Nakutañisha Iku Nakuya Kuyerusalema

Hadi mpinji yayilehi, nazati nankashi mudimu windi muÑaliliya, munetejiwu nankashi antu kubadika muYudeya. Hampinji yadiñayi muYerusalema nawa hookayi iyala haSabata, “aYudeya atachika kukeñakeña njila yejima yakumujahilamu.”—Yowanu 5:18; 7:1.

Himpinji yanvula yakusambila mu 32 C.E., nawa Chawija chahaTembeli (hela, chaYisolu) chidi mukamwihi. Ichi chawija achanakanaña hadi mafuku 7, halondela nikupompa kweneni kwajila hefuku damu 8. Ichi chawija chekalañaku neyi anamuni dehi yadiminiwu nawa himpinji yakuzañalala nikusakilila.

AmanakwaYesu akuwanamu aYakoba, Shimona, Yosefu niYudasi anamuleji nawu: “Fumaku kunu wuyi kuYudeya.” Yerusalema didi iluña kwenzaña antu ejima mwituña nakudifukula. Hampinji yayawija yisatu yahachaaka antu ahwilaña mumusumba. AmanakwaYesu anakutoñojoka nawu: “Kwosi muntu welaña chuma mukuswamujoka neyi nakukeña nindi amwiluki kudi antuku. Dichi neyi wunakukoña yumiyi, dimwekeshi kukaayi.”—Yowanu 7:3, 4.

Kafwampi, awa amanakwindi awana ‘hiyamukuhweleleli’ nawu Mesiyaku. Ilaña anakukeña antu akapompa kuchawija kumumona nakukoña nyidimu yañovu. Yesu neluki chuma chikufumamu, nayileji nindi: “Kaayi hikanateli kuyihela enuku, ilaña kanhela ami, muloña nashimunaña wunsahu nami nyidimu yaku yatama. Enu kandukenu muyi kuchawija; ami hinukutwesha kuya kunichi chawija hayinu mpinjiku, muloña mpinji yami kanda yishiki chikupu.”—Yowanu 7:5-8.

Chimunahiti mafuku hanyima yakwila amanakwaYesu anayi dehi nezanvu dejima, Yesu niatumbanji twindi anayi mukuswamujoka, chakadi antu kuyimona. Anazatishi njila yamuketu yahita muSamariya, bayi yelukawu antu amavulu, yahita kwakwihi naKaloña Yodaniku. Yesu niatumbanji twindi akukeña kwakukama muSamariya, dichi natemeshi antemesha kulonda aloñesheñahu dehi. Antu munidi iluña anakaani kuyitambwila hela kumumwekeshela Yesu chisambu, muloña Yesu nakuya kuYerusalema kuchawija chawaYudeya. Yakoba naYowanu anahili nawa anamwili nawu: “Mwanta, wunakukeña tutambiki kesi mwiwulu kayijilumuni?” (Luka 9:54) Yesu nayizuwili hakuhosha chuma chamuchidiwu, nawa atwalekihu kuya.

Henohu achidi munjila, nsoneki namwili Yesu nindi: “Ntañishi, nukukulondela kwejima kuwukuya.” Yesu namwakuli nindi: “Anyumbu ekala nameena nawa atuda amuluzwizu ekala nayisakala, hakwila Mwana kamuntu hakweti nihakushachila mutu windiku.” (Matewu 8:19, 20) Nakutalisha mukwila nindi nsoneki wukumona yihuñu yayivulu neyi ekala mukakumulondela Yesu. Nawa chinamwekani neyi iwu nsoneki wadinka wanta chakwila hakutwesha kwiteja ichi chihandiluku. Wejima wetu hamuntu-hamuntu twatela kudihula netu, ‘Komana nateli kwiteja kumulondela Yesu?’

Yesu naleji muntu mukwawu nindi: “Ikalaku mukakunlondela.” Iwu iyala namwakuli nindi: “Mwanta, ñiiteji nisambili kuya nakujiika tata yami.” Yesu neluki chihandilu chaniwu iyala, dichi namuleji nindi: “Lekaku afu ajiiki afu awu, ilaña eyi yaña nakushimwina Wanta waNzambi kwituña dacheñi.” (Luka 9:59, 60) Chakadi nikujina tata yindi kanda afwi. Neyi wafwa, mutenowu mwanindi hadi kwikala hanu nakuhosha naYesuku. Iwu mwana nadiloñeshi wanyi kutwamijaku Wanta waNzambi muchihandilu chindi.

Chinakukunkumukawu munjila nakuya kuYerusalema, iyala mukwawu namuleji Yesu nindi: “Mwanta, nukukulondela, ilaña ñiiteji nisambili kuya nakushiika amwitala dami.” Yesu namwakuli nindi: “Muntu welaña iku nakwati kupulawu hakutala cheñi kuyuma yidi kunyima, hatelela Wanta waNzambiku.”—Luka 9:61, 62.

Ejima anakukeña kwikala atumbanji twaYesu alala atela kusha muchima wawu hamudimu waWanta. Neyi muntu wunakwati kwitemwa hela kupulawu abulaña kutala kumbidi nyihaña yikoloka wanyi. Neyi aleka kupulawu kulonda amoni yuma yidi kunyima, mudimu wukufunta hanyima. Munjila yoyimu, muntu wejima watalaña hanyima muyinu nshakaminu yamakonu, wukusenuka munjila yaya kuwumi wahaya nyaaka.