Kudi akwetu akwakwitiya:
Neyi chimuneluki,
Bayibolu himukanda wahosha nankashi hadi antu. Amavulu adiña amayala niambanda ashinshika amweneña kukala neyi kutwamonaña. Atiyileña “neyi mutwatiyañetu.” (Yakoba 5:17) Amakwawu azeyeli nayihuñu nikwakama. Amakwawu ayineñesheli chikupu kudi antaña jawu niakwawu akwakwitiya. Amakwawu aditwikileña nyiloña muloña wayiluwa yakoñeluwu.
Komana antu amuchidiwu amushili Yehova chikupu? Inehi. Amavulu adiña neyi ñimbi yamasamu walombeli nindi: “Napwapuki neyi mukoku wajimbala; nkeñakeñi ami kambuñeyi; muloña ami hinavulamenaña muwalejañaku.” (Masamu 119:176) Ninenu nawa dichimwatoñojokaña?
Yehova havulamenaña akwakudifukula indi afumaña mwiyindaku. Ilaña, wayaña nakuyikeñakeña kuzatisha akwawu akwakwitiya. Chakutalilahu, talenu Yehova chamukwashiliyi kambuñindi Yoba, wamweni yihuñu yayivulu, chidi neyi, kujimbesha maheta, kufwisha anyanindi nawa wakatili yikatu yamaneni. Yoba womikili cheñi mahosha ahosheleñawu antu ateleli kumukwasha. Ilaña hamufutaleleli Yehovaku hela chakwila wasempukili mukutoñojoka hakapinji kanti. (Yoba 1:22; 2:10) Indi Yehova wamukwashili ñahi Yoba kwikala cheñi nawubwambu wawuwahi nayena?
Yehova wamukwashili Yoba kuhitila mudi mukwawu mukwakwitiya wejina daElihu. Chelili Yoba yashimuni kukala kwamweniyi, Elihu watiyili nawa watachikili kuhosha. Wahosheli nindidi? Watachikili kumwinka Yoba nyiloña hela kumuleja nindi waluwañesheli hela kumutiyisha nsonyi? Komana Elihu wadimweni neyi wamubadika Yoba? Inehi. Spiritu yaNzambi yamusañumwini Elihu kuhosha nindi: ‘Ami nidi tuhu neyi eyi kumesu aNzambi; ninami anwumbili namaseki.’ Wamukolesheli cheñi Yoba nindi: “Hinukukufwisha mutentuku, hinukukutwika chiteli chalemaku.” (Yoba 33:6, 7) Chatela yabombeli hakukala kwadiñayi naku Yoba, Elihu wamukwashili Yoba munjila yakukeña nikumukolesha.
Mwani mwatela kwiluka nenu ninetu diyi yitoñojoka yitukweti hakusoneka yinu buloshuwa. Chatachi twekalili namuchima wakutiya, nikutoñojoka chiwahi hakukala kwamwenuwu antu amavulu afumini muchalala nimazu ahosheliwu. (Yishimu 18:13) Twatalili muNsona nawa twalombeli hampinji yitwashinshikileña nsona jahosha hadi Yehova chakwashiliyi ambuñindi akunyima hamweniwu kukala kutunakumona. Nkumininaku, twabombeli iyi nsañu yamuNsona nayakutalilahu yawantu amakonu kulonda tusoneki yinu buloshuwa. Dichi mwani tunayilombi netu mutañi chikupu iyi nsañu. Tunayitemesheli mutendi wenzala kukeña.
Izanvu Dalombolaña dawaYinsahu jaYehova