“Tunaditeji Wejima Wetu”

1, 2. (a) Izanvu dalombolaña dachipompelu chawakaKristu amuyaaka nkulakaji yakusambila dinaakuli malwihwinyi? (b) Yumanyi yinayikwashi awa amanakwetu kulonda afuukuli chachiwahi?

IZANVU dawantu dinazañalali nankashi. Apostolu niakulumpi anenzali mukapeka muYerusalema anakuditala wumu namukwawu, anamoni nawu anafuukuli mwamuwahi chikupu. Iyi nsañu yakwalama yikukojeja tudihuli malwihu amavulu. Komana akaKristu achidi kulondela Nshimbi jaMosi? Komana hakwikala chaambu hakachi kawakaKristu aYudeya niafumini kunyuza?

² Awa amayala anakulombola anashinshiki hawunlomboli wawuvulu. Anashinshiki wuprofwetu wekala Mwizu daNzambi nawa anadimweni wunsahu wunakumwekesha nawu Yehova nakuyikiswila. Anashimuni yuma yinelukiwu. Wunsahu wunakojeji afuukuli muniyi njila wakuhayamisha. Spiritu yaYehova yinakuyilombola. Komana awa amayala akulondela munayilejiwu kudi spiritu?

3. Kuhanjeka hansañu yekala mumukanda waYilwilu kapetulu 15 kukutukwasha ñahi?

³ Chakeñekeleña kwikala nachikuhwelelu nikuhamuka hakwila muntu eteji munakulombola spiritu haniyi nsañu. Yuma yafuukwiliwu yakojejeli akulumpi jakwitiya kwawaYudeya kuyihelelaku. Nawa antu amakwawu muchipompelu akeñeleña nawu atwalekihu kulondela Nshimbi yaMosi akaanini mwafuukwiliwu. Izanvu dalombolaña delili ñahi? Twayenu tutali. Chitukuhanjekaña, tukumona njila yenzunwiniwu yalondelaña Izanvu Dalombolaña dawaYinsahu jaYehova makonu. Nawa diyi njila yitwatela kulondela neyi tunakukeña kufuukula hayuma nawa neyi tunamoni kukala muchihandilu chetu chawakaKristu.

“Dimu Mwaya niMazu Awatuprofwetu” (Yilwilu 15:13-21)

4, 5. Mavasinyi awuprofwetu ekala Mwizu daNzambi azatishiliyi Yakoba?

⁴ Kambanji Yakoba, mana kwaYesu wakuwanamu, wahosheli.a Chinamwekani neyi haniku kubulakana yena diyi wadiña cheyamani. Mazu indi ashimwini chuma chafuukwili izanvu dejima. Yakoba nayileji amayala anapompi nindi: “Simeyona nalumbululi chiwahi chikupu chabalumukililiyi Nzambi kudi antu akunyuza katachi nakunonamu antu ejina dindi. Imu dimu mwaya nimazu awaTuprofwetu.”—Yilw. 15:14, 15.

⁵ Mazu aSimeyona, hela Shimona Petulu, niwunsahu wahaniniwu aBaranaba niPawulu, chakadi nikujina anamwanukishi Yakoba nsona haniyi nsañu yinakuhanjekawu. (Yow. 14:26) Chinahoshiyi nindi “imu dimu mwaya nimazu awatuprofwetu,” Yakoba nashimuni mazu ekala haAmosi 9:11, 12. Iwu mukanda wekala hakachi kanyikanda yaNsona jachiHeberu yatenañawu nawu nyikanda “yawaTuprofwetu.” (Mat. 22:40; Yilw. 15:16-18) Yakoba chazatishiliyi mazu ekala haAmosi 9:11, 12 wazatishili mazu ambuka naekala mumukanda waAmosi makonu. Chinamwekani neyi Yakoba wazatishili mazu ekala muSeptuagint, chiGiriki chabalumwiniwu kufuma muNsona jachiHeberu.

6. Nsona yinayikwashi ñahi kwiluka chuma chakeñeleñayi Nzambi?

⁶ Kuhitila mudi kaprofwetu Amosi, Yehova washimwineñahu dehi nindi kukekala mpinji yakanyamunayi “chisolu chaDavidi,” dikwila nawu, chisaka chawanta chakashika nikuWanta wawuMesiya. (Ezek. 21:26, 27) Komana Yehova wakakeña hohu muza waIsarela wakumujimba? Inehi. Iwu wuprofwetu wabombelelihu nawu “antu akunyuza yejima” akayileta hamu nawa akekala “antu akatenawu nejina [daNzambi].” Anukenu nenu, Petulu washimwini nindi Nzambi “hamwekesheli chaambu hakachi kanetu [akaKristu aYudeya] nawenaku [akakwitiya afumini kunyuza], ilaña watookesheli nyichima yawu nachikuhwelelu.” (Yilw. 15:9) Munjila yikwawu, nkeñelu yaNzambi yakwila nawu aYudeya niantu akunyuza ekali answana aWanta. (Rom. 8:17; Efwe. 2:17-19) Kwosi nihamu muwuprofwetu hamwekeshaña nawu antu akunyuza etiyileña atela kuyalamisha kulonda ekali mukwitiya kwawaYudeyaku.

