Namutiyili Wushona Muntu Wakata Mbumba Nawa Namuuki

Yesu niatumbanji twindi chiyanakuya nakushimwinawu “mwahita Ñaliliya yejima . . . mumasinagogi,” nsañu yayuma yayiwahi yineliyi yinatiyakani kwejima. (Maku 1:39) Nyidimu yindi yinatiyakani nikumusumba kudi iyala wakata mbumba. Ndotolu Luka namulumbululi nindi, “wadiña nambumba.” (Luka 5:12) Ichi chikatu chafwana neyi chinakuswejelaku, chaketolaña niyiidi yamujimba.

Dichi iwu mukambumba nakabakani nankashi nawa hiyanamwiteji kushakama kwakwihi nawantuku. Watela kubidikaña nindi, “Majilu, majilu!” neyi antu adi mukamwihi kulonda abuli kuyisambwisha iwu musoñu wafwana. (ALevi 13:45, 46) Chumanyi chineliyi iwu mukambumba? Namuwani Yesu nawa nadibuki chamesu indi hamaseki nakulomba nindi: “Mwanta, neyi wunakeñi, ntookeshi.”—Matewu 8:2.

Iwu iyala namukuhweleli chikupu Yesu! Nawa chikatu chindi chinakumuneñesha! Yesu wukwila ñahi? Chumanyi chimwadi kwila neyi mwadiña kwoku? Yesu namutiyili wushona, dichi nololi chikasa chindi nakumukwata. Yesu nahoshi nindi: “Nakeñi! Tookaku.” (Matewu 8:3) Hohenohu mbumba yinamumani, hela chakwila antu amakwawu chinayikalili kumukuhwelela.

Munateli kutiya ñahi hakwikala namwanta wukweti wushona niñovu neyi Yesu? Njila mwamukililiyi Yesu mukambumba yamwekeshaña nawu neyi Yesu nekali Mwanta heseki dejima, iwu wuprofwetu wukashikijewa: “Antu akehelamu niatuzweñi wakayitiyila wushona, nawa wakaamwina mawumi awatuzweñi.” (Masamu 72:13) Eñañi, Yesu wakela yuma yejima yafwilaña muchima windi kukwasha ejima anakuyanda.

Anukenu nenu nihampinji yadiñayi Yesu kanda amuuki mukambumba, mudimu wakushimwina wazatileñayi watiyishileña antu kuwaha. Ichi antu akutiya chuma chachiwahi chineliyi. Hela chochu, Yesu hanakukeña nindi antu amukuhweleli hamuloña wakutiya hohu nsañu yinayilejiwuku. Neluki wuprofwetu wahosha nawu “hakatiyakesha izu dindi mumukwakwaku,” dikwila nawu munjila yayiwahi. (Isaya 42:1, 2) Dichi, Yesu namuleji nindi: “Kulejaku muntu nehi, ilaña yaña wakadimwekeshi kudi kapristu nawa wulambuli mulambu wayilejeliwu kudi Mosi kulonda wakekali wunsahu kudi wena.”—Matewu 8:4.

Hela chochu, neyi chimunakutoñojoka, iwu iyala nazañalali chikupu nachinamuukiwu hakutwesha kumwenahu nayuma yinamwekaniku. Yena nayi nawa natandishi nsañu kwejima. Chumichi chinayileteshi antu kwikala nampwila yakukeña kwiluka chuma chinamwekani. Yesu naleki kuya mumusumba mudi antu amavulu, hadi kampinji kantesha nashakami kwakankawindi. Hela chochu, antu anakufuma kwejima, anakwinza nakuyidizisha nikuyuuka.