. Muloñadi chichalemena kwikala wakashinshi?

¹⁸ Kwikala wakashinshi nawa walumbuluka hichuma chasweja kulema kubadika yuma yayivulu muchihandilu. (Talenu chikasha hefu 167, “Komana Nekala waKashinshi Mpinji Yejima?”) Ilukenu nenu, muntu wejima nateli kwikala nakashinshi. Kashinshi kenaka hikashindamena hayuma yimweluka, maheta, lubanji, chitachi chenu, hela yuma yikwawu yimukubula kutweshaku. Hela chochu, antu amavulu akañanyaña kwikala nejina dadiwahi. Hiheta. (Mika 7:2) Antu amakwawu anateli kuyiseha muloña wakashinshi kenu, ilaña amakwawu akuyilemesha, nawa akayikuhwelela nikuyishimeka. A Yinsahu jaYehova amavulu anachiwani neyi kashinshi kawu kanayikwashi kwikala namali. Neyi ankoñi abula kashinshi anayihañi, wena atwalekañahu nakuzata, hela kwiñila mudimu neyi kudi kukankila kweneni kwawankoñi akashinshi.

19. Indi kwikala nakashinshi kunateli kukwasha ñahi chinleji chetu niwubwambu wetu naYehova?

¹⁹ Hela chakwila yumiyi yakayimwekena hela nehi, mwakahetelamu chikupu neyi mwikala akashinshi. Mwakekala nankisu yakwikala nachinleji chitooka. Pawulu wasonekeli nindi: “Tuneluki chalala netu tukweti chinleji chamuchima chachiwahi.” (Aheberu 13:18) Cheñi, Tata yenu wamwiwulu wamonaña yililu yenu, nawa wakeña antu akashinshi. (Masamu 15:1, 2; Yishimu 22:1) Eña, kashinshi katukwashañaku kushakama mukukeña kwaNzambi, nawa kwosi wuloku wabadika iwuku. Twayenu tuhanjeki hansañu yinalondeluhu yadifwanaku: Yehova chamonañayi nyidimu.

[Tumazu twaheshina]

[Chikasha chidi hefu 164, 165]

KUTWAMBA KWASATANA KUTALISHA HANSHIDI YAMANENI

Kutalisha hanshidi yamaneni, Satana wakeñaña nindi mwiteji kutwamba kwafwana. Chamuzañalu, akwaKristu hiyayamba ‘maana aDiyabolu akudimbanaku.’ (Aefwesesa 6:11) Talenu nyichidi yisatu yakutwamba.

“Tunateli kusweka nshidi.” Kuhosha chalala, Yehova wamonaña yuma yonsu yitwakoñaña. “Yuma yejima yidi nzekesi, yidi hatooka kumesu ayena itwamba kadimona nindi.” (Aheberu 4:13) Chineli Yehova weluka walala nawa twakalumbulula kudi yena, bayi tudilunjikilahu nyiloña yikwawu kuhitila mukusweka nshidi jamaneni jakoñaña antu jinduku.—Talenu cheñi 2 Samweli 12:12.

“Aeluda hiyantu akukuhwelela wanyi, dichi bayi wuyileja nsañuku.” Mwanta watama Ahabi wamwilili Elija nindi: “Eyi chilumbu chami.” (1 Anyanta 21:20) Hakwikala kaprofwetu kaYehova muIsarela, Elija wadi kumukwasha Ahabi kulonda amwanakeni. Muchipompelu chawakwaKristu, Yesu wahana aeluda neyi ‘yamukunkulu mudi antu.’ (Aefwesesa 4:8) Hela chakwila awanina wanyi, aeluda “ahembaña [mawumi etu],” dikwila nawu, akamenaña chihandilu chetu chakuspiritu nichakumujimba. (Aheberu 13:17) Bayi neyi hiyayilumbu jetuku, hinjila yazatishañayi Yehova hakutukwashilamu.

“Mukukiña mukwenu neyi mumukwasha kusweka nshidi yindi.” Kuhosha mwalala, tunakumusha mukwakuvulumuna mukukala kweneni neyi tumukwasha kusweka nshidi yindi. Nshidi jamaneni hiyinjikijilu yayikatu yayeni yakuspiritu; kuyisweka chikwikala neyi munakusweka yinjikijilu yamaneni yayikatu kudi ndotolu wakuluka yitembi. (Yakoba 5:14, 15) Mukwakuvulumuna watela kutiya woma wakumubabesha; ilaña kubabesha hinjila yakumwekeshelamu kukeña kwaYehova, nawa kunateli kupulwisha wumi windi. (Yishimu 3:12; 4:13) Cheñi nawa, mukwakuvulumuna chatwalekahu hadaha wukuleta wufwayi kudi akwawu muchipompelu. Komana munakukeña kumukwasha kulonda yatandishi yililu yindi yatama yamuleñeleli kuvulumuna? (Alevi 5:1; 1 Timotewu 5:22) Zatenu nañovu jejima, mukwashi mukwakuvulumuna kuleja aeluda amuchipompelu nshidi yindi.

[Chikasha/Mwevulu wudi hefu 167]

KOMANA NEKALA WAKASHINSHI MPINJI YEJIMA?

Lushimbi: “Eyi Yehova, wukushakama mwitenti deyi hinyi? . . . Yowu wendaña choloka, wakoñaña mwaloña, wahoshaña nsañu yalala mumuchima windi.”—Masamu 15:1, 2.

Malwihu yimwatela kudihula

▪ Muloñadi chinatela kuhoshela chalala mpinji yejima?—Yishimu 6:16, 17.

▪ Nateli ‘kuleka ñahi kutwamba’ hakusoneka hamafomu, adi neyi yipapilu yashikola yakusonekahu kweseka, mafomu anyisonku, hela yipapilu yanfulumendi?—Aefwesesa 4:25; Isaya 28:15; Matewu 22:17-21; Aroma 13:1-7.

▪ Indi nhoshelu niyililu yami yinabombelumu ñahi hakwila niikali nkoñi wakashinshi?—Yishimu 11:1; Aefwesesa 4:28; Akolose 3:9, 10.

▪ Neyi nikala namuchima wakufwila mali, kukeña mali kunateli kuzeyesha ñahi wuswa wami wakuhosha nsañu yalala?—Masamu 37:21; 1 Timotewu 6:9, 10.

[Mwevulu wudi hefu 162]

Kwikala akashinshi kwatukwashaña kutondolwela yililu yikutuleñela kusweka nyiloña