Yesu Namweneshi Mpepela Yasweja Hakaluñalwiji

Yesu nazeyi, hanyima yakuzata nankashi hanidi ifuku. Chikuneli melela naleji atumbanji twindi nindi: “Tuzambukilenu kuchikumu chakwishinadi,” kwiluña daKaperinamu.—Maku 4:35.

Kwishinadi kumusela wachikumu chaKaluñalwiji kaÑaliliya mwiluña dawaGerasa. Nawa idi iluña aditenaña cheñi nawu Dekapoli. Nyisumba yaDekapoli mwekala tushidikilu twawaGiriki, hela chakwila nimwena mwashakamaña aYudeya amavulu.

Antu anamumoni Yesu chinakufumayi muKaperinamu. Dichi mawatu amakwawu anatachiki kuhita haKaluñalwiji. (Maku 4:36) Kafwampi, hahalehi wanyi. Kaluñalwiji kaÑaliliya kadi nejiya deneni didi namenji awunda, nawa muwulehi kaleha kwakwihi namakilomita 21 nawa muwihi makilomita 12. Ilaña kakunama.

Hela chakwila Yesu himuntu wawanina, nazeyi chikupu nanyidimu yinazateñayi. Dichi chinakandamiwu muwatu, nakaami kunyima yawatu, nashi mutu windi hakushatila, nakukupukila mutulu.

Apostolu amavulu eluka kuvuwa watu, ilaña chinapeli wanyi haniyi mpinji. Kunidi iluña kwekala jimpidi, nawa haKaluñalwiji kaÑaliliya hekalaña mpepela yitaata. Kakavulu, mpepela yituuta yafumaña kujimpidi yenzaña nakubulakana nampepela yidi haKaluñalwiji yitaata, nakukojeja mpepela yasweja hakaluñalwiji. Ichi dichuma chinamwekani. Hanashimbuli wanyi mankanda anatachiki kweta kuwatu. Watu wunatachiki “kwinzala namenji nawa wunakukeña kujiya.” (Luka 8:23) Hela chochu, Yesu wuchidi wakaama!

Akakuvuwa watu anatachiki kuvuwa nankashi, chineli elukisha nankashi aneseki nañovu kuteñulula watu kulonda atemuki mpepela. Ilaña haniyi mpinji anakañanyi. Chineli anakuchiina nawu akufwa, anamuhindwishi Yesu nawu: “Mwanta, twamwini, keña tufwi!” (Matewu 8:25) Atumbanji anakutiya woma nawu akunwina!

Chinahindukiyi Yesu, nayileji apostolu nindi: “Munakutiyiladi woma, enu mukweti chikuhwelelu chantesha?” (Matewu 8:26) Kuhiñahu Yesu naleji mpepela nikaluñalwiji nindi: “Mwena! Wundaku nzo-o!” (Maku 4:39) Mpepela yinakukunka yinaleki nawa kaluñalwiji kanawundi nibetete. (Maku naLuka anashimuni chuma chinamwekani, chatachi anashimuni nawu Yesu namweneshi mpepela yeneni muchihayamisha, nawa atumbanji twindi adi nachikuhwelelu chantesha.)

Fwikijenu chumichi chichinayikwashi atumbanji twindi. Anamoni kaluñalwiji kanadiña nampepela yeneni chikupu chikanawundi betete-e! Anatiyi woma chikupu. Anadihuli mulwawu nawu: “Yeniwu hinyi? Anakumwovwahila nikudi mpepela nikaluñalwiji.” Nawa anazambukili kwishinadi dakaluñalwiji chakadi kumona kukala. (Maku 4:41–5:1) Hadaha maatu amakwawu adiña hakaluñalwiji afunta kuchikumu chakumujika.

Chumichi chinakutukwasha kwiluka netu Mwana kaNzambi wukweti ñovu hampepela! Chikela natachiki dehi kuyuula iseki muchiyuulu chaWanta windi, antu ejima akekala hamaseki akekala akiñewa, muloña kwakela wanyi chuma chakuyitisha woma!