Nateli Kwila Ñahi Neyi Anakunkabisha haShikola?

WADI KWILA ÑAHI?

Fwikijaku chumichi: Lelu, Kawumbu hanakukeña kuya kushikolaku. Hela kumadiki. Hela nakukeña kuleka shikola. Iyi nsañu yatachikili tukweji tusatu tunahitihu helili akwawu akashikola ataandishi nsañu yakutwamba hadi yena. Kuhiñahu amutumbili ijina dakumuseha nachu. Mpinji jikwawu muntu wukwinza nakuholola nyikanda yaKawumbu nakumwekana neyi kwiji weluka wanyi, hela muntu wumu hezanvu wudi kunyima yindi wukumushinjika, ilaña Kawumbu chikubalumukayi nindi yatali wunamushinjiki kutwesha kumwiluka nehi. Haloshi, ichi chaaku chakumutiyisha Kawumbu woma chaswejelaku hatambwilayi meseji yakumutiyisha woma haIntaneti . . .

Neyi yeyi wadiña Kawumbu, wadi kwila ñahi?

SAMBILAKU KUTOÑOJOKAHU!

Bayi neyi wunabuli ñovuku! Kafwampi wunateli kuzuña namukwakukukabisha chakadi kuzatisha makofi. Munjilanyi?

• BAYI WILAHU CHUMAKU. Bayibolu yahosha nawu: “Chisupi washimunaña yejima yidi mumuchima windi, ilaña mukwamaana wadifumbaña nakudimwenesha.” (Yishimu 29:11) Neyi wukudiwunjika chikupu hakapinji kantesha, antu anakukutiyisha woma akuleka.

• BAYI WUFUNTISHA KATAMA NAKATAMAKU. Bayibolu yahosha nawu: “Bayi mwila mwinenu chatama nakatama kanayiliyuku.” (Aroma 12:17) Kukeña kufuntisha katama nakatama kunateli kukojeja yuma kutaminaku hohu.

• BAYI WUDIÑIJA MUKUKALAKU. Bayibolu yahosha nawu: “Muntu wadihoñeshaña mumuchima wamonaña katama, hakubatama.” (Yishimu 22:3) Neyi chinatwesheki, tondolwelaku antu anateli kukuletela kukala nawa tondolwelaku kudibomba hamazanvu hanateli kuwanika antu akukutiyisha woma.

• ESEKAKU KWAKULA MUNJILA YAYIWAHI. Bayibolu yahosha nawu: “Kwakula mukwenu mwamwovu chawundishaña ndombu.” (Yishimu 15:1) Wunateli nikusehaku. Chakutalilahu, neyi mukwakukutiyisha woma yahosha nindi, wunasweji kutoha, wunateli kukanina kumafwiji nakuhosha neyi, “Nakuhweleli natela kufumishaku ma kg amakwawu!”

• FUMAKUHU. Nora wudi nayaaka 19 wahosheli nindi, “Kumwena kwamwekeshaña nawu wunakuli muyitoñojoka nawa wakola kubadika muntu wunakukukabisha. Chamwekeshaña nawu wukweti yilwilu yakudiyuula yabulayi muntu wunakukutiyisha woma.”—2 Timotewu 2:24.

• DIKUHWELELI. Kakavulu akwakutiyisha akwawu woma elukaña antu adimonaña nawu amukunkulwayi nawa amwekanaña nawu anateli wanyi kudihakwila. Kwambukaku, akwakutiyisha woma akwawu anateli kudifuntamu neyi amona nawu wunakuyinka wanyi iluña hakwiñilila.

• LEJAKUKU MUNTU. Ntañishi wumu waleka dehi kutañisha wahosheli nindi: “Nakukolesha muntu wudi wejima anakutiyishawu woma nami watela kushimuna. Diyi njila yayiwahi yakwila, nawa chikukojeja muntu abula kumutiyisha woma.”