Twapompaña Hamu Kulonda Tudifukuli

1. Hampinji yapompeliwu atumbanji hamu, wukwashinyi wayinkeliwu, nawa muloñadi wuyakeñekeleleñawu iwu wukwashu?

CHELILI Yesu anamusañuli dehi, atumbanji twindi apompeli hamu nakudikolesha. Ilaña, apatili yenzelu muloña atiyileña ayilumbu jawu woma. Woma wayimanini chelili Yesu yemani mukachi kawu nakuyileja nindi: “Tambulenu spiritu yajila.” (Tañenu Yowanu 20:19-22.) Mukuhita kwampinji, atumbanji apompeli cheñi hamu nawa Yehova wayichililili spiritu yajila. Chumichi chayikolesheli chikupu kulonda azati chiwahi mudimu wakushimwina.—Yil. 2:1-7.

2. (a) Indi Yehova watukoleshaña ñahi, muloñadi wutwakeñelaña netu yatukolesheña? (b) Indi ntanjikilu yaKudifukula kwaChisaka yalemenadi? (Talenu tumazu twaheshina nichikasha chinakwila nawu “Kudifukula kwaChisaka,” hefu 175.)

² Ninetu twamonaña kukala kokumu neyi kwamweniwu amanakwetu amumafuku awapostolu. (1 Pet. 5:9) Mpinji yikwawu, etu amakwawu twachiinaña antu. Dichi twakeñaña Yehova yatukwasheña kulonda tuumiki mumudimu wakushimwina. (Efwes. 6:10) Yehova watukoleshaña kuhitila mukupompa kwetu. Chayinu mpinji tukweti kupompa kuyedi mumulungu, kupompa Kwawantu Amavulu niKudiza kwaKaposhi Kakutalila, nikupompa kwamukachi kamulungu kutwatenaña netu Chihandilu niMudimu Wanetu akwaKristu.a Twekala cheñi nakupompa kukwawu kuwana, kudi neyi kupompa kweluña, Kupompa kwañinza kuyedi niChanukishu chakufwa kwaKristu. Muloñadi wutwatela kupompa iku kupompa kwejima? Indi kupompa kwetu kwamakonu kwatachikili ñahi? Indi chitwamonaña kupompa chamwekeshaña nawu twekala nayilwilu yamuchidinyi?

Muloñadi Chitwatela Kupompela Hamu?

3, 4. Yehova wakeñañadi kudi antu jindi? Shimunenu yakutalilahu.

³ Kufuma tuhu kunyaaka, Yehova wakeñaña nindi antu jindi apompeña nakudifukula kudi yena. Chakutalilahu, mu 1513 B.C.E., Yehova wenkeli muza waIsarela Lushimbi lwindi, muluna Lushimbi wateneni niSabata yamulungu nimulungu hakwila nawu chisaka nichisaka chidifukuleña kudi yena kulonda ayidizisheña Lushimbi lwindi. (Kuhit. 5:12; 6:4-9) Neyi aIsarela ovwahila aluna lushimbi, yisaka yawu yakoleleña nawa muza wejima wadiña nawubwambu wakola naYehova. Neyi muza wukañanya kulondela aluna Lushimbi nakudiwula yuma yidi neyi kupompa mpinji yejima nakudifukula kudi Yehova, hiwadiña nawubwambu wawuwahi naNzambiku.—Lev. 10:11; 26:31-35; 2 Kushi. 36:20, 21.

⁴ Shinshikenu chakutalilahu chaYesu. Wadiña nachaaku chakuyaña kusinagogi mulungu nimulungu hefuku daSabata. (Luka 4:16) Atumbanji twindi niwena atwalekelihu nachaaku chakupompa mpinji yejima nihanyima yakwila Yesu nafwi dehi nawa anamusañuli, hela chakwila hiyadiña mulushimbi lwaSabataku. (Yil. 1:6, 12-14; 2:1-4; Rom. 14:5; Kol. 2:13, 14) Hakupompa kweniku, akwaKristu amumafuku awapostolu hiyadiña hohu nakuyidizisha nikuyikoleshaku ilaña alambwileña cheñi nyilambu yakumuhameka nachu Nzambi kuhitila mukulomba, kwakulahu nikwimba.—Kol. 3:16; Heb. 13:15.

