Yesu Natondi Apostolu 12

Munahiti dehi chaaka chimu nachikunku kufuma tuhu hamuteneneniwu Yesu kudi Yowanu Mpapatishi nindi Mukoku waNzambi. Chinatachikiyi Yesu mudimu wakushimwina kudi antu amavulu, amayala adizoza anekali atumbanji twindi, chidi neyi Anderi, Shimona Petulu, Yowanu, hadaha Yakoba (mana kwaYowanu), Fwilipu, niBatolomewu (atenañawu cheñi nawu Nataneli). Mukuhita kwampinji, amakwawu anatachiki kumulondela Kristu.—Yowanu 1:45-47.

Ichi Yesu nadiloñeshi kutonda apostolu indi. Awa akwikala amabwambu jindi chikupu nawa wakuyidizisha. Henohu kanda yayitondi, Yesu nayi kumpidi, hadaha yidi kwakwihi naKaluñalwiji kaÑaliliya hakamwihi naKaperinamu. Nachishi wufuku wejima nakulomba, hadaha nakulomba maana ninkisu yaNzambi. Ifuku dinalondelihu natambiki atumbanji twindi nawa natondi atumbanji twindi 12 anekali apostolu.

Yesu natondi atumbanji 6 itwashimuna hakusambila, kushilahu Matewu, atambikiliyi Yesu mukasanji kanyisonku. Amakwawu 5 anatondiyi adi Yudasi (atenañawu cheñi nawu Tadewu nawa “mwana kaYakoba”), Shimona mwini Kenani, Tomasi, Yakoba mwana kaAlafwewu niYudasi Isakaroti.—Matewu 10:2-4; Luka 6:16.

Kushika tuhu nihayinu mpinji, Yesu nendi nanawa 12 nawa nayiluki chiwahi. Amavulu hakachi kawu hiyantaña jindi. Amanakwa muntu aYakoba naYowanu chakadi nikujina hiyasonyi jindi. Nawa neyi chatoñojokañawu antu amakwawu nawu, Alafwewu wadiña manakwa Yosefu, tata yaYesu wakuwanamu dikwila nawu Yakoba wadiña musonyi aYesu.

Yesu kwila ajimbala majina awapostolu indi nehi. Ilaña enu munateli kuyanuka? Chuma chikuyikwasha kwanuka chidi chakwila nawu kudi aShimona ayedi, aYakoba ayedi niaYudasi ayedi. Shimona (Petulu) wukweti manakwindi Anderi nawa Yakoba (mwana kaZebedewu) wukweti manakwindi Yowanu. Ichi dichuma chinateli kuyikwasha kwanuka majina awapostolu 8. Awa amakwawu awana munabombeli mukakutambula nyisonku (Matewu), wenjili nakujinooka (Tomasi), atambikiliwu mwishina damutondu (Nataneli), nibwambu daNataneli (Fwilipu).

Apostolu 11 akuÑaliliya, kumukala waYesu. Nataneli wakuKana. Fwilipu, Petulu niAnderi afuma kuBeteseda. Chimwahitili mpinji, Petulu niAnderi abukilili kuKaperinamu, hadaha kwashakamineñayi Matewu. Yakoba niYowanu niwena ashakamineña hela kwakwihi naKaperinamu nawa akwatileña inshi. Yudasi Isakaroti, wenjili nakumufukejela Yesu, chinamwekani neyi yena hohu diyi kapostolu wafumini kuYudeya.