Chikaninu Chamukaniniwu Yehova

Chelili hanahiti dehi tukweji tuyedi kufuma hedikiliwu muEjipitu, aIsarela ashikili kuMpidi yaSinayi nawa atuñili chilombu. Yehova wamutambikili Mosi, dichi wayili hampidi nawa wamulejeli nindi: ‘Nayamwinini aIsarela. Neyi añovwahila nawa ahemba nshimbi jami, akekala antu jami adimena.’ Mosi wasulukili hampidi nawa wayilejeli aIsarela yuma yejima yahosheliyi Yehova. Chumanyi cheliliwu? Ahosheli nawu: ‘Tukwila mwejima mukutulejayi Yehova.’

Mosi wafuntili hampidi. Hohenohu hampidi Yehova wahosheli nindi: ‘Hefuku damuchisatu nakahosha naneyi. Yisoñamishi antu neyi bayi akenzi haMpidi yaSinayiku.’ Mosi wasulukili nawa wayilejeli aIsarela nindi adiloñeshi kulonda akatiya chakahoshayi Yehova.

Chimwahitili mafuku asatu, aIsarela amweni nzaji niivu diyila hampidi. Atiyili cheñi nikudidima kwasweja nichivumina chanseñu. Kuhiñahu Yehova wenjili hampidi mukesi. AIsarela atiyili woma nankashi chakwila atachikili kuzaala. Mpidi yejima yakankili chikupu nawa yakakumukili wishi. Chivumina chaluseñu chaswejeleleñaku kuvuma. Kuhiñahu Nzambi wahosheli nindi: ‘Yami Yehova. Bayi wudifukula kudi anzambi acheñiku.’

Mosi wayili cheñi hampidi nawa Yehova wamwinkeli nshimbi jakuleja antu chatela kudifukulawu kudi Yena niyilwilu yatela kwikalawu nayu. Mosi wasonekeli iji nshimbi nawa wayitañililiju aIsarela. Ashiikili nawu: ‘Tukwila mwejima mukutulejayi Yehova.’ Amukanini Nzambi. Hanu dinu elili mwakaniniwu?