5. Muloñadi chitwayilaña kukupompa kwetu kwamulungu nimulungu, kupompa kwanyanya nikwamaneni kwahachaaka? (Talenu cheñi chikasha chinakwila nawu “Kupompa Kwahachaaka Kwaleñelaña Antu jaNzambi Kunuñañana,” hefu 176.)

⁵ Chochimu, neyi tunayi kukupompa kwetu kwamulungu nimulungu, kupompa kwanyanya nikwamaneni kwahachaaka, twamwekeshaña netu twakwashaña Wanta waNzambi, atukoleshaña naspiritu yajila nikukolesha akwetu nayuma yitwahoshaña nachikuhwelelu. Sweje-e dinu, twekalaña nakukooleka kwakudifukula kudi Yehova kuhitila mukulomba, kwakulahu nikwimba. Kupompa kwetu anateli kukutanjika chaambukaku nachapompeleñawu aIsarela niakwaKristu amumafuku awapostolu, ilaña kupompa kwejima kwalema. Indi kupompa kwetu kwamakonu kwatachikili ñahi?

Kupompa Kwamulungu niMulungu Kwakoleshaña “Kumwekesha Kukeña Nikukoña Nyidimu Yayiwahi”

6, 7. (a) Indi kupompa kwetu kwekala nankeñelwinyi? (b) Indi kupompa kwambukili ñahi kwesekeja nezanvu dimu nadikwawu?

⁶ Manakwetu Charles Taze Russell chatachikiliyi kukeñakeña chalala chaMwizu daNzambi, wamweni nindi chalema kupompa hamu nawantu adiñi nachikonkwanyi chochimu. Mu 1879, Russell wasonekeli nindi: “Ami, hamu niakwetu amuPittsburgh, twatanjikili nikutwalekahu nezanvu dakudiza bayibolu hakukeñakeña jiNsona nikupompaña haMulungu haMulungu.” Antu atañileña magazini yaZion’s Watch Tower ayikolesheli kupompa hamu, nawa mu 1881, apompeleña muPittsburgh, Pennsylvania, haMulungu haMulungu nihaChisatu. Kaposhi Kakutalila kaNovember 1895 kahosheli nawu nkeñelu yaniku kupompa yadiña “yakudikunda hamu nawakwetu akwaKristu nakukeñañana” kulonda antu anapompi adikoleshi wumu namukwawu.—Tañenu Aheberu 10:24, 25.

⁷ Hayaaka yayivulu, ntanjikilu nimapapa apompeleñawu ambukili kwesekeja nachinatondi izanvu niizanvu dawaTudizi aBayibolu. Chakutalilahu, mukanda wasonekeli izanvu dimu damuUnited States wedishiliwu mu 1911 washimwini nawu: “Twapompaña kupompa kutanu mulungu nimulungu.” Apompeleña haChimu, haChiyedi, haChitanu kushika haMulungu apompeleña kayedi. Mukanda wukwawu wafumini muAfrica, wedishiliwu mu 1914 wahosheli nawu: “Twapompaña mapampa kayedi hakakweji, kutachika haChitanu nakushika haMulungu.” Hela chochu, mukuhita kwampinji atachikili kupompa neyi chitwapompaña makonu. Shinshikenu nsañu yantesha yinakushimuna chatachikili kupompa kudi kwejima.

8. Mpanji jawantu amavulu jadiña nanyitwinyi?

⁸ Kupompa kwaWantu Amavulu. Mu 1880, chimwahitili chaaka chimu kufuma hatachikili kwidisha Manakwetu Russell magazini yateneneñawu nawu Zion’s Watch Tower, watachikili kulondela chakutalilahu chaYesu kuhitila mumudimu wakwenda nakushimwina. (Luka 4:43) Dikwila nawu, Manakwetu Russell watachikili ntanjikilu yitwalondelaña haKupompa kwaWantu Amavulu makonu. Hakushimuna lwendu lwindi, Kaposhi Kakutalila kahosheli nawu Russell “wukuzañalala kuhosha mpanji yawantu amavulu yamutu wakwila nawu ‘Things pertaining to the kingdom of God,’” [“Yuma yakundama kuwanta waNzambi”]. Mu 1911, hanyima yakwila yipompelu anayituñi dehi mumatuña amavulu, yipompelu ayikolesheli nawu yitemesheña anhoshi ashikahu kuya kumaluña amakwawu amwiluña dawu nakuhosha mpanji 6 jadiñi nanyitu yashiyashana yidi neyi wunsompeshi niifutu danyiloña. Hanyima yampanji nimpanji, abidikileña ijina danhoshi nimutu wampanji yikahoshawu mumulungu wukalondelahu.

