Komana Munakukeña Kwiluka Ñakwilu Yanawa Malwihu?

ÑAKWILU yamalwihu amuchidinyi? Ñakwilu yamalwihu asweja kulema ehulañawu antu. Hadaha mwadihulahu dehi malwihu adi neyi awa:

• Komana chalala Nzambi watwakamenaña?

• Indi njita nimakabi amba kamana?

• Chumanyi chatwimwekenaña neyi tunafwi?

• Komana kuduhu kuchiñeja kudi kwejima kwawa afu?

• Nateli kulomba munjilanyi hakwila nawu Nzambi yantiyi?

• Nateli kuwana ñahi muzañalu muchihandilu?

Kudihi kumunateli kuwana ñakwilu yanawa malwihu? Neyi muya mumalayibulali hela musitolu yanyikanda, munateli kuwana nyikanda yayivulu yinakuhosha nawu yinateli kuhana ñakwilu. Hela chochu, kakavulu nyikanda yeniyi yaditadikishaña. Nyikanda yikwawu yamwekanaña neyi yalema hanoyu mpinji ilaña chimwahita mafuku yasekaña nawa ayiwahishaña hela kusoneka nyikanda yacheñi.

Hela chochu, kudi mukanda wumu wukweti ñakwilu yalala. Himukanda wahosha hansañu yalala. Yesu Kristu walombeli kudi Nzambi nindi: “Mazu eyi hinsañu yalala.” (Yowanu 17:17) Makonu idi Izu twadiluka hamu neyi Bayibolu Yajila. Hamafu analondeluhu, mukwiluka nsañu yantesha hañakwilu yalala kutalisha hachuma chahosha Bayibolu hamalwihu adi hewulu.

Komana Chalala Nzambi Watwakamenaña?

CHALETESHAÑA KWIHULA ILU LWIHU: Twashakamaña mukaayi mwenzala wukatu nawa mwabula wuñaji. Nsakililu yayivulu yatañishaña nawu makabi yitwamonaña hikukeña kwaNzambi.

CHUMA CHATAÑISHAÑA BAYIBOLU: Nzambi hakojejaña chuma chatamaku. HaYoba 34:10 hahosha nawu, “Nzambi kwila chatama kwakulehi! Chinaweji kwila yakuheña kwakulehi!” Nzambi wukweti nkeñelu yayiwahi kumuchidi wamuntu. Dimuloña waweni watudizishililiyi Yesu kulomba nindi: “Tata yetu wekala mwiwulu, . . . Wanta weyi winzi. Muchima weyi awili hamaseki neyi chawilañawu mwiwulu.” (Matewu 6:9, 10) Nzambi watwakamenaña nankashi chakwila wazata nañovu hakwila nawu nkeñelu yindi yishikijewi chikupu.​—Yowanu 3:16.

Talenu cheñi Kutachika 1:26-28; Yakoba 1:13; ni 1 Petulu 5:6, 7.

Indi Njita niMakabi Amba Kamana?

CHALETESHAÑA KWIHULA ILU LWIHU: Njita yatwalekahu kujaha antu amavulu chikupu. Wejima wetu twatiyaña kutama namakabi anakumonawu antu.

CHUMA CHATAÑISHAÑA BAYIBOLU: Nzambi washimwineñahu dehi mpinji yakaletayi kuwunda mukaayi kejima. Muchiyulu chaWanta windi, nfulumendi yamwiwulu, antu “hiyakadiza nawa cheñi njitaku.” Ilaña “mpoku jawu akajichila matemwa.” (Isaya 2:4) Nzambi wakafumishahu kuheña kwejima nimakabi. Bayibolu yakana nawu: “[Nzambi] wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku. Yuma yakusambila [kushilahu kuheña nimakabi amakonu] yinahiti dehi.”—Chimwekeshu 21:3, 4.

Talenu cheñi Masamu 37:10, 11; 46:9; niMika 4:1-4.

Chumanyi Chatwimwekenaña Neyi Tunafwi?

CHALETESHAÑA KWIHULA ILU LWIHU: Nsakililu yayivulu yamukaayi yatañishaña nawu chuma chimu mukachi kamuntu chatwalekañahu kuhanda neyi muntu nafwi. Amakwawu akuhwelela nawu afu anateli kukatisha amomi hela nawu Nzambi wababeshaña antu atama kuhitila mukuyikabisha mukaluña kachinana.

CHUMA CHATAÑISHAÑA BAYIBOLU: Neyi muntu nafwi, hekalaña kwokuku. Mukwakutaŋisha 9:5 wahosha nindi, “Afu hiyeluka chumaku.” Chineli afu hiyanatweshi kwiluka, kutiya, hela kumona chuma chidi chejimaku, hiyanatweshi kukatisha chili kukwasha amomuku.​—Masamu 146:3, 4.

Talenu cheñi Kutachika 3:19, niMukwakutaŋisha 9:6, 10.

Komana Kuduhu Kuchiñeja Kudi Kwejima Kwawa Afu?

CHALETESHAÑA KWIHULA ILU LWIHU: Twakeñaña kuhanda, nawa twakeñaña kudiluñisha wumi nawantu yitwakeña. Nawa kwesekeja nachatuleñawu twafwilaña kumona cheñi ayetu yitwakeña afwa dehi.

