KAPETULU 47
Kansi Wamumbanda Nasañuki!
MATEWU 9:18, 23-26 MAKU 5:22-24, 35-43 LUKA 8:40-42, 49-56
YESU NASAÑULI MWANA KAJAYIRUSA
Jayirusa namoni nindi mumbanda wadiña nakupweka mashi amuuka kudi Yesu. Eñañi, Yesu nateli kumukwasha mwanindi hela chakwila nakutoñojoka nindi ‘yinu mpinji mwanindi wamumbanda watela nafwi dehi.’ (Matewu 9:18) Indi kwiji hanateli kumukwasha?
Iku Yesu wuchidi kuhosha namumbanda wunookiyi, amayala anenzi kufuma kwitala daJayirusa nakumuleja nawu: “Mwaneyi wamumbanda nafwi dehi!” Nawa anabombelihu nawu: “Muloñadi chiwukumukabishila Ntañishi?”—Maku 5:35.
Iyi nsañu yinamuzeyeshi chikupu! Iwu iyala, alemeshawu nankashi muchituñilu, yuma yinamukalili. Mwanindi wumu hohu nafwi. Hela chochu, Yesu natiyi chinamulejiwu nawa namukoleshi Jayirusa nindi: “Bayi wakamaku, ikalaku hohu nachikuhwelelu.”—Maku 5:36.
Kuhiñahu Yesu namulondeli Jayirusa kwitala dindi. Chinashikiwu anawani ipumba. Antu anapompi anakudila, anakutwa makumbu nawa anatiyi wushona chikupu. Yesu nayi mukachi nawa nahoshi awa mazu akuhayamisha nindi: “Iwu mwana nafwi wanyi, ilaña nakaami.” (Maku 5:39) Antu chinatiyiwu chumichi, anamusehi Yesu. Aneluki chikupu nawu mwana nafwi. Hela chochu, Yesu wukuzatisha ñovu yamwinkawu kudi Nzambi, kulonda amwekeshi nindi chaswayi kusañula antu neyi chinateli kuyihindwishawu mutulu twatweni.
Yesu nayihañi antu ejima mukapeka kushiyahu hohu Petulu, Yowanu nianvwali jamwana wamumbanda wunafwi. Yesu nasendi awa atanu nawa anayi hanakaami mwana wamumbanda. Chinamukwatiyi kuchikasa, namwili nindi: “‘Talita kumi,’ neyi ayibalumuna, aya mukwila nawu: ‘Eyi kansi wamumbanda, nakuleji nami, “Hindukaku!”’” (Maku 5:41) Hohenohu, nemani nawa natachiki kwenda. Fwikijenu muzañalu wunatiyiyi Jayirusa niñondidi hakumona chumichi! Hakwila amwekeshi nindi mwamweni iwu kansi wamumbanda wamumi, Yesu nayileji nindi amwinki yakuda.
Kunyima, Yesu walejaña antu okañayi nindi bayi alejaku antu yuma yinayililiyiku nawa nihaniyi mpinji nayileji awa anvwali kubula kushimuna. Hela chochu, awa anvwali niantu amakwawu anazañalali chikupu nawa anatandishi nsañu “mudina iluña dejima.” (Matewu 9:26) Komana kwila mulejaku antu neyi mumona ntaña yenu imwakeña anamusañuli nehi? Iwu diyi muntu wamuchiyedi asañwiliwu kudi Yesu asonekawu.