9. Kupompa kwaWantu Amavulu kunahimpiki ñahi hadi yaaka yayivulu, nawa chumanyi chimunateli kwila hakukwasha iku kupompa?

⁹ Mu 1945, Kaposhi Kakutalila kabidikili kutachika kwakampeni yakaayi kejima yaKupompa kwaWantu Amavulu kwadiñi najimpanji 8 jashindameneni haBayibolu jahosheleña “hakukala kwamunana mafuku kwakeñekeleña kuzatilahu swayi-swayi.” Hayaaka yayivulu, anhoshi atemesheleñawu hiyahosheleña hohu hajimpanji jaloñesheliyi nduñu washinshikaku, ilaña ahosheleña nijimpanji jaloñesheleñawu awenawu. Hela chochu, mu 1981, anhoshi ejima ayilejeli kuhosha jimpanji jawu kuzatisha maawutilayini ahaniniwu muyipompelu.b Kushika mu 1990, mumaawutilayini amakwawu izaza dahosheleñahu nikumwekesha yimwenu; Ilaña muchochina chaaka, nshimbi yahimpili nawa jimpanji jawantu amavulu ajihosheleña hohu kudi nhoshi. Kushika muJanuary 2008 jimpanji jawantu amavulu ajihimpili cheñi kufuma mujiminiti 45 nakujileta mujiminiti 30. Hela chakwila jiminiti ninjila jakuhaninamu ajihimpa, mpanji jahoshañawu chiwahi jatukwashaña kukuhwelela chikupu Izu daNzambi nikututañisha yuma yashiyashana yahosha haWanta waNzambi. (1 Tim. 4:13, 16) Komana mwatambikaña antu imwashiikaña kufuntilaku niabula kwikala aYinsahu neyena kulonda akenzi nakutiyilila mpanji yalema yashindamena haBayibolu?

10-12. (a) Kuhimpikanyi kwahimpawu haKudiza Kaposhi Kakutalila? (b) Mwatela kudihula malwihwinyi?

¹⁰ Kudiza kwaKaposhi Kakutalila. Mu 1922, amanakwetu ateneneñawu nawu pilgrims, ankoñi atemesheleñawu kudi aWatch Tower Society nakuhosha jimpanji muyipompelu nikulombola mudimu wakushimwina, ashimwini nawu kwikaleña kupompa kwakudiza Kaposhi Kakutalila. Atachikili kwila mwenimu nawa hakutachika, kudiza Kaposhi Kakutalila kwadiñiku mukachi kamulungu hela haMulungu.

¹¹ MuKaposhi Kakutalila kaJune 15, 1932, mwadiñi nshimbi jikwawu jahosheleña chatela kulombolawu kupompa kweniku. Ichi chibaaba chahosheli nawu manakwetu watela kulombola kudiza kwaKaposhi Kakutalila, kulondela njila yazatishileñawu haBeteli. Hampinji yakudiza, kuchinañamu kwadiñi amanakwetu asatu nawa adiñi nakudihimpashana hakutaña maparagilafu. Hayina mpinji muyibaaba himwadiñi malwihuku, dichi mukwakulombola wehwileña izaza kulonda dihuli malwihu hanoyu nsañu yinakudizawu. Kuhiñahu, wukuleja izaza kwakula malwihu anehuliwu. Neyi nakukeña kubombelahu nsañu yikwawu, mukwakulombola amulejeli kulumbulula “muwihi nawa chatiyakana.”

