Yesu Nooki Kansi Wamumbanda Niiyala Wajika Matu

Hanyima yakuzuwila Afwarisi anakutandisha tushidikilu twawu, Yesu nawatumbanji twindi anafumiku. Nayi kwiluña damuTira niSidoni kuFwenisiya, kwakulehi chikupu kukabeta kusumbwañesha chimunswa nachidilu.

Yesu nawani itala mwakushakama, ilaña hanakukeña antu eluki nawu wudi kwenikuku. Hela chakwila wudi kweniku, antu aneluki nawu nenzi. Mumbanda kaGiriki wavwalikila kunidi iluña namuwani Yesu nawa nakulemba nindi: “Ntiyili luwi, Mwanta, Mwana kaDavidi. Mwanami wamumbanda nakabakani nankashi nandemoni.”—Matewu 15:22; Maku 7:26.

Chimunahiti mpinji atumbanji twindi anamuleji Yesu nawu: “Muleji ayi, muloña nasweji kutwaabila.” Yesu nakuli nakulumbulula chuma chinaleteshi amudiwuli nindi: “Hiyantemesheli kwinza kudi muntu wudi wejimaku, chiña hohu kudi anyikoku ajimbala amwitala daIsarela.” Ilaña mumbanda naleki wanyi. Nenzi nakufukama kunyendu yaYesu nakulemba nindi: “Mwanta, nkwashi!”—Matewu 15:23-25.

Hadaha nakukeña kweseka chikuhwelelu chindi, Yesu naleti yitoñojoka yaheña kutalisha hadi aYudeya chamoñawu akanyuza: “Chachiwahi wanyi kunona dinkendi dawanyana nakunatila anyana katuwa.” (Matewu 15:26) Hakutena “anyana katuwa,” Yesu namwekeshi nindi nayitiyili wushona antu abula kwikala aYudeya. Chinakumwekanayi hamesu nichinakuhoshayi chinakumwekesha nawu nayitiyili luwi.

Chatela aneñi, iwu mumbanda niyena nahoshi hachaambu chidi hadi aYudeya nanyuza nindi: “Diimu Mwanta, ilaña anyana katuwa niwena adaña nkuuku yaholokaña kumesa yawankaaka jawu.” Yesu namoni yuma yayiwahi yidi mumuchima windi nawa namuleji nindi: “Eyi mumbanda, chikuhwelelu cheyi cheneni; chuma chiwunakukeña chizatiki.” (Matewu 15:27, 28) Nawa dichinazatiki, hela chakwila iwu kansi wamumbanda hadi henahaku! Iwu mumbanda chinafuntiyi kwitala nawani mwanindi nakaami hakadidi nawa nakoli—“ndemoni namufumi.”—Maku 7:30.

Chinafumiyi kuFwenisiya, Yesu niatumbanji twindi anayi kwishinadi daKaloña Yodani. Chinamwekani neyi anazambukili kukaloña Yodani kukabeta kakuchimunswa kaKaluñalwiji kaÑaliliya nakuya mwiluña daDekapoli. Kweniku anayi hampidi, ilaña izaza dinayiwani. Antu analeti ayifwayi, akata, amputamesu niatumama. Anayikamiki kunyendu yaYesu nawa nayuuki. Antu anahayami nawa anamulemeshi Nzambi yaIsarela.

Yesu nashi chikupu muchima hadi iyala wumu njika matu nawa wabulaña kuhosha. Muneluki chinakutiyayi hakwikala mwizaza deneni dawantu. Hadaha Yesu neluki nindi nakutiya woma iwu iyala, dichi namufumishi hezaza nakumutwala hakankawindi. Chinashikiwu, kwankawawu Yesu namwekeshi yuma yinakukeña kwilayi. Namukwati mumatu indi nawa, hanyima yakufwija mazeñi, namukwati kwidimi dindi. Kuhiñahu iku nakutala mwiwulu, Yesu nahoshi mazu aya mukwila nawu “Jikukaku.” Hohenohu matu aniwu iyala anajikuki nawa natachiki kuhosha chiwahi. Yesu hanakukeña antu amavulu eluki chumichiku, nakukeña antu amukuhweleli kushindamena hayuma yikudimwenawu nakutiya.—Maku 7:32-36.

Ñovu yikwetiyi Yesu yakuuka antu yinakuyikwasha antu anakumona, nawa ‘anahayami nankashi.’ Anakuhosha nawu: “Nakoñi yuma yejima chiwahi. Nakukojeja anjika matu kutiya niatumama kuhosha.”—Maku 7:37.