KUDIZA 8
Muloñadi Nzambi Chetejelayi Kutama niMakabi?
1. Indi kutama kwatachikili ñahi?
Nzambi weteja antu kudiyuula hadi mpinji yayilehi kulonda eluki nawu hiyakutwesha kumanisha kukala kunakumonawu antuku
Kutama kwatachikili hamaseki hampinji yatachikiliyi Satana kutwamba. Hatachi, Satana wadiña kañelu wawanina, ilaña ‘hemeni munsañu yalalaku.’ (Yowanu 8:44) Watachikili kwikala namuchima wakufwila kutambwila kulomba kwambala kwaNzambi hohu. Satana wamudimbili mumbanda watachi, Evu, nakumukanjikija kulonda yamwovwahili chatela yovwahili Nzambi. Adama niyena wadikañili naNzambi neyi chadikañiliyi Evu. Chuma cheliliyi Adama chaleteli makabi nikufwa.—Tañenu Kutachika 3:1-6, 19.
Satana chamulejeliyi Evu kudikaña naNzambi, watachikili kuzuñañesha chiyuulu chaNzambi hela chifulu chindi chaMukwakubadika. Antu amavulu anadibombi naSatana kuhitila mukukaana Nzambi kwikala Nyuuli yawu. Dichi, Satana nekali ‘nyuuli wampata yamunu mwishina.’—Tañenu Yowanu 14:30; 1 Yowanu 5:19.
2. Komana Nzambi waleñeli yileñaleña yabula kuwanina?
Nyidimu yaNzambi yejima yawanina. Antu niañelu aleñeliyi Nzambi adiñi nawuswa wakumwovwahila Nzambi chikupu. (Kuhituluka 32:4, 5) Nzambi watuleñeli nawuswa wakudifuukwila kwila yuma yayiwahi niyatama. Iwu wuswa watwinkaña kukooleka kwakumwekesha netu twamukeña Nzambi.—Tañenu Yakoba 1:13-15; 1 Yowanu 5:3.
3. Muloñadi Nzambi chetejelayi makabi kushika nikulelu?
Kufuma tuhu hampinji yakuvulumuna muEdeni, Yehova weteja antu kudikaña nachiyuulu chindi. Muloñadi? Kulonda yamwekeshi nindi kwosi chiyuulu chinateli kuhetelamu chakadi Nzambiku. (Mukwakutaŋisha 7:29; 8:9) Hanyima yayaaka 6,000 yachiyuulu chawantu, chinamwekani hatooka to-o nawu anakañanyi. Anyuuli awantu anakañanyi kumanisha njita, wubanji, wuñanji waheña hela yikatu.—Tañenu Yeremiya 10:23; Aroma 9:17.
Kwambukaku nachiyuulu chawantu, chiyuulu chaNzambi chakakwasha antu ejima achitejaña. (Isaya 48:17, 18) Yehova keña yajilumuni nfulumendi jawantu jejima. Antu etejaña chiyuulu chaNzambi hohu diwu akaswana iseki.—Isaya 11:9.—Tañenu Danyeli 2:44.
Talenu vidiyo Muloñadi Nzambi Chetejelayi Makabi?
4. Kukoolekanyi kutukweti hamuloña wakudiwunjika kwaNzambi?
Satana wahosheli nindi antu amukalakelaña Yehova hamuloña wayuma yayinkañayi. Kwila mumufwisha nachu nehi? Munateli! Kudiwunjika kwaNzambi kwatwinka kukooleka kulonda tumwekeshi neyi twakeña chiyuulu chaNzambi hela chawantu. Nshakaminu yetu diyamwekeshaña chiyuulu chitunakeñi.—Tañenu Yoba 1:8-12; Yishimu 27:11.
5. Tunateli kumwekesha ñahi netu Nzambi diyi Nyuuli yetu?
Yuma yitwelaña muchihandilu yamwekeshaña nawu tunakukeña Nzambi kwikala Nyuuli yetu hela nehi
Tunateli kumwekesha netu Nzambi hiNyuuli yetu kuhitila mukukeña nikwikala mukudifukula kwalala kwashindamena Hezu daNzambi, Bayibolu. (Yowanu 4:23) Tunateli kumukaana Satana kwikala nyuuli yetu neyi tubula kudiñija mujapolitiki nijinjita neyi chakaaniniyi Yesu.—Tañenu Yowanu 17:14.
Satana wazatishaña ñovu yindi kulonda yabalumuneña yuma yatama yimwekaneña neyi yayiwahi. Neyi tukaana yaaku yamuchidiwu amabwambu jetu amakwawu niantaña akutachika kutudiwula nikutudimbulula. (1 Petulu 4:3, 4) Dichi twatela kufuukulahu. Komana tukudikundaña nawantu amukeña Nzambi? Komana tukwovwahilaña nshimbi jindi jajiwahi? Neyi twila mwenimu, tukumwekesha netu Satana watwambili hakuhosha nindi neyi tumona yinzeñeli hitukutwesha kumwovwahila Nzambiku.—Tañenu 1 Akorinda 6:9, 10; 15:33.
Nzambi wakamanisha kutama niyihuñu muloña wayikeña antu. Antu amwekeshaña nawu akuhwelela chiyuulu chaNzambi akaheta wumi wahaya nyaaka hamaseki.—Tañenu Yowanu 3:16.