¹² Hakusambila, chipompelu nichipompelu achitejeleña kutonda magazini yakeñeleña kudiza antu amavulu. Ilaña Kaposhi Kakutalila kaApril 15, 1933, kahosheli nawu yipompelu yejima yateleleli kuzatisha magazini yedikileña. Mu 1937, ayilejeli cheñi nawu atela kudiza haMulungu. MuKaposhi Kakutalila kaOctober 1, 1942, ashimwinimu cheñi wunlomboli wukwawu wahosheli hanjila yakulombwelamu magazini neyi yitwazatishaña nimakonu. Tachi, magazini yabidikili nawu malwihu akumwekenaña heshina defu muchibaaba chakudizamu nawa malwihu wenawu diwu atela kuzatishawu. Yashimwini cheñi nawu kudiza magazini kwateleleli kwikala ora yimu hohu. Iyi magazini yakolesheli cheñi antu akulañahu nawu atela kwakula “mumazu awu aweni” kubadika kutaña chibalu chaparagilafu. Kudiza Kaposhi Kakutalila diyi njila yazatishañayi nduñu washinshika hakutwinka yakuda yakoleshaña wubwambu wetu naNzambi hampinji yatelela. (Mat. 24:45) Twatela kudihula netu: ‘Komana naloñeshaña chiwahi Kaposhi Kakutalila mulungu nimulungu? Nawa nafwilaña kwakulahu neyi natweshi?’

13, 14. Indi ntanjikilu yaKudiza Bayibolu haChipompelu yatachikili ñahi, nawa yumanyi yimwatiyaña kuwaha haniku kupompa?

¹³ Kudiza Bayibolu haChipompelu. Muyaaka yamuma 1890, hanyima yakwidisha mavolyumu ateneneñawu nawu Millennial Dawn Manakwetu H. N. Rahn, Kadizi waBayibolu washakamineña mumusumba waMaryland, U.S.A., washimwini nindi chikuwaha neyi kwikala kudiza Bayibolu ‘kwaDawn Circles.’ Hakusambila, apompeleleña hohu mumatala muloña akeñeleña kwiluka chiyakudizañawu kuzatisha iyi njila. Ilaña muSeptember 1895, kupompa kwaDawn Circles kwendeleña chiwahi mumbaka jajivulu muUnited States. Kaposhi Kakutalila kamukana kakweji kahosheli nawu atudizi aBayibolu ejima atela kupompaña. Kahosheli nawu manakwetu walombweleña magazini watela kwikala watañaña chiwahi. Wateleleli kutaña mukuku wamazu nakuhembelela izaza kulonda dihoshihu. Hanyima yakutaña mukuku wamazu muparagilafu nikuhanjekahu, wateleleli kutaña jinsona jadiñamu. Hakumanisha kapetulu antu ejima mwizaza ateleleli kulumbulula chantesha yuma yinadiziwu.

¹⁴ Ijina daniku kupompa adihimpileña kapampa kakavulu. Atachikili kukwitena nawu Berean Circles [Kupompa kwaBereya] kwaKudiza Bayibolu, muloña wawaBereya amumafuku awapostolu atalatalileña muNsona. (Yil. 17:11) Mukuhita kwampinji, idi ijina adihimpili nakutachika kuditena nawu Kudiza kwaMukanda haChipompelu. Chayinu mpinji iku kupompa akwitenaña nawu Kudiza Bayibolu haChipompelu nawa chipompelu chejima chapompelaña hamu Hetala daWanta chatela apompeleña mumazanvu mumatala. Hayaaka yayivulu yinahitihu, azatishileña nyikanda, mabuloshuwa niyibaaba yaKaposhi Kakutalila yambokamboka hakudiza. Kufuma tuhu kunyaaka, antu ejima apompeleña ayikolesheleña kwakulahu hampinji yakupompa. Iku kupompa kwatukwashaña chikupu kwiluka Bayibolu. Komana mwaloñeshaña mpinji yejima iku kupompa nikwakulahu hakumina ñovu jenu?

