Yesu Napapatishewi

Chimunahiti tukweji 6 kufuma hatachikili Yowanu mpapatishi kushimwina, Yesu wudi nayaaka kwakwihi na 30 nenzi kudi yena kuKaloña Yodani. Nakwiladi? Bayi neyi Yesu nenzi hohu nakumutala neyi ibwambu dindiku. Indi kwiji nakutala chinakwenda mudimu waYowanuku. Ilaña Yesu nenzi kudi Yowanu nindi amupapatishi.

Dichi, Yowanu nakaani nindi: “Yeyi watela kumpapatisha ami, hanu eyi wunenzi kudi ami?” (Matewu 3:14) Yowanu weluka nindi Yesu hiMwana kaNzambi walema. Neyi chimunakwanuka hachidiñayi mwivumu damama yindi, Yowanu wakilokeli namuzañalu henjiliyi Mariya iku wudi nevumu daYesu nakuhempula mama yaYowanu Elizabeta. Chakadi nikujina, mukuhita kwampinji Yowanu amulejeli ichi chuma kudi mama yindi. Nawa watela welukili nsañu yabidikiliyi kañelu kutalisha hakuvwalika kwaYesu niyahosheli añelu amwekeni kudi atubiña wufuku wavwalikiliyi Yesu.

Yowanu neluki nindi nakupapatisha hohu antu anabalumuki munyichima nakuleka nshidi jawu. Ilaña Yesu wudana nshidi. Hela chakwila Yowanu nakaani, Yesu namukanjikiji nindi: “Bayi wunkañeshaku, muloña dichuma chitwatela kwila kulonda twili yuma yejima yaloña.”—Matewu 3:15.

Muloñadi chichinateleli kumupapatisha Yesu? Yesu hiyanakumupapatisha kulonda amwekeshi nindi nabalumuki nakuleka nshidiku. Chipapatishu chindi chinakumwekesha nawu nakudihana Yomweni kwila nkeñelu yaTata yindi. (AHeberu 10:5-7) Yesu wadiña mukakusoña, ilaña ichi mpinji yindi yinashiki yakutachika kuzata mudimu wamutemesheleliwu hanu heseki kudi Tata yindi wamwiwulu. Munakukuhwelela nenu kudi chuma chakuhayamisha chinakutoñojokayi Yowanu nindi chikumwekana neyi namupapatishi Yesu?

Dichi, kuhiñahu Yowanu nashimuni nindi: “Owu wantemesheli nindi nipapatisheña mumenji wanlejeli nindi: ‘Yowu iwakamona spiritu yinakwinza nakuwila hadi yena, yenowu diyi wakapapatishaña naspiritu yajila.’” (Yowanu 1:33) Dichi Yowanu nakukuhwelela spiritu yajila kwinza hadi muntu anakupapatishayi. Kwesekeja nachumichi, Yesu chinafumiyi mumenji, Yowanu hakuhayamaku hakumona “spiritu yaNzambi yamwekeneña neyi kapompa yenjili nakuwila hadi yena [Yesu].”—Matewu 3:16.

Kunamwekani cheñi chuma chikwawu hachipapatishu chaYesu. ‘Mawulu anamwenzulukili.’ Chumichi chinatalishi mudihi? Hadaha chinatalishi mukwila nawu hachipapatishu chaYesu, nanuki chadiñayi mwiwulu henohu kanda enzi nakwikala muntu. Dichi Yesu nanuki chihandilu chindi neyi Mwana kaYehova wakuspiritu, kushilahu nichalala chamudizishiliwu kudi Nzambi mwiwulu henohu kanda enzi heseki.

Kubombelahu, hanakumupapatishawu Yesu, izu dinafumi mwiwulu nawu: “Iwu diyi Mwanami, inakeña, inatiyaña kuwaha.” (Matewu 3:17) Izu danyi denidi? Idi Izu daYesu wanyi; yena wudi naYowanu. Hiizu daNzambi. Chalala, Yesu hiMwana kaNzambi. Yena yomweni hiNzambiku.

Chalema kwiluka nawu Yesu himwana kaNzambi, neyi chadiñayi Adama hakusambila. Kambanji Luka, hanyima yakulumbulula chipapatishu chaYesu nasoneki nindi: “Yesu chatachikiliyi mudimu windi, wadiña nayaaka 30, wadiña mwana kaYosefu neyi chamwilukiliwu antu, Yosefu, mwana kaHeli, . . . mwana kaDavidi, . . . mwana kaAbarahama, . . . mwana kaNowa, . . . mwana kaAdama, mwana kaNzambi.”—Luka 3:23-38.

Neyi chochadiñayi Adama muntu “mwana kaNzambi,” niYesu niyena dichadiñayi. Hachipapatishu chindi, Yesu nakwati wubwambu wawuha naNzambi, nakwikala Mwana kaNzambi wakuspiritu. Dichi, Yesu nateleli kutañisha nsañu yachalala chaWanta nikuyileja antu njila yakuwumi. Yesu natachiki mudimu wukamushikija kukumujaha kulonda wumi windi wakekali mulambu wanshidi jawantu.