7, 8. Yakoba wahosheli nindidi? (b) Tunateli kutiyishisha ñahi mwatalishili Yakoba?

⁷ Kwesekeja nawunsahu wamuNsona niwunsahu watiyiliyi, Yakoba watwalekelihu kuhosha nindi: “Hela chochu, kufuukula kwami bayi neyi kwakukabisha antu akunyuza anakubalumukila kudi Nzambiku, ilaña tuyisonekeli kulonda atondolweleña yuma yinatamishiwu kudi ankishi, wuvumbi, anyama akushotomona nimashi. Muloña kufuma tuhu kushankulu, mumusumba nimusumba, mwadiña antu ashimwinineña kuzatisha nyikanda yaMosi, muloña atañileña muniyi nyikanda nezu datiyakana mumasinagogi hasabata-hisabata.”—Yilw. 15:19-21.

⁸ Yakoba, hadaha wadiña cheyamani, chahosheliyi nindi “kufuukula kwami,” komana chinakumwekesha nawu wadiña nawuswa hadi amanakwindi wakuyileja chatela kufuukulawu? Inehi! Mazu achiGiriki abalumunawu nawu “kufuukula kwami” anateli kuyihosha cheñi nawu “nasompi nami” hela “natoñojoki nami.” Yakoba hafuukwilili izanvu dejimaku, wadiña nakuhosha hachuma chatela kwilawu kushindamena hawunsahu watiyiliwu nichahosha Nsona haniyi nsañu.

9. Yumanyi yayiwahi yafumini muyitoñojoka yaYakoba?

⁹ Komana yitoñojoka yaleteliyi Yakoba yadiña chiwahi? Chakadi nikujina yadiña chiwahi, muloña apostolu niakulumpi, diyalondeleliwu. Yumanyi yayiwahi yafuminimu? Munjila yikwawu, yitoñojoka yaleteliyi yadi “kukabisha” wanyi hela “yadi kuyikalila wanyi” akaKristu afumini kunyuza kulondela yuma yashimwiniwu muNshimbi jaMosi. (Yilw. 15:19; New International Version) Nawa cheñi, iku kufuukula kwadi kumwekesha nawu alemesha yinleji yawakwawu akaKristu aYudeya, owu hadi yaaka yayivulu atiyili ‘Mosi, nakutaña muniyi nyikanda nezu datiyakana mumasinagogi hasabata-hisabata.’b (Yilw. 15:21) Chuma chafuukwiliwu chakolesheli wubwambu wadiña hakachi kawakaKristu aYudeya niafumini kunyuza. Nawa chasweja kulema, chumichi chamutiyishili Yehova Nzambi kuwaha muloña chesekeni nankeñelu yindi. Amanishili chiwahi iku kukala kwaletesheleña chipompelu chawantu jaNzambi chibuli kwikala mukuwunda nimukunuñañana! Chipompelu chawakaKristu makonu chatela kwimbujola ichi chakutalilahu chachiwahi!

10. Izanvu Dalombolaña makonu dembujolaña ñahi dadiñaku muyaaka nkulakaji yakusambila?

¹⁰ Neyi chashimunawu mukapetulu kanafumiku, kufwana izanvu dalombolaña damuyaaka nkulakaji yakusambila, Izanvu Dalombolaña dawaYinsahu jaYehova makonu dalombaña wukwashu kudi Yehova, Wabadika Mukuleña, nikudi Yesu Kristu, Mutu wachipompelu.c (1 Kor. 11:3) Elaña ñahi mwenimu? Albert D. Schroeder, wadiña membala waMwizanvu Dalombolaña kufuma mu 1974 kushika nimpinji yamanishiliyi mudimu windi wahamaseki muMarch 2006, walumbulwili nindi: “Izanvu Dalombolaña dabulakanaña Hachisatu, enzununaña nakulomba hakubulakana kwejima nawa alombaña spiritu yaYehova kulonda yiyilomboli. Azataña nañovu kulonda amoni nawu yuma yejima yinakoñiwu hela yinafuukuliwu anayili kwesekeja Nezu daNzambi Bayibolu.” Nawa, Milton G. Henschel, wakalakeli yaaka yayivulu Mwizanvu Dalombolaña nawa wamanishili mudimu windi wahamaseki muMarch 2003, wayihwili lwihu lwalema akashikola amanishileña Shikola yaGileyadi yanaamba 101. Wayihwili nindi: “Kudihu kuloñesha kukwawu hamaseki kukweti Izanvu Dalombolaña dashinshikaña Mwizu daNzambi, Bayibolu, henohu kanda difuukulihu hayuma yalema?” Tuneluki ñakwilu.

