Atumbanji Awana Akwikala Ayibinda Awantu

Hanyima yakwila antu amuNazareta akeñi kumujaha, Yesu nayi kumusumba waKaperinamu, kwakwihi naKaluñalwiji kaÑaliliya, katenañawu cheñi nawu “chikumu chejiya daGenesareta.” (Luka 5:1) Chumichi chinashikiji wuprofwetu wamumukanda waIsaya wakwila nawu, antu ashakamaña muÑaliliya akamona chejeji cheneni.—Isaya 9:1, 2.

Eñañi, kunu kuÑaliliya, Yesu natwalekihu kushimuna nindi: “Wanta wamumawulu wunaswini dehi kwakwihi.” (Matewu 4:17) Yesu nawani atumbanji twindi awana. Ayiliyi nawu hakusambila, ilaña chafuntawu kuYudeya, atachika mudimu wawu wakukwata inshi. (Yowanu 1:35-42) Hela chochu, iyi himpinji yatela kwikalawu naYesu kulonda ayidizishi chatela kutwalekahu kuzata mudimu wakushimwina neyi nayi dehi.

Yesu chinakwendayi kuchikumu chakaluñalwiji namoni Shimona Petulu, manakwindi Anderi niakwawu mwazatilañawu anakuchima tuleñi. Yesu nayi kwadiwu, nakandami muwatu waPetulu nawa namuleji nindi afumi kuchikumu. Chinaswiniwu chanti hahalehi, Yesu nashakami nakutañisha mazaza anapompi kuchikumu nsañu yaWanta.

Kuhiñahu, Yesu namuleji Petulu nindi: “Twalaku watu kwakunama nawa mulalumwinihu tuleñi twenu kulonda mukwati inshi.” Petulu namwakuli nindi: “Ntañishi, tunakabakani wufuku wejima nawa hitunakwatihu inshiku, ilaña chineli wunanleji, nukulalumwinahu tuleñi.”—Luka 5:4, 5.

Analalumwinihu tuleñi nawa anakwati inshi jajivulu chakwila tuleñi tunatachiki nikutabuka! Dichi swayi-swayi, awa amayala analeji akwawu adi muwatu wudi kwakwihi kwinza kulonda ayikwashiku. Neyi mukulabula kwadisu mawatu ejima anenzali naanshi jajivulu chakwila matu anatachiki kujimina. Petulu chinamoniyi chumichi nadibuki kumesu aYesu nakuhosha nindi: “Mwanta, fumaku kudi ami, muloña ami nidi mukanshidi.” Yesu nakuli nindi: “Lekaku kutiya woma. Kufuma lelu wukukwataña antu amomi.”—Luka 5:8, 10.

Yesu nayileji aPetulu naAnderi nindi: “Nlondelenu, nawa nukuyibalumuna mwiikali ayibinda awantu.” (Matewu 4:19) Natambikiliku cheñi niayibinda anshi ayedi, aYakoba naYowanu anyana kaZebedewu. Niwena anashikeni dakunyamuka chakadi kushintajala. Dichi awa awana analeki mudimu wawu wakukwata inshi nawa anekali atumbanji twaYesu ampinji yejima.