Muloña Wutwatela Kwanakena

Petulu natiyi kufumba kwaYesu kwawantu ayedi chinateli kumanishawu kukala. Hela chochu, chinamwekani neyi Petulu nakukeña kwilukisha mapampa atela kwanakenayi muntu.

Petulu nehuli nindi: “Mwanta, manakwami watela kunvulumuna kapampa kañahi kinatela kumwanakena? Mapampa 7 tahindi?” Akulumpi jansakililu atañishaña nawu muntu atela kumwanakena kapampa kasatu hohu. Dichi Petulu nakutoñojoka nindi wukwila chiwahi nankashi neyi yamwanakena manakwindi “mapampa 7.”—Matewu 18:21.

Hela chochu, iyi yitoñojoka yakuchinda mapampa hiyinesekani nachinakutañishayi Yesuku. Dichi namukwashi Petulu nindi: “Inakukuleja nami, mapampa 7 wanyi, ilaña kushika kumapampa 77.” (Matewu 18:22) Munjila yikwawu, nakuhosha nindi kutwalekahu kumwanakena. Petulu watela kutwalekahu kumwanakena manakwindi chakadi kuchinda.

Kuhiñahu Yesu namuleji Petulu niantu amakwawu chakutalilahu chikuyikwasha kwiluka nawu atela kwanakena. Hichakutalilahu chanduñu wunakañanyi kumwimbujola nkaka yindi wamutiyilili luwi. Mwanta nakukeña amufweti nyikudi kudi anduñu jindi. Nduñu wumu wukweti mukudi wantalenta 10,000 [madenari 60,000,000] anamutambiki. Hakutwesha kufweta iwu mukudiku. Dichi mwanta nahoshi nindi amulandishi nduñu, ñodindi nianyanindi kulonda afweti. Muloña wachumichi, iwu nduñu nenzi nakudibuka kunyendu yankaka yindi nakulemba nindi: “Nyinkiku mpinji, nakakufweta mukudi weyi wejima.”—Matewu 18:26.

Mwanta natiyi luwi niwushona nawa namwanakeni iwu nduñu yindi wukweti mukudi weneni. Mwanta chinamwanakeniyi, yena nayi nakuwana mukwawu nduñu wukweti mukudi windi wamadenari 100. Namukwati mukwawu nduñu nakumukama hanyidiwu, iku nakuhosha nindi: “Nfweti mukudi wami wejima.” Ilaña iwu nduñu nadibuki kunyendu yaniwu mukwawu nduñu kwakongweliyi mukudi nakulemba nindi: “Nyinkiku mpinji, nakakufweta mukudi weyi.” (Matewu 18:28, 29) Hela chochu, iwu nduñu anakeneniwu kudi mwanta hanamwimbujoli nkaka yindiku. Namumbili mukwawu nduñu mukaleya wudi namukudi wantesha nayena sampu nafweti mukudi wejima.

Kuhiñahu Yesu nashimuni nindi anduñu amakwawu anamoni chuma chineliyi nduñu wabula luwi anayi nakumuleja nkaka yawu wunahili, namutambiki iwu nduñu nakuhosha nindi: ‘Eyi nduñu watama, ami nakwanakena mukudi wejima chiwalemba kudi ami. Komana nineyi hiwatela kumutiyila mukwenu nduñu luwi neyi chinakutiyila eyi luwiku?” Hamuloña wachumichi, nkaaka yindi nazuwi nankashi nawa namuhani kudi akakuhemba kaleya sampu nafweti mukudi wejima. Yesu nakunkululi nindi: “Tata yami wekala mwiwulu niyena dichakayilayi neyi enu hamuntu-hamuntu himukwanakenaña manakwenu chakufuma hamuchimaku.”—Matewu 18:32-35.

Tunakudizilaku chikuma chalema kutalisha hakwanakena. Nzambi watwanakena mukudi weneni wanshidi. Kuvulumuna kwejima kukutuvulumunayi manakwetu mukaKristu kukwesekana wanyi namukudi wutukweti. Nawa Yehova hatwanakenaña hohu kamuku, ilaña mapampa kakavulu. Kwila tutwalekahu kumwanakena manakwetu nehi, hela chakwila natuneñeshi? Neyi chatañishiliyi Yesu muMpanji yahaMpidi, Nzambi “[wukutwanakena] nyikudi yetu neyi chitunanakeni adi nanyikudi nanetu.”—Matewu 6:12.