“Kutemesha Amayala Atondeliwu” (Yilwilu 15:22-29)

11. Izanvu dalombolaña dalejeli ñahi yipompelu mwafuukwiliwu?

¹¹ Izanvu dalombolaña muYerusalema daditejeli nawa dafuukwili hansañu yakwalama. Hela chochu, amanakwetu muyipompelu hakwila ekali anuñañana, ateleli kuyileja mwafuukwiliwu munjila yatiyakana, yayiwahi nawa yakuyikolesha. Elili ñahi mwenimu? Mukanda waYilwilu wahosha nawu: “Apostolu niakulumpi hamu nichipompelu chejima, afuukwilihu kutemesha amayala atondeliwu mukachi kawu kulonda ayi kuAntiyoki hamu naPawulu niBaranaba; atemesheliku Yudasi ateneneñawu nawu Barasaba niSilasi owu alombweleña anakwawu.” Kubombelahu, asonekeli mukanda nawa awutemesheli hamu nanawa amayala kulonda awutañi kuyipompelu yejima muAntiyoki, Siriya nimuSilisiya.—Yilw. 15:22-26.

12, 13. Yumanyi yafuminimu chelili atemeshi (a) Yudasi naSilasi? (b) mukanda kufuma kwizanvu dalombolaña?

¹² Yudasi niSilasi “alombweleña anakwawu” adiña ashikahu chikupu kwimenaku izanvu dalombolaña. Awa amayala awana atela kushimuna nsañu yinaletiwu, bayi neyi kwiji anakwakula lwihu lwakusambilaku, ilaña anakushimuna wunlomboli wezanvu dalombolaña. Kwinza kwanawa amayala atondeliwu kukukolesha wubwambu wadiña hakachi kawakaKristu aYudeya adiña muYerusalema niakaKristu akunyuza adiña kumaluña acheñi. Elili chiwahi hakutemesha awa amayala! Chumichi chaleteli kuwunda nikunuñañana hakachi kawantu jaNzambi.

¹³ Mukanda wasonekeliwu washimwini hohu wanyi yuma yatela kwilawu akaKristu akunyuza hansañu yakwalama, ilaña washimwini yuma yatela kwilawu kulonda atambwili wuselewa ninkisu jaYehova. Yikuma yadiña mumukanda yadiña nawu: “Spiritu yajila hamu ninetu, tunafuukulihu kubula kuyishilahu enu chiteli chikwawu, chiña hohu yumiyi yalema: muleki yuma yalambulañawu antu kudi ankishi, mashi, anyama akushotomona niwuvumbi. Neyi mukuleka chikupu yumiyi, mukwila chiwahi. Mushakameña chachiwahi!”—Yilw. 15:28, 29.

14. Antu jaYehova azataña ñahi mukunuñañana makonu mukaayi mwambokelamu antu?

¹⁴ Makonu aYinsahu jaYehova akubadika ha 8,000,000 muyipompelu kubadika ha 100,000 akuhwelela yuma yoyimu nawa ekala anuñañana mwahita kaayi kejima. Ekala ñahi mukunuñañana kwamuchidiwu, henohu antu makonu aluwankana nawa ambokelamu? Twekala anuñañana muloña wawunlomboli waYesu Kristu, Mutu wachipompelu, wahaninañayi mudi “nduñu wamaana nikashinshi,” dikwila nawu, Izanvu Dalombolaña. (Mat. 24:45-47) Kuwunda cheñi kwenzaña muloña amanakwetu mukaayi kejima ovwahilaña chakufuma hamuchima wunlomboli Wezanvu Dalombolaña.

“Azañaleli Nankashi Nanochu Chayikolesheliwu” (Yilwilu 15:30-35)

15, 16. Yipompelu yelilidi nawunlomboli wezanvu dalombolaña, nawa muloñadi?

