Yesu Namwakuli Nyuuli Wakansi Samaheta

Yesu wuchidi kuhita muPereya nakuya kuYerusalema. Mukwenzi nyuuli samaheta nenzi nakumuwana nawa nadibuki kunyendu yindi. Iwu mukwenzi “hinlomboli wumu wawaYudeya,” hamwaha wakalakalaña neyi nlomboli musinagogi hela membala wamuSanihedirini. Namwihuli nindi: “Ntañishi Muwahi, chumanyi chinatela kwila hakwila nakekali nawumi wahaya nyaaka?”—Luka 8:41; 18:18; 24:20.

Yesu namwakuli nindi: “Muloñadi chiwunanteneni neyi muwahi? Kwosi muntu muwahiku, chiña Nzambi hohu.” Hadaha iwu mukwenzi weyala namuteni nindi “muwahi” muloña diyi nkumbu, yazatishañawu arabi. Hela chakwila Yesu weluka kutañisha, namukwashi iwu iyala kwiluk nindi Nzambi hohu diyi atela kutenawu nawu “muwahi.”

Yesu namuleji nindi: “Dichi neyi wunakukeña kwikala nawumi, twalekakuhu kuhemba nshimbi.” Dichi namwihwili nindi: “Nshimbinyi?” Yesu namuleji nshimbi 5 jamuNshimbi 10 jahosha hakujahañana, hawujila, hakwiya, hakushimuna wunsahu wakutwamba, nihakulemesha anvwali. Kuhiñahu nabombelihu lushimbi lwalwema nindi: “Watela kukeña mukwenu neyi chiwadikeña eyi aweni.”—Matewu 19:17-19.

Iwu iyala nakuli nindi: “Nahembaña yuma yejimiyi; yumanyi yinashaliku cheñi?” (Matewu 19:20) Hadaha nakumona nindi kudi chuma chimu chinakubula kwilayi, chikumuletesha akatambwili wumi wahaya nyaaka. Yesu ‘namukeñi’ chinelukiyi chuma chinakufwilayi. (Maku 10:21) Hela chochu, kudi chuma chikumukañesha iwu mukwenzi.

Iwu iyala wakeñesha nankashi maheta indi, dichi Yesu namuleji nindi: “Kudi chuma chiwunabuli kwila: Yaku wakalandishi yuma yiwukweti winki atuzweñi mali, nawa wukwikala neheta mwiwulu; kufumahu dinu winzi wiikali mukakunlondela.” Eña iwu mukwenzi nateli kuyinka atuzweñi mali indi, anateli kubula kumufuntishila, nawa wukwikala kambanji kaYesu. Chakadi nikujina, Yesu namutiyili wushona, nawa namumoni nanyamuki nakuneña. Chineli wakeña maheta nawa washa muchima ‘hayuma yayivulu’ yidiyi nayu chinamuleteshi kubula kusha kumaheta alema. (Maku 10:21, 22) Yesu nahoshi nindi: “Antu akweti mali chakayikalila kwiñila muWanta waNzambi.”—Luka 18:24.

Atumbanji anahayami chikupu nanawa mazu anahoshiyi nichinahoshiyi Yesu cheñi nindi: “Kafwampi, chaswayi ngameli kuhanuka mudisu dandoñu yakuchimisha kubadika samaheta kwiñila muWanta waNzambi.” Chumichi chinaleteshi atumbanji kwihula nawu: “Komana dinu hinyi anateli kwamwinawu?” Komana muntu kwila apuluka nehi tahindi? Yesu nayishinshiki nawa nayakuli nindi: “Yuma yikubula kutwesheka kudi antu, kudi Nzambi yikutwesheka.”—Luka 18:25-27.

Petulu hakuhosha nindi wena afuukulahu chambukaku naniwu iyala samaheta. Namwihuli nindi: “Talaña! Tunashiyi yuma yejima nakukulondela; dichi yumanyi yitukatambwila?” Yesu nashimuni yuma yikatambwilawu kumbidi nindi: “Inakuyileja chalala nami, hakuleña yuma chachiha, hakashakamayi Mwana kamuntu hetanda dakulema kwindi, enu munanlondeli mwakashakama hamatanda 12 nakusompesha nyichidi 12 yaIsarela.”—Matewu 19:27, 28.

Mwamweni, Yesu nakutena mpinji yakumbidi hamaseki hikwakekala kuleña kwakuha kwayuma yadiñaku mwitempa daEdeni. Petulu niatumbanji amakwawu akayisomwena kuhitila mukuyuula naYesu muParadisa hamaseki, isomu dinabadiki yuma yejima yadihaniniwu!

Hela chochu, bayi neyi awa masomu adi kumbidi nankashiku. Atumbanji twindi anatambwili masomu amakwawu hayoyeniyi mpinji. Yesu nahoshi nindi: “Kwosi muntu wunashiyi itala hela ñodindi hela amanakwindi hela anvwali jindi hela anyanindi kukoola Wanta waNzambi wakabula kutambwila yuma yayivulu nankashi makonu nawa munshakaminu yinakwinza, wumi wahaya nyaakaku.”—Luka 18:29, 30.

Mwamweni, kwejima kukuyawu atumbanji twindi, anateli kudiluñisha wubwambu wawuwahi wekala hakachi kawamanakwetu akakudifukula kubadika wubwambu wamuchisaka. Chawushona, chinamwekani neyi mukwenzi samaheta wukutambwila wanyi nkisu nisomu dakushakama muWanta waNzambi wamwiwulu.

Yesu nabombelihu nindi: “Ilaña amavulu anasambiliku, akekala akukumishaku, nawa anakumishiku, akekala akusambila.” (Matewu 19:30) Chumichi chinatalishi mudihi?

Mukwenzi nyuuli samaheta wudi hakachi kawantu ‘akusambila,’ chineli wudi hakachi kawanlomboli aYudeya. Chineli wovwahilaña nshimbi jaNzambi, weluka yikaninu yayivulu nawa kudi yuma yayivulu yatela kwilayi. Ilaña nakulemeshaku maheta muwumi windi kubadika yuma yejima. Kwambukaku, antu hohu amwituña anamoni chalala chinakutañishayi Yesu ninjila yaya kuwumi. Munjila yikwawu, hiyantu ‘akukumishaku’ ilaña ichi anekali ‘akusambila.’ Atalilaña kushakama mumutanda mwiwulu hamu naYesu nikuyuula muParadisa hamaseki.