APENDIKISI
Chahoshaña Bayibolu Kutalisha haKudiseña niKwambuka
Yehova wakeñaña adisumbula atwalekuhu kwikala ashinshika nachikaninu chamaluwi. Hakunuñañesha iyala watachi nimumbanda watachi mumaluwi, Yehova wahosheli nindi: ‘Iyala . . . watela kumukakela iñodindi; niwena akela mujimba wumu.’ Nkumininaku, Yesu Kristu wahosheli cheñi iyi nsañu nakubombelahu nindi: “Dichi anabombuwu kudi Nzambi, bayi ayambula kudi muntuku.” (Kutachika 2:24; Matewu 19:3-6) Dichi, Yehova niYesu amonaña maluwi kwikala mpanda yahaya nyaka yamanaña hohu neyi iyala hela mumbanda nafwi. (1 Akorinda 7:39) Chineli maluwi hikuloñesha kwajila, kudiseña bayi kwikala neyi hichiselaku. Nawa cheñi, Yehova wahela kudiseña kwabula muloña wamuNsona.—Malaki 2:15, 16.
Muloñanyi wamuNsona watela kudiseñelawu antu? Yehova wahela wuvumbi nikubajama. (Kutachika 39:9; 2 Samweli 11:26, 27; Masamu 51:4) Chalala, Yehova wamonaña wuvumbi nindi watama nawa dimuloña wetejayi wakudiseñelahu. (Neyi munakukeña kwiluka yuma yikwawu yekala muwuvumbi, talenu Kapetulu 9, parakalafu 7 hanalumbululawu nsañu yawuvumbi.) Muntu wunabuli kwila wuvumbi amwinka wuswa kudi Yehova wakufuukulahu neyi nakukeña kutwalekahu kushakama namwinikwindi wuneli wuvumbi hela kudiseña. (Matewu 19:9) Dichi neyi wamumaluwi wunabuli muloña yaseña mukwawu, kudiseña kwamuchidiwu Yehova hakuhelaku. Hela chochu, chipompelu chawakwaKristu hichakoleshaña muntu wudi wejima kudiseñaku. Mpinji yikwawu kudi yuma yikwawu yinateli kukojeja wamumaluwi wunabuli muloña kufuukulahu kutwalekahu kushakama namukwawu wuneli wuvumbi, sweje-e neyi mukwakuvulumuna nabalumuki mumuchima chikupu. Hela chikali chochu, antu akweti wuswa wamuNsona wakukeña kudiseña atela kudifuukwila aweni nikwiteja yuma yatama yejima yinateli kufumamu.—Aŋalija 6:5.
Munsañu yikwawu yakala, akwaKristu amakwawu afuukulañahu kwambuka hela kudiseña namukwawu wamumaluwi hela chakwila haneli wuvumbuku. Munsañu yamuchidiwu, Bayibolu yahosha nawu wukwambuka ‘yashakami kwindi chakubula kusumbuka cheñi; neyi nehi akundami cheñi.’ (1 Akorinda 7:11) MukwaKristu wamuchidiwu hadi nawuswa wakukeña muntu wacheñi kulonda yosumbuli hela kusumbuka cheñuku. (Matewu 5:32) Talenu yuma yantesha yakala yaleñelaña antu kwambuka.
Kuleka kukwasha chisaka mumushikila. Chisaka chinateli kwikala muwuzweñi chikupu, kukankila yuma yakudikwasha nachu, muloña iyala nakaani kuyinka yuma, henohu nateli kuyinka. Bayibolu yahosha nawu: “Muntu wukubula kukwasha . . . akwetala dindi, naleki mwaya kwitiya kwakukuhwelela, nabadiki wabula kwitiya kutama.” (1 Timotewu 5:8) Neyi muntu wamuchidiwu nakaani kuhimpa yililu yindi, iñodindi wudi nawuswa wakufuukulahu neyi nakukeña kukiña chihandilu chindi nichawanyanindi kuhitila mukwambuka kwamunshimbi. Hela chochu, aeluda akwaKristu atela kushaku kashinshi chikupu kunsañu yakwila nawu mukwaKristu wakaanaña kukwasha chisaka chindi. Neyi muntu yakaana kukwasha chisaka chindi anateli kumuhaña muchipompelu.
Kwetana. Muntu wamumaluwi wekala nalukambu wakojejaña chihandilu chamukwawu wamumaluwi niwumi windi kwikala muwubanji. Neyi mukwaKristu wudi muwulu wukweti lukambu, aeluda muchipompelu atela kutala haniyi nsañu neyi yalala. Kuzuña nimadombu hiyuma yatela kuhañilahu muntu muchipompelu.—Aŋalija 5:19-21.
Kusweja kukañesha wuswa wamuntu wakudifukula. Mpinji yejima, wamumaluwi nateli kukañesha mukwawu kubula kwila yuma yakundama kukudifukula kwalala hela kumukanjikija kufumpa nshimbi jaNzambi munjila jikwawu. Munsañu yamuchidiwu, muntu wudi mukukala nateli kufuukulahu neyi chakwila kwambuka diyi njila yimu hohu ‘yakwovwahilamu Nzambi neyi nyuli, bayi antuku.’—Yililu 5:29.
Munyiloña yejima yamuchidiwu yinabombelumu nsañu yakala yitunahoshuhu, kwosi muntu watela kushinjila muntu wunabuli muloña nindi ambuki hela atwalekuhu kushakama namukwawuku. Hela chakwila akwaKristu apama kuspiritu niaeluda anateli kuyikwasha nikuyifumba kushindamena haBayibolu, hiyakutwesha kwiluka nsañu yejima yamwekanaña hakachi keyala namumbandaku. Yehova hohu diyi wamonaña. Hela chochu, neyi mumbanda hela iyala mukwaKristu wukulumbisha nsañu yamwitala nindi yomisha mbaña kulonda yambuki namwinikwindi, dikwila nawu hanakulemesha Nzambi hela ntanjikilu yamaluwuku. Yehova welukaña kafuta kakwambukilamu, hela chakwila muntu wukukisweka chamuchidinyi. Eñañi, “yuma yejima yidi nzekesi, yidi hatooka kumesu ayena itwamba kadimona nindi.” (Aheberu 4:13) Ilaña neyi nsañu yawubanji yinatwalekuhu hampinji yayilehi, kwosi muntu watela kumuseha mukwaKristu wukufuukulahu kwambuka. Muloña, “wonsu wetu twamba kemana kwitanda daNzambi dakusompela.”—Aroma 14:10-12.