LWIHU 7

Nateli Kwila Ñahi Neyi Muntu Nakunkanjikija Kudikaama Nindi?

CHICHALEMENA

Yuma yiwukufuukulahu kutalisha hansañu yakudikaama yikakukwasha kumbidi hela nehi.

WADI KWILA ÑAHI?

Fwikijaku chumichi: Katendi nadiiluki naKadinka hadi tukweji tuyedi hohu, ilaña nakutiya neyi kwiji wamwilukili dehi. Aditemeshelaña mameseji mumpinji-mumpinji, ahoshaña hafoni hadi maora amavulu, nawa elukaña nimazu anakukeña kuhoshayi mukwawu! Ichi dinu Kadinka nakukeña kwila yuma yinabadiki hakuhanjeka hohu.

Hatukweji tuyedi tunahitihu, Kadinka naKatendi akuminaña dakudikwata hohu kumakasa nikudifufwa chantesha. Katendi hanakukeña kwila yuma yikwawu kubadika haniyiku. Ilaña hanakukeña kumuumba Kadinkaku. Kwosi muntu niwumu wamuleñelaña yadimoneña nindi walubanji nawa walema. Wadihosheshaña nindi, ‘Ami naKadinka twadikeña. . . ’

Neyi wunashikilimu dehi kudiiluka neyala hela namumbanda nawa yeyi wadiña Katendi, wadi kwila ñahi?

SAMBILAKU KUTOÑOJOKAHU!

Chakuvwala anakuchizatisha neyi chikolopu — Kudikaama hichawaana chayinkayi Nzambi antu adisumbula hohu. Neyi mudikaama henohu kanda mudisumbuli dikwila nawu munakuzatisha ichi chawaana munjila yatama. Chidi neyi wunanoni ihina dadiwahi dinakwinkiyi muntu nakudizatisha neyi chikolopu

Neyi wukiluka kufuma kumutondu kulonda weseki kutuuka neyi chatuukañayi kajila, wukumona jomisha mbaña. Dichuma chikumwekana neyi wufumpa lushimbi lwakudijilika lwakwila nawu: ‘Lekenu wuvumbi.’—1 Atesalonika 4:3.

Yumanyi yikufumamu neyi wudiwula ilu lushimbi? Bayibolu yahosha nawu: “Muntu welaña wuvumbi wakatishaña mujimba windi yomweni.” (1 Akorinda 6:18) Chumichi chinateli kuzatika ñahi?

Akwakusandujola awana nawu atwansi amavulu elahu dehi wuvumbi amonaña kukala kumu hela kubadikahu kwafumañamu hakachi kaniku kukala kunalondeluhu.

CHINEÑI. Atwansi amavulu elahu dehi wuvumbi ahoshaña nawu aditoñeshaña hanyima yakwila mwenimu.
KUDIJINOKA. Hanyima yakudikaama, wejima wawu atachikaña kujinoka nawu, ‘Iwu muntu wakamahu dehi nanyi cheñi?’
KUDITOÑESHA. Atwansi awambanda amavulu akeña nankashi muntu wakayikiña bayi neyi wakayizatisha hohuku. Nawa atwansi awamayala amavulu hiyavula kukeña kansi wamumbanda wunayitejiku.
Chikuma chacheni chidi chakwila nawu: Neyi witeja kudikaama namuntu henohu kanda wiñili muwulu, wukudisawisha eyi aweni kuhitila mukujimbesha yuma yalema. (Aroma 1:24) Mujimba weyi walema nankashi!

Mwekeshaku neyi wukweti ñovu ‘yakuleka wuvumbi.’ (1 Atesalonika 4:3) Dichi, ifuku dimu neyi wunasumbuli hela wunasumbuki dehi, wakadikaamaña namwinikweyi. Nawa wakadiluñishaña chikupu chakadi kwakama, kuditoñesha nikudijinoka kukala kwafumaña mukudikaama henohu kanda mudisumbuli.—Yishimu 7:22, 23; 1 Akorinda 7:3.

WUNATOÑOJOKI NEYIDI?

Komana muntu wakukeña nankashi nateli kukwiñija mukukala kumujimba hela muyitoñojoka?
Komana muntu wakukeña nankashi nateli kuletesha wubwambu weyi naNzambi wumani?—Aheberu 13:4.