15. Indi Shikola Yawakwakushimwina ayiloñesheladi?

¹⁵ Shikola Yawakwakushimwina. Carey Barber, wazatilileña kukasanji keneni kekala muBrooklyn, New York, wahosheli nindi, “Hawufuku wahaChimu haFebruary 16, 1942, amayala ejima amuchisaka chaBeteli muBrooklyn ayilejeli nawu asonekeshi mushikola yatachikili kutenawu nawu Shikola Yawakwakushimwina.” Manakwetu Barber, wekalili membala Wezanvu Dalombolaña, walumbulwili iyi shikola nindi “hichuma chimu chalema nankashi chamwekana hakachi kawantu jaYehova munanu mafuku.” Iyi shikola yakwashili chikupu amanakwetu kwikala antañishi niakwakushimwina ashikahu chakwila kumatachikilu achaaka cha 1943, mukanda wateneneña nawu Course in Theocratic Ministry atachikili kuwuzatisha muyipompelu mukaayi kejima. Kaposhi Kakutalila kaJune 1, 1943, kahosheli nawu Shikola Yawakwakushimwina ayiloñesheli kulonda yikwasheña antu jaNzambi “kudidizisha aweni kwikala ayinsahu ashikahu kutiyakesha nsañu yaWanta.”—2 Tim. 2:15.

16, 17. Komana Shikola Yawakwakushimwina yadizishaña hohu kwiluka kutañisha? Lumbululenu.

¹⁶ Hakutachika, amavulu atiyileña kukala chikupu kuhosha hakachi kawantu. Clayton Woodworth, Jr., wukweti atata yindi ashiliwu mukaleya hamu naManakwetu Rutherford niamakwawu mu 1918, wanukili chatiyiliyi mpinji yatachi yasonekesheliyi mushikola mu 1943 nindi, “Chankalilileña chikupu hakuhosha jimpanji. Idimi dami datiyakeneña kulema, mukanwa mwomini mazeñi chawu, nawa izu dami dadiña nakuzaala nikujojomena.” Chelili Clayton yekali ntañishi washikahu, wadiñi nakukooleka kwakuvulu kwakuhosha jimpanji. Iyi shikola yamudizishili yuma yayivulu kubadika hohu njila jakutañishilamu. Yamudizishili kulema kwakwikala wadizoza nikumushindamena Yehova. Wahosheli nindi, “nhoshi yomweni halemaku. Ilaña kuloñesha chiwahi nikumushindamena Yehova dichi chuma chalema nawa chumichi chikuleñela antu kutiya nakuhetelamu.”

¹⁷ Mu 1959, ahela niwena ayilejeli kusonekesha mushikola. Muhela Edna Bauer wanukaña mpinji yabidikiliwu hakupompa nindi, “Inakwanuka nsañwiyi chiyazañalesheli ahela. Hayina mpinji ekalili nakukooleka kwakuvulu.” Chili mudi iyala hela mumbanda, komana mwasonekesha muShikola Yawakwakushimwina kulonda ayidizishi kudi Yehova?—Tañenu Isaya 54:13.

18, 19. (a) Hakupompa kwaMudimu twembujolaña chakutalilahu chanyi? (b) Muloñadi chitwembilaña hakupompa kwetu? (Talenu chikasha chinakwila nawu “Kwimba Nakutiyakesha Chalala.”)

¹⁸ Kupompa kwaMudimu. Kutachika tuhu mu 1919, kwadiñi ntanjikilu yakupompa kwakuya mumudimu wamwiha. Hayina mpinji bayi neyi antu ejima muchipompelu ayileña kuniku kupompaku, chiña hohu antu ahanineña nyikanda. Ilaña kushika muchaaka cha 1923, apompeleña Kupompa kwaMudimu kamu hakakweji nawa ejima muchipompelu enjileña nakupompa. Kushika mu 1928, yipompelu ayilejeli nawu yipompeña Kupompa kwaMudimu mulungu nimulungu, mu 1935, Kaposhi Kakutalila kakolesheli yipompelu yejima nawu haKupompa kwaMudimu atela kuzatisha nsañu yedishileñawu muDirector (wuyatachikili kutena nawu Informant kuhiñahu nawu Mudimu Wetu waWanta). Iku kupompa kwekalili handandanda yachipompelu nichipompelu.

¹⁹ Hakupompa kwaMudimu twelaña neyi cheliliyi Kristu, atulejaña njila jajiwahi jakulondela hampinji yakushimwina. (Mat. 10:5-13) Neyi mwatambwilaña kopi yaChihandilu niMudimu Wanetu akwaKristu, komana mwayitañaña nikuzatisha njila jekalañamu hampinji yimunakushimwina?

