Kwafumaña Mali Akukwasha Nachu Nyidimu yaWanta

1, 2. (a) Manakwetu Russell wakwili ñahi mukulumpi wachechi wakeñeleña kwiluka chazatileñawu aTudizi aBayibolu nyidimu yawu? (b) Tukushinshikadi mukanu kapetulu?

IFUKU dimu Manakwetu Charles T. Russell amwendeleli kudi mukulumpi wamuChechi yaReformed wakeñeleña kwiluka chazatileñawu aTudizi aBayibolu nyidimu yawu.

Manakwetu Russell wamulejeli nindi, “Hitwalombalombaña maliku.”

Mukulumpi wachechi wamwihwili nindi, “Mwafumishaña kudihi mali?”

Russell wakwili nindi, “Neyi nikuleja walala wukwiteja wanyi. Kukupompa kwetu hiyahitishañamu yeña kulonda antu enzaña ahaneña maliku. Ilaña, eluka nawu kwakeñekaña mali akuzatisha. Adihulaña nawu, ‘Idi itala dakeñekaña mali . . . Nateli kuhaña ñahi mali akuzatisha kunidi itala?’”

Mukulumpi wachechi wetejeli wanyi chahosheleñayi Manakwetu Russell.

Russell watwalekelihu nindi “Inakukuleja walala. Añihulaña ilu lwihu nawu, ‘Nateli kuhanaku ñahi mali akuzatisha kunidi itala?’ Neyi muntu wudi namali, wafwilaña kuyizatisha mumudimu waMwanta. Neyi wudana mali, muloñadi wutwatelela kumukanjikijila netu chiña yahani?”a

² Manakwetu Russell wahosheleña “walala.” Kutachika tuhu kunyaka, antu jaNzambi ayiluka nawu ahanaña yawaana chakufuma hanyichima hakukwasha kudifukula kwalala. Mukanu kapetulu tukushinshika yakutalilahu yamuNsona yawantu adiña nakuhana yawaana niamakonu. Chitukushinshika chinakukwashawu nyidimu yaWanta munsañu yamali, wejima wetu twatela kudihula netu, ‘Nateli kumwekesha ñahi nami inakukwasha Wanta?’

‘Yowu Wukweti Muchima Wakuhana Yaleti Chawaana’

3, 4. (a) Yehova wayikuhwelela ñahi akwakudifukula indi? (b) A Isarela akwashili ñahi mudimu wakutuña tabanaka?

³ Yehova wayikuhwelela chikupu akwakudifukula indi alala. Weluka nindi neyi ekala nakukooleka kwakuhana, amwekeshaña nawu amukeña Nzambi kuhitila mukuhana yawaana yakufuma hanyichima. Shinshikenu yakutalilahu yiyedi yahosha hadi aIsarela chahanineñawu yawaana.

⁴ Hanyima yakuyifumisha aIsarela muEjipitu, Yehova wayilejeli kutuña itenti hela netu tabanaka yakudifukwilamu. Iyi tabanaka yakeñekeleña yuma yayivulu yakutuña nachu. Yehova wamulejeli Mosi nindi yayileji antu kulonda ahani yuma yakukwasha iwu mudimu nindi: ‘Yowu wukweti muchima wakuhana yaleti chawana, himulambu waYehova.’ (Kwid. 35:5) Indi antu ayandishiluwu chikupu ‘muwuduñu nanyidimu yayikalakesheluwu,’ elili ñahi? (Kwid. 1:14) Ahanini chikupu yawaana yidi neyi wuru, siliva niyuma yalema chakadi kuyikanjikija, yafumishiluwu kudi ankaka jawu muEjipitu. (Kwid. 12:35, 36) AIsarela aleteli yuma yayivulu kubadika yakeñekeleña chakwila “ayilekesheli antu kuleta cheñi yuma.”—Kwid. 36:4-7.

5. A Isarela elili ñahi chayilejeliwu kudi Davidi kuhana yawaana yakutuña nachu tembeli?

⁵ Chimwahitili yaaka 475, Davidi niyena wahanini ‘iheta dindi’ hakukwasha mudimu wakutuña tembeli, yekalili iluña datachi dakudifukwilamu hanu hamaseki. Kuhiñahu, wayilejeli akwawu aIsarela kuhana nakuyihula nindi: “Wukulambula chakutiya kuwaha, adijiliki lelu ekali waYehova, hinyi?” Antu akwili kuhitila ‘mukumulambula Yehova namuchima walala chikupu chakutiya kuwaha.’ (1 Kushi. 29:3-9) Davidi welukili nindi yuma yejima yahaniniwu yafumini kudi Yehova, dichi walombeli nindi: “Yuma yejima yafuma kudeyi, tunakwinki yafuma kuchikasa cheyeyi aweni.”—1 Kushi. 29:14.

6. Muloñadi chitwakeñelaña mali kulonda tuzati nyidimu yaWanta makonu, nawa malwihwinyi itwatela kudihula?

⁶ Mosi naDavidi hiyakanjikijili antu jaNzambi nawu ahaniku. Ilaña antu ahanini chakufuma kunyichima yawu. Indochu makonu? Tweluka netu mudimu wunakuzata Wanta waNzambi wakeñekaña mali. Kwakeñekaña mali amavulu hakwila nawu edishi nikuhana jiBayibolu ninyikanda yashindamena haBayibolu, kutuña nikuwahisha maluña akupompelamu nitusanji twanyitayi nikukwasha akwetu akwakwitiya adi mukukala. Dichi tunateli kudihula netu: Indi mali afumaña kudihi? Komana atumbanji twaMwanta atela kuyikanjikija hakwila ahani?

“Hitwakalomba Hela Kulembelela Antu Netu Atukwashiku”

7, 8. Muloñadi antu jaYehova chabulilañawu kulombalomba hela kulembelela amakwawu kulonda ayinki mali?

⁷ Manakwetu Russell nialunda nindi akaanini kuzatisha tufuta twakukeñelamu mali twavula kwilawu mumaChechi aKristendomu. Mumagazini yamuchiyedi yaKaposhi Kakutalila, hamutu wakwila nawu “Do You Want ‘Zion’s Watch Tower’?” [Munakukeña magazini yaZion’s Watch Tower?] Russell wahosheli nindi: “Tweluka netu YEHOVA diyi wakwashaña mudimu wakusoneka magazini ‘yaZion’s Watch Tower’, chineli diyi wakwashaña iwu mudimu, hitwamba kalombalomba hela kulembelela antu netu atukwashiku. Neyi Yena wahosha nindi: ‘Mwenisiliva niwuru yamumapidi yejima yami,’ yakañanya kuhana mali akeñekaña, tukwiluka netu himpinji yakuleka kusoneka iyi magazini.” (Hag. 2:7-9) Munahiti dehi yaaka kubadika ha 130, aka Kaposhi Kakutalila nikuloñesha kwasonekaña iyi magazini kuchidi kutwalekahu.

⁸ Antu jaYehova hiyalombalombaña maliku. Hiyahitishañamu yeña hela kutemesha nyikanda yakulomba nachu maliku. Hela kuzatisha njila jikwawu javula kuzatishawu mumachechi jakuwaninamu maliku. Elaña neyi chochu chahosheli Kaposhi Kakutalila kunyaka nawu: “Twamona netu kulombalomba mali neyi chelaña machechi amakwawu nakuyizatisha mumudimu waMwanta hichatelelaku . . . Tunashinshikimu netu kuzatisha ijina daMwanta hakulombalombelamu mali hichuma chatama nawa Mwanta hachikeñaku, hakiswilaña muntu wunakuhana hela nyidimu yazatañawu kuzatisha mali wenawaku.”b

“Muntu hiMuntu Yeli Kwesekeja Nachinafuukuliyi muMuchima Windi”

9, 10. Twahaninañadi yawaana yakudikeñela?

⁹ Hakwikala antu akayuulañawu kudi Wanta, hitwahanaña muloña wakutukanjikijaku. Ilaña twahanaña mali etu nimaheta amakwawu chakufuma hamuchima hakukwasha nyidimu yaWanta. Muloñadi wutwahaninaña chakufuma hamuchima? Shinshikenu yuma yisatu.

¹⁰ Chatachi, twahanaña yawaana muloña twamukeña Yehova nawa twafwilaña kwila “yuma yamutiyishaña kuwaha.” (1 Yow. 3:22) Yehova watiyaña kuwaha neyi mukwakudifukula yahanaña chakufuma hamuchima. Tushinshikenu mazu ahosheli kapostolu Pawulu hadi akwaKristu chiyatela kuhanawu. (Tañenu 2 Akorinda 9:7.) MukwaKristu walala hashintajalaña hela kumukanjikija kuhanaku. Ilaña, wahanaña muloña ‘nafuukuli mumuchima windi’ kwila mwenimu.c Dikwila nawu wahanaña hanyima yakutoñojoka yuma yinakukeñeka nimali atela kuhanayi. Muntu wamuchidiwu amukeña kudi Yehova muloña “Nzambi wakeña muntu wahanaña namuzañalu.”

11. Chumanyi chatusañumunaña kumwinka Yehova chawana chetu chachiwahi?

¹¹ Chamuchiyedi, twahanaña maheta etu kulonda tumusakilili Yehova muloña wankisu jajivulu jatukiswilañayi. Shinshikenu Lushimbi lwamwinkeliwu Mosi lwatela kutukwasha kudishinshika chiwahi munyichima yetu. (Tañenu Kuhituluka 16:16, 17.) Hampinji yayileñawu kuyawija yisatu yahachaaka, kaIsarela weyala wejima wateleleli kuhana chawana ‘mwomwashikila kukooleka kwamukoolekesheliyi Yehova.’ Dichi, henohu kanda yayi kuchawija, iyala wudi wejima wateleli kuchinda nkisu jindi nakushinshika mumuchima windi kulonda yafuukuli chawana chatela kuhanayi. Chochimu, neyi tutoñojoka njila jajivulu jinatukiswiliyi Yehova, twazañalala nawa twafwilaña kumwinka yawaana yetu yayiwahi. Yawaana yetu yakufuma hamuchima yabombelamu maheta etu, yamwekeshaña nawu twamusakililaña Yehova hankisu jatukiswilañayi.—2 Kor. 8:12-15.

12, 13. Indi yawaana yakudikeñela yitwahanaña yamwekeshaña ñahi nawu twamukeña Mwanta, nawa twahanaña ñahi hamuntu-hamuntu?

¹² Chamuchisatu, twamwekeshaña netu twamukeña Mwanta Yesu Kristu kuhitila muyawaana yitwahanaña chakufuma hamuchima. Munjilanyi? Shinshikenu Yesu chayilejeliyi atumbanji twindi hawufuku wakukumishaku kwikala hamaseki. (Tañenu Yowanu 14:23.) Yesu wahosheli nindi, “Muntu wankeña wukuhemba mazu ami.” ‘Mumazu’ aYesu mwekala nilushimbi lwindi lwakushimwina nsañu yayiwahi yaWanta mumatuña ejima. (Mat. 24:14; 28:19, 20) Twovwahilaña awa “mazu” kuhitila mukuzata hakumina ñovu jetu, kuzatisha mpinji yetu nimaheta etu kulonda tutwali hambidi mudimu wakushimwina Wanta. Dikwila nawu twamwekeshaña netu twamukeña Mwanta wawuMesiya.

¹³ Eñañi, hakwikala antu ashinshika akayuulañawu kudi Wanta, twamwekeshaña netu tunakukeña kukwasha Wanta kuhitila mukuhana mali namuchima wetu wejima. Twelaña ñahi mwenimu? Muntu himuntu watela kufukula chakuhana. Muntu wudi wejima wahanaña hakumina ñovu jindi. Hela chochu, akwetu akwakwitiya amavulu, aheta wanyi. (Mat. 19:23, 24; Yak. 2:5) Ilaña amanakwetu wenawa atela kwiluka nawu Yehova niMwanindi alemesha yawaana yanyanya yahanañawu namuchima wumu.—Maku 12:41-44.

Mali Ayitambwilaña Ñahi?

14. Hayaaka yayivulu, aYinsahu jaYehova elileñadi hakuhana nyikanda?

¹⁴ Hayaaka yayivulu, aYinsahu jaYehova alejeleña antu nawu hakwila ayinki nyikanda yashindamena haBayibolu chiña afweta mali. Ayilejeleña kuhana mali antesha hohu kulonda niantu abula kuheta atambuleña nyikanda. Hela chochu, neyi mwiniitala namwekeshi mpwila ilaña wudana chawana, akwakushimwina aWanta amwinkeleña mukanda. Afwilileña kuhana nyikanda kudi antu akeñeleña kutaña nakuhetelamu.

15, 16. (a) Izanvu Dalombolaña datachikili kuhimpa ñahi njila yakuhaninamu nyikanda yetu mu 1990? (b) Indi yawaana yakufuma hamuchima ayihanaña ñahi? (Talenu cheñi chikasha chakwila nawu “Indi Yawaana Yitwahanaña Yayaña Kudihi?”)

¹⁵ Mu 1990, Izanvu Dalombolaña datachikili kuhimpa njila yakuhaninamu nyikanda yetu. Muchochina chaaka muUnited States, nyikanda yetu yejima atachikili kuyihana chakadi kuyileja antu nawu afweti mali. Yipompelu yejima mudina ituña ayitemesheleli nyikanda nakuyileja nawu: “Magazini ninyikanda yejima akuyinkaña akwakushimwina niantu akweti mpwila chakadi kuyileja nawu chiña afweti mali hakwila atambuli. . . . Muntu wejima wunakukeña kuhana mali akukwasha mudimu wetu wakushimwina watela kwila mwenimu, ilaña nateli kutambwila mukanda chili nahani chawaana hela nehi.” Iyi ntanjikilu yamwekesheli nawu nyidimu yitwazataña mukwitiya kwetu yekala yakudikeñela nawa yamwekesheli nawu hitwekala ‘akwakulandisha izu daNzambiku.’ (2 Kor. 2:17) Mukuhita kwampinji, nyitayi yamukaayi kejima ayilejeli kuhana nyikanda chakubula kufwetesha.

¹⁶ Yawaana ayihanaña ñahi? Mumatala aWanta awaYinsahu jaYehova mwekala tuyikasha twakushamu yawaana. Antu anateli kuzatisha iyi yikasha hela kutemeshela mali kunyitayi yawaYinsahu jaYehova yelukewa munshimbi. Chaaka nichaaka, muKaposhi Kakutalila mwekalaña chibaaba chashimunaña njila jamboka jakuhaninamu yawaana.

Mali Ayizatishaña Ñahi?

17-19. Lumbululenu chazatishañawu mali ahanañawu (a) kumudimu wamukaayi kejima, (b) Kutuña Matala aWanta mukaayi kejima (c) nimuchipompelu.

¹⁷ Mudimu wamukaayi kejima. Mali ayizatishaña kukwasha mudimu wakushimwina wamukaayi kejima. Ayizatishaña cheñi hakusoneka nikuhana nyikanda mukaayi kejima, kutuña nikuwahisha tusanji twanyitayi nawa ayizatishaña nikumashikola amakwawu awakwaKristu. Kubombelahu, awa mali ayizatishaña hakwakamena amishonali, ankoñi añinza niapayiniya adimena. Yawaana yitwahanaña ayizatishaña cheñi kukwasha akwetu akwakwitiya adi mukukala.d

¹⁸ Kutuña Matala aWanta mukaayi kejima. Mali ayizatishaña kutuña nikuwahisha Itala daWanta. Neyi yawaana anayitambwili, yawaana yikwawu anateli kuyizatisha kukwasha yipompelu yikwawu yawaana.e

¹⁹ Mali akuzatisha muchipompelu. Mali ayizatishaña kulanda yuma yakeñekaña kuwahisha nachu Itala daWanta. Aeluda anateli kufuukula nawu mali amakwawu ayitemeshi kukasanji kamutayi kulonda mudimu wakushimwina wuyi hambidi. Neyi afuukula mwenimu, aeluda alejaña chipompelu iyi nsañu kulonda chiteji. Neyi chipompelu chineteji, awa mali ayitemeshaña. Kakweji nikakweji, manakwetu watalaña mali achipompelu waloñeshaña chileji nawa achitañaña kuchipompelu.

20. Munateli kumuhameka ñahi Yehova “nayawaana Yenu”?

²⁰ Neyi tushinshika yuma yejima yakeñekaña hakuzata mudimu wakushimwina nsañu yaWanta nikwilisha atumbanji, chatusañumunaña ‘kumulemesha Yehova nayuma yetu yalema.’ (Yish. 3:9, 10) Hayuma yetu yalema hekala ñovu, yitoñojoka yetu niwuswa wetu wutukweti wakumuhameka Nzambi. Mwamweni, twakeñekaña kuzatisha yumiyi mumudimu waWanta. Anukenu cheñi nenu nimaheta etu ekala hakachi kayuma yetu yalema. Dichi wejima wetu tutoñojokeña chiwahi munyichima yetu kulonda tuhaneña neyi tunatweshi. Yawaana yitwahanaña yamwekeshaña nawu twalemeshaña Yehova nawa twakwashaña Wanta wawuMesiya.