Lazaru Anamusañuli

Hanyima yakwila Yesu namubulakani Mariya niMata kwakwihi naBetani, anayi kwijamu dachanukishu daLazaru. Hiiyeñu danashinkiwu kuchiisu nelola. Yesu nayileji nindi: “Fumishenuku ilola.” Mata nadakameni muloña neluki wanyi chuma chinakukeña kwilayi Yesu. Nahoshi nindi: “Mwanta, yinu mpinji watela nakununka, muloña munahiti dehi mafuku awana.” Ilaña Yesu namuleji nindi: “Komana nakuleja wanyi nami neyi wukuhwelela wukumona kulema kwaNzambi?”—Yowanu 11:39, 40.

Dichi ilola anadilañumuniku. Kuhiñahu Yesu nafumbuli mesu mwiwulu nakulomba nindi: “Tata, nakusakilili chiwunantiyi. Chalala, neluka nami wantiyaña mpinji yejima; ilaña nahoshi mwenimu muloña wezaza dawantu dinemani hanu kulonda eluki nawu yeyi wantemesheli.” Yesu chinalombiyi hamesu awantu namwekeshi nawu chuma chinakukeña kwilayi nakuchila nañovu yaNzambi. Nkumininaku nabidiki nezu dahewulu nindi: “Lazaru, idikakumu!” Nawa Lazaru nedikimu iku makasa indi ninyendu yindi yakupombeka namahina nawa kumesu indi kwakujika nehina. Yesu nahoshi nindi: “Mukasununenu ayeña.”—Yowanu 11:41-44.

AYudeya amavulu anenzi nakumukundeja Mariya naMata anamoni ichi chihayamisha nawa anamukuhweleli Yesu. Ilaña amakwawu anayi nakuleja aFwarisi chuma chineliyi Yesu. AFwarisi niakulumpi awatupristu anashakami hampuña muchota cheneni chawaYudeya, chaSanihedirini. Idi izanvu mudi nikapristu muneni Kayafwasi. Amakwawu anakwaba nawu: “Tukwila ñahi, muloña iwu muntu nakukoña yihayamisha yayivulu? Neyi tukumuleka eleña mwenimu, ejima akumukuhwelela, nawa aRoma akwinza nakututambula iluña detu nimuza wetu.” (Yowanu 11:47, 48) Hela chakwila anamoni nikutiya nawu Yesu “nakukoña yihayamisha yayivulu,” awa amayala anakutiya kuwaha wanyi nayuma yinakwilayi Nzambi kuhitila mudi yena. Chuma chinakwakamawu wena hiyifulu yikwetiwu niwuswa.

ASadusi chinamoniwu nawu Lazaru anamusañuli chumichi chinayitiyishi kutama muloña akuhwelela wanyi mukusañuka. Kayafwasi, nawa kaSadusi natachiki kuhosha nindi: “Enu himunelukihu chuma chidi chejimaku, nawa munamoni wanyi nenu chikuyiwahila enu neyi muntu wumu afwila antu kubadika muza wejima kukisika.”—Yowanu 11:49, 50; Yilwilu 5:17; 23:8.

Muloña wakwila kaKayafwasi hikapristu muneni, Nzambi namukojeji kuhosha chumichi, neli mwenimu “kwesekeja nayitoñojoka yindi wanyi.” Kayafwasi natalishi mukwila nindi Yesu atela kumujaha kuchiina akenda kudiwula wuswa niñovu yikweti akulumpi jakwitiya awaYudeya. Henohu, mazu awuprofwetu anahoshiyi Kayafwasi anatalishi kukufwa kwindi, Yesu wukuhana ifutu danyiloña bayi dakukuula hohu aYudeyaku, ilaña ejima “anyana kaNzambi apalañenenimu.”—Yowanu 11:51, 52.

Kayafwasi naluwañeshi Sanihedirini yejima kulonda akwati kafuta kakumujaha Yesu. Tahindi Nikodemu membala wamuSanihedirini wamwiluka Yesu wukumuleja itu tufuta? Neyi chelañayi mpinji yejima Yesu nafumi muYerusalema, kulonda abuli kufwa henohu mpinji yaNzambi kanda.