Yehova Wamutondeli Yoshuwa

Hanyima yakulombola muza waIsarela hadi yaaka yayivulu, Mosi wadiña kwakwihi nakufwa. Yehova wamulejeli nindi: ‘Hiyeyi wukuyiñija aIsarela Mwituña daChikaninuku. Ilaña nukukwiteja wumoni idi ituña.’ Kuhiñahu Mosi wamulejeli Yehova nindi atondi nlomboli wamuha wukulombolaña antu. Yehova wamulejeli Mosi nindi: ‘Yaku kudi Yoshuwa, wumuleji neyi yena diyi wukulombolaña antu.’

Mosi walejeli muza nindi yena keña afwi nawa Yehova namutondi Yoshuwa nindi diyi wukuyilombola nakuyiñija Mwituña daChikaninu. Kuhiñahu, Mosi wamulejeli Yoshuwa nindi: ‘Bayi wutiya womaku. Yehova wukukukwashaña.’ Kufuma hohenohu, Mosi wayili hewulu daMpidi yaNebo, hamulejeleliwu kudi Yehova ituña dakaniniyi kwinka Abarahama, Isaka niYakoba. Mosi wadiña nayaaka 120 hafwiliyi.

Yehova wamulejeli Yoshuwa nindi: ‘Zambukaku Kaloña Yodani, wuyi muKenani. Nukukukwashaña neyi chinamukwashileña Mosi. Wutañeña Nshimbi jami mafuku ejima. Bayi wutiya womaku. Ikalaku wahamuka. Yaña wili mwejima mwinnakuleji.’

Yoshuwa watemesheli akakwendesha ituña ayedi mumusumba waYeriku. Mumpanji yinalondelihu, twakeluka yuma yayivulu yamwekeni muYeriku. Chafuntiliwu, ashimwini nawu iyi diyi mpinji yayiwahi yakwiñila muKenani. Hefuku dalondelelihu, Yoshuwa walejeli muza nindi aloñejeki yuma yawu. Kuhiñahu walejeli atupristu asendeli chimbañu chachitiyañenu kuyañahu dehi kuKaloña Yodani. Kaloña kenzeli. Ilaña atupristu chadatiliwu hohu mumenji, kaloña kalekeli kuhita menji nawa omini! Atupristu ayili nakwimana hakachi kakaloña hooma iku muza wejima waIsarela wunakuzambuka nakuya kwishinadi. Wunakutoñojoka neyi ichi chihayamisha chayanukishili yuma yakoñeliyi Yehova haKaluñalwiji Kachinana?

Nkumininaku, chelili munahiti dehi yaaka yayivulu, aIsarela ashikili Mwituña daChikaninu. Atuñileña matala ninyisumba. Adimineña maha, matempa anyivinyu nianyikaabu. Dadiña ituña dasweja mayeli niwuchi.