Kupompa Kwalema Nankashi Kwahachaaka

20-22. (a) Muloñadi chitwanakanaña kufwa kwaYesu? (b) Mwahetelañamu ñahi mukupompa kwaChanukishu kwahachaaka?

²⁰ Yesu wayilejeli atumbanji twindi kwanakanaña kufwa kwindi kushika nimpinji yakenzayi. Kufwana chidika chaChipandakenu, Chanukishu chakufwa kwaKristu chekalañaku hachaaka. (1 Kor. 11:23-26) Antu amavulu enzaña kunichi chidika chaaka nichaaka. Ichi chidika chayanukishaña awayishewa kukooleka kukwetiwu kwakwikala answana amuWanta. (Rom. 8:17) Anyikoku acheñi niwena amwekeshaña nawu alemesha nikwovwahila Mwanta waWanta waNzambi.—Yow. 10:16.

²¹ Manakwetu Russell niakwawu elukili kulema kwakwanakana Kuda kwaMwanta kwaMelela nawa elukili nawu atela kukwanakana hohu kamu hachaaka. Kaposhi Kakutalila kaApril 1880 kahosheli nawu: “Hayaaka yayivulu etu amavulu kunu kuPittsburgh twanakanaña Chipandakenu [Chanukishu] nikuda yifwikija yemenañaku mujimba waMwanta nimashi.” Hashimbwili wanyi atachikili kupompa kwamaneni nawa hakupompa kweniku adiñi nakwanakana Chanukishu. Mu 1889 diyi mpinji yatachi yahembeliwu chileji chakupompa kwamuchidiwu kwenjili antu akushika ku 225 nawa antu 22 apapatisheweli.

²² Makonu Chanukishu hichekalañaku hampinji yakupompa kwamanenuku, ilaña twatambikaña antu mumaluña mutwashakamaña mwejima kwinza nakupompa nanetu kuMatala aWanta hela matala akusonkela. Mu 2013, antu akubadika ha 19 miliyoni enjili nakwanakana kufwa kwaYesu. Tukweti kukooleka kwakuya kuChanukishu nikutambika akwetu kwinza nakupompa hamu nanetu hanidi ifuku dalema. Komana watambikaña antu amavulu neyena hachaaka nichaaka kulonda akenzi kuChanukishu?

Komana Twalemesha Kupompa?

23. Indi kupompa kwetu mwakumonaña ñahi?

²³ Ambuña aYehova ashinshika hiyamonaña lushimbi lwakupompela hamu nawu lwakalaku. (Heb. 10:24, 25; 1 Yow. 5:3) Chakutalilahu, Mwanta David wakeñeli nankashi kuya kwitala daYehova nakudifukula. (Mas. 27:4) Sweje-e dinu, watiyileña kuwaha kwila mwenimu hamu nawantu amukeña Nzambi. (Mas. 35:18) Toñojokenu cheñi hadi Yesu. Hela chakwila wachidiña kansi, wakeñeli nankashi kwikala mwiitala daTata yindi dakudifukwila.—Luka 2:41-49.

24. Kukoolekanyi kutwekalañanaku neyi tunayi kukupompa?

²⁴ Neyi tunayi nakupompa, twamwekeshaña netu twamukeña Yehova nawa twafwilaña kudikolesha nawakwetu. Twamwekeshaña netu twakeñaña kutudizisha kulonda tushakameña neyi enimbu amuWanta waNzambi muloña hakupompa kwetu, kupompa kwamaneni nikwanyanya dihu hatudizishilañawu. Kubombelahu, hakupompa, atudizishaña kulonda tuumikeña hakuzata mudimu wetu walema hanyidimu yinakuzata Wanta waNzambi makonu, dikwila nawu kwilisha nikudizisha atumbanji aMwanta Yesu Kristu. (Tañenu Matewu 28:19, 20.) Chakadi nikujina, chitwafwilaña kupompela hamu, chamwekeshaña nawu twamonaña Wanta waNzambi hamuntu-hamuntu netu walala. Dichi mpinji yejima tulemesheña kupompa kwetu.