¹⁵ Mukanda waYilwilu wunatwalekihu kutuleja nawu chelili awa amanakwetu atemesheliwu kufuma kuYerusalema ashiki muAntiyoki, “apompesheli hamu izanvu dawantu dejima nawa ayinkeli iwu mukanda.” Amanakwetu elili ñahi nawunlomboli watambwililiwu kufuma kwizanvu dalombolaña? “Chamanishiliwu kutaña iwu mukanda, azañaleli nankashi nanochu chayikolesheliwu.” (Yilw. 15:30, 31) Kubombelahu, Yudasi niSilasi “akolesheli nikukwasha anakwawu nampanji jajivulu.” Muniyi njila, awa amayala ayedi adiña “atuprofwetu,” neyi chadiña aBaranaba, Pawulu niantu amakwawu atenawu nawu atuprofwetu, ijina dazatishileñawu hakutena antu anakutiyakesha nkeñelu yaNzambi.—Yilw. 13:1; 15:32; Kwid. 7:1, 2.

¹⁶ Yehova wakiswilili iyi ntanjikilu yejima nawa yuma yafuminimu yaleteli muzañalu. Yumanyi yaletesheli hakwila mufumi yuma yayiwahi? Chakadi nikujina, wadiña hiwunlomboli wezanvu dalombolaña washikili hampinji yayiwahi, kushindamena Hezu daNzambi nihawunlomboli waspiritu yajila. Chuma chikwawu chaletesheli hikukeña ninjila mwalejeleliwu yipompelu mwafuukwiliwu.

17. Ankoñi añinza embujolaña ñahi Pawulu, Baranaba, Yudasi niSilasi?

¹⁷ Izanvu Dalombolaña dawaYinsahu jaYehova dalondelaña njila yoyimu makonu hakuhana wunlomboli kudi amanakwetu mukaayi kejima hampinji yatelela. Neyi anafuukulihu dehi atemeshaña oyu nsañu kuyipompelu munjila yatiyakana nawa yayiwahi. Njila yimu hikuzatisha ankoñi añinza. Awa amanakwetu adihana endelaña yipompelu nakushimuna wunlomboli nikuyikolesha. Kufwana Pawulu niBaranaba, ombaña mpinji yeneni nakushimwina, “nakutañisha nikushimwina nsañu yayiwahi yezu daYehova hamu nawantu amakwawu amavulu.” (Yilw. 15:35) Kufwana Yudasi niSilasi, akoleshaña “amanakwawu najimpanji jajivulu” nikuyikolesha.

18. Yumanyi yatela kwilañawu antu jaNzambi hakwila Yehova atwalekihu kuyikiswila?

¹⁸ Indi chipompelu? Yumanyi yinateli kukwasha yipompelu mukaayi kejima kwikala mukuwunda nikunuñañana mukanu kaayi kabula kunuñañana? Anukenu nenu kambanji Yakoba diyi wenjili nakusoneka nindi: “Maana afumaña mwiwulu, chatachi atooka, kuhiñahu awunda, amwovu muchima, anyakalaña kwovwahila . . . Kubombelahu, antu aletaña kuwunda, atumbaña mumpinji yakuwunda.” (Yak. 3:17, 18) Tuneluki wanyi neyi Yakoba wanukili kubulakana kwadiñaku muYerusalema hela nehi. Ilaña neyi chitunadizi mumukanda waYilwilu kapetulu 15, Yehova nateli hohu kutukiswila neyi twikala anuñañana nawa tunakuzatila hamu.

19, 20. (a) Yumanyi yinakumwekesha nawu kuwunda nikunuñañana kwadiña muchipompelu chamuAntiyoki? (b) Yumanyi yatwalekelihu kwila aPawulu naBaranaba?

¹⁹ Kuwunda nikunuñañana kwadiña muchipompelu chamuAntiyoki kwamwekeneña hatooka. Chatela azuñañesheña amanakwetu afumini kuYerusalema, amanakwetu muAntiyoki alemesheli chayendeleliwu kudi Yudasi naSilasi. Mukanda waYilwilu wahosha nawu: “Chelili anashakamiku dehi kwenoku mpinji yayilehi, anakwawu ayishiikili awa amayala nawu endi mukuwunda nakufunta kudi owu ayitemesheli,” dikwila nawu, afunti kuYerusalema.d (Yilw. 15:33) Tunakuhweleli chikupu netu amanakwetu muYerusalema niwena azañaleli chatiyiliwu yuma yayilejeliwu kudi awa amayala ayedi halwendu lwawu. Hamuloña waluwi lwaYehova lwasweja, atwesheli kuzata mudimu wawu namuzañalu!

²⁰ Pawulu naBaranaba, ashalili muAntiyoki, nawa azatili nañovu kulonda alomboli mudimu wakushimwina, neyi chelañawu ankoñi añinza makonu neyi anendeli yipompelu. (Yilw. 13:2, 3) Antu jaYehova adizaña yuma yayivulu chikupu kudi awa amayala! Hela chochu, Yehova watwelekelihu ñahi kuyikiswila awa akakushimwina ayedi adikita? Tukuhanjeka hachumichi mukapetulu kanalondelihu.