Chihayamisha Chamwekeni haKaluñalwiji Kachinana

Fwaru chatiyiliyi hohu nawu aIsarela anafumi dehi muEjipitu, wahimpili yitoñojoka yindi nanochu chayilekeliyi nindi ayeña. Walejeli amashidika indi nindi: ‘Loñeshenu makalu ami ejima anjita, tuyikumpishenu! Chiña twayuumbaku wanyi.’ Yena hamu niantu jindi atachikili kuyikumpisha aIsarela.

Yehova wayilombweleña antu jindi, namwaana wayilombweleña neevu nawa nawufuku nakesi. Wayitwalili kuKaluñalwiji Kachinana nawa wayilejeli kutuña chilombu.

Kuhiñahu aIsarela amweni Fwaru nimashidika indi anakuyikumpisha. AIsarela ayishintakesheleli kukaluñalwiji kudi amashidika awaEjipitu. Amudililili Mosi nawu: ‘Tunafwi dehi kwetu! Wadi kutuleka kwetu muEjipitu.’ Ilaña Mosi wayilejeli nindi: ‘Bayi mutiya womaku. Hembelelenu kulonda mumoni Yehova chikutwamwinayi.’ Mosi wamukuhweleleli chikupu Yehova, netu?

Yehova wayilejeli aIsarela nindi afumi muchilombu nakuya. Hawowuna wufuku, Yehova wafumishili ivu nakuditwala hakachi haneli aEjipitu iku, aIsarela iku. Kukabadi kawaEjipitu kwadiña mwidima. Ilaña kukabadi kawaIsarela kwadiña chejeji.

Yehova wamulejeli Mosi kwolwela chikasa chindi hakaluñalwiji. Kuhiñahu Yehova wakunkishili mpepela yeneni wufuku wejima. Kaluñalwiji kadaambwili hayedi nawa hakachi hekalili njila. AIsarela amavulu nankashi ahitili heseki dooma hakachi, helili iku mbañu yamenji, iku mbañu yamenji.

Amashidika aFwaru ayilondeleli aIsarela hakachi kakaluñalwiji. Kuhiñahu Yehova wayiluwañesheli awa amashidika. Tufumbu twakumakalu awu twatachikili kuzokoka. Amashidika abidikili nawu: ‘Tufumenu munu! Muloña Yehova nakuyizuñilaku.’

Yehova wamulejeli Mosi nindi: ‘Ololaku chikasa cheyi hakaluñalwiji.’ Hohenohu, mbañu jamenji jayibutili amashidika awaEjipitu. Fwaru niantu jindi ejima afwili. Kwosi niwumu hakachi kawu wapulukiliku.

Kukabadi kakwawu kakaluñalwiji, izaza deneni dawantu damushimekeli Nzambi nakamina nawu: ‘Mwimbilenu Yehova, muloña natuumbakani chikupu. Tuwalu niakakwendelahu nayinatili mukaluñalwiji.’ Hembileñawu, ambanda ahañeneña nikwimba ñoma janyanya. Ejima wawu azañaleli chikupu chelukiliwu nawu ichi anakasunuki dehi.