CHUMA CHATAÑISHAÑA BAYIBOLU: Afu amavulu akayisañula. Yesu wakanini nindi ‘antu ejima adi mumajamu achanukishu . . . akedikamu.’ (Yowanu 5:28, 29) Kwesekeja nankeñelu yaNzambi yakusambila, owu akasañulawu hamu neyi antu akekala nakukooleka kwakushakama muparadisa hamaseki. (Luka 23:43) Ichi chikaninu chakumbidi chabombelamu kwikala namujimba wakola niwumi wahaya nyaka kudi antu ovwahila. Bayibolu yahosha nawu: “Akwakuloña akaswana ituña, akashakamamu haya nyaka.”​—Masamu 37:29.

Talenu cheñi Yoba 14:14, 15; Luka 7:11-17; niYililu 24:15.

Nateli Kulomba Munjilanyi Hakwila Nawu Nzambi Yantiyi?

CHALETESHAÑA KWIHULA ILU LWIHU: Antu amunsakililu yejima alombaña. Hela chochu, antu amavulu atoñojokaña nawu kulomba kwawu akwakulaña wanyi.

CHUMA CHATAÑISHAÑA BAYIBOLU: Yesu watudizishili kutondolwela kutenatena mazu wowamu mukulomba kwetu. Wahosheli nindi, “Chimukulomba, bayi muhituluka nakutenatena mwamukunkulwayi.” (Matewu 6:7) Neyi tunakukeña netu Nzambi yatiyi kulomba kwetu, twatela kulomba munjila yetejayi. Hakwila nawu twili mwenimu, twatela kudiza chekala nkeñelu yaNzambi nakulomba kwesekeja nankeñelu yindi. HaYowanu wamuChimu 5:14 halumbulula nawu: “Neyi tukulomba chuma chamwaya muchima [waNzambi], wukututiya.”

Talenu cheñi Masamu 65:2; Yowanu 14:6, 14; ni 1 Yowanu 3:22.

Nateli Kuwana Ñahi Muzañalu muChihandilu?

CHALETESHAÑA KWIHULA ILU LWIHU: Antu amavulu akuhwelela nawu mali, mpuhu, hela lubanji lwatela kuyiletela muzañalu. Dichi afwilaña yumiyi​—ilaña hiyawanaña muzañaluku.

CHUMA CHATAÑISHAÑA BAYIBOLU: Yesu wamwekesheli nsapi yaletaña muzañalu hakuhosha nindi: “Atuzweñi muspiritu anakooleki, muloña wanta wamwiwulu wunekali wawu.” (Matewu 5:3) Tunateli kuwana muzañalu walala hohu neyi tukeña chuma chasweja kulema​—nzala yetu yakuspiritu yakukeña nsañu yalala yakumwiluka Nzambi niyuma yatwifuukwilayi. Nsañu yalala yawanikaña muBayibolu. Kwiluka iyi nsañu yalala kunateli kutwikwasha kwiluka chuma chasweja kulema nichabula kulema. Kwiteja nsañu yalala yamuBayibolu kulombola nzatilu yetu niyuma yitwafuukulaña kwaleñelaña kwikala nachihandilu chachiwahi.​—Luka 11:28.

Talenu cheñi Yishimu 3:5, 6, 13-18 ni 1 Timotewu 6:9, 10.

Tunatali hohu hañakwilu yamuBayibolu yamalwihu atanu nakamu mukwihihisha. Munakukeña kwilukilahu nsañu yayivulu kabadika haniyi? Neyi mudi hakachi ‘kawatuzweñi muspiritu,’ chakadi nikujina mukukeñelahu nsañu yikwawu. Munateli kwihula malwihu amakwawu adi neyi awa: ‘Neyi Nzambi watwakamenaña, muloñadi chetejelayi makabi niyuma yatama kutwalekahu? Nateli kuwahisha ñahi chihandilu chachisaka chami?’ Bayibolu yakulaña chiwahi chikupu awa malwihu nimalwihu amakwawu amavulu.

Hela chochu, antu amavulu makonu ajinookaña kukeña ñakwilu muBayibolu. Ayimonaña neyi himukanda wukweti nsañu yayivulu yakala kutiyishisha mpinji yikwawu. Komana mukukeña wukwashu wakuwana ñakwilu muBayibolu? A Yinsahu jaYehova ahanaña yitwa yiyedi yatela kuyikwasha.

Chatachi mukanda wunakwila nawu Chumanyi Chacheni Chatañishaña Bayibolu? awusoneka kulonda kukwasha antu akweti nyidimu nankashi hakwila nawu eluki ñakwilu yayeni yamalwihu alema amuBayibolu. Chitwa chamuchiyedi hintanjikilu yakudiza Bayibolu hetala chawana. Chinsahu chaYehova washikahu kutañisha Bayibolu washakamaña muchituñilu chenu watela kwinzaña kwitala denu hela iluña dikwawu datelela nakuhanjeka nenu nsañu yamuBayibolu kapinji kantesha mulungu nimulungu chakubula kuyifwetesha. Yihita yawantu kunyeñumuka mukaayi kejima anahetelumu muniyi ntanjikilu. Amavulu anakunkululi namuzañalu nawu: “Nawani chalala!”

Kwosi iheta dasweja kuwaha ditwakawana. Nsañu yalala yamuBayibolu yatwilubulaña kunsañu yakupanda, kuluwankana, nikufwa mutentuku. Yatwinkaña kuchiñeja, nkeñelu nimuzañalu. Yesu wahosheli nindi: “Mukwiluka nsañu yalala, ninsañu yalala yikuyifumisha muwuduñu.”​—Yowanu 8:32.