Mwanta Watachi waIsarela

Yehova wayinkeli aIsarela ansompeshi ayilombweleña, ilaña akeñeleña kwikala namwanta. Amwilili Samweli nawu: ‘Nyuza yejima yitwadikuma nayu yikweti anyanta. Ninetu tunakukeña mwanta.’ Samweli wamweni nindi chuma chalombeleñawu chatama, dichi wamulombeli Yehova. Yehova wamulejeli nindi: ‘Antu hiyanakukaana eyiku. Yami anakukaanawu. Yileji neyi mwanta akwikala nindi, ilaña owu