Nsañu Yayiwahi Hichumanyi?

1. Nsañwinyi yinafumi kudi Nzambi?

Nzambi wakeñaña nindi antu ashakameña namuzañalu hamaseki. Waleñeli iseki niyuma yejima yekalahu muloña wayikeña antu. Katataka yawahishi nshakaminu yawantu mukaayi kejima. Keña yafumishuhu yuma yakabishaña antu.​—Tañenu Yeremiya 29:11.

Nfulumendi jejima jinakañanyi kufumishahu madombu, yikatu nikufwa. Ilaña kudi nsañu yayiwahi. Katataka, Nzambi yajilumuni nfulumendi jawantu nakusinsishahu nfulumendi yindi. Antu akayuulañawu kudi iyi nfulumendi akashakama mukuwunda nawa hiyakakatañaku.​—Tañenu Isaya 25:8; 33:24; Danyeli 2:44.

2. Muloñadi chitwatela kushimwina nsañu yayiwahi swayi-swayi?

Yihuñu yakajiya hamaseki hohu neyi Nzambi nafumishuhu dehi antu atama. (Zefwaniya 2:3) Wakayifumishahu mpinjinyi? Izu daNzambi dashimwineñahu dehi yuma yinakumwesha antu kalula. Yuma yatama yinakumwekana yinakumwekesha nawu Nzambi keña yawahishi adinu ituña.​—Tañenu 2 Timotewu 3:1-5.

3. Twatela kwiladi?

Twatela kumwiluka Nzambi kuhitila Mwizu dindi, Bayibolu. Yidi neyi mukanda wunatusonekeliwu kudi tata yetu watukeña. Yatulejaña chakushakama namuzañalu chayinu mpinji nichitwakaluña nawumi haya nyaka hamaseki kumbidi. Eña, antu amakwawu akutiya kutama hakumona anakuyidizisha nsañu yidi muBayibolu. Ilaña, bayi twiteja atukañeshiku, muloña hitunakukeña kushalahu yuma yayiwahi yatushikayi Nzambiku.​—Tañenu Yishimu 29:25; Chimwekeshu 14:6, 7.