Mwana Akaniniwu

AYosefu naMariya anashali muBetelemi chatela afunti kuNazareta. Yesu chinashikijiyi mafuku 8, anamwalamishi, kwesekeja naNshimbi jaNzambi jayinkeliyi aIsarela. (ALevi 12:2, 3) Cheñi hichaaku chalondeleleñawu chakutuumba mwana weyala ijina hanodu ifuku. Anamutuumbi mwanawu nawu Yesu, neyi chayilejeliwu kudi kañelu Gabireli.

Munahiti dehi kakweji kamu nakubadikahu, nawa Yesu nashikiji dehi mafuku 40. Ichi anvwali jindi anakumutwala kudihi? Kutembeli muYerusalema, hadi makilomita antesha kufuma kunakushakamawu. Nshimbi jahosha nawu neyi munahiti dehi mafuku 40 kufuma hanavwaliwu mwana weyala, mama yindi watela kuhana mulambu wakuditookesha hatembeli.—ALevi 12:4-8.

Dichineliyi Mariya. Naleti mulambu watuda twanyanya tuyedi. Chumichi chinakutuleja chidi chihandilu chaYosefu naMariya. Kwesekeja naNshimbi, atela kulambula mwana kamukoku wachizamba nikada. Ilaña neyi mama yawantu wukukañanya kuhana mwana kamukoku, watela kuhana tuteela tuyedi hela anyana katupompa ayedi. Mariya niyena dichidiyi nawa ditunalambuliyi.

Kutembeli kunayiwu, kashinakaji weyala nenzi kudi aYosefu naMariya. Ijina dindi diyi Simiyoni. Nzambi namwekeshi kudi yena nindi, henohu kanda afwi wukumumona Kristu, hela Mesiya akanawu kudi Yehova. Hanidi ifuku Simiyoni anamulomboli kutembeli kudi spiritu yajila, kunayiwaniyi aYosefu naMariya hamu namukeki wawu weyala. Simiyoni namukwati iwu mukeki mumakasa indi.

Iku namukwati Yesu mumakasa, namusakilili Nzambi nindi: “Ichi eyi Mwanta Wabadika wunakumwiteja nduñu yeyi ayi mukuwunda neyi chiwahosheli, muloña mesu ami anamoni njila yeyi yawamwinu yiwunaloñeshi dehi nawa yinamoniwu antu ejima, chejeji chakufumisha nachu chuma chakañeshaña mesu awantu akunyuza kumona nawa hikulema kwawantu jeyi aIsarela.”—Luka 2:29-32.

AYosefu naMariya anahayami hakutiya awa mazu. Simiyoni nayikiswili nawa namuleji Mariya nindi mwanindi ‘anamutondi nawa muloña wayena amakwawu muIsarela akadimbuka, amakwawu akanyamuka’ nawa chineñi, chidi neyi mpoku yakabali yatwa, chakamutapa nzwa-a.—Luka 2:34.

Kudi muntu mukwawu wudihu hanidi ifuku. Hikaprofwetu wamumbanda Ana, wudi nayaaka 84. Kafwampi, hajiñaña kwinza kutembeliku. Hayoyeniyi mpinji, nenzi kudi Yosefu, Mariya nimukeki Yesu. Ana natachiki kumusakilila Nzambi nikuhosha hadi Yesu kudi antu ejima akutiyilila.

Fwikijenu owu muzañalu wunatiyiwu aYosefu naMariya hakumona yuma yinamwekani hatembeli! Mwamweni, yuma yejima iyi yinamwekeshi nawu mwanawu diyi Owu Akaniniwu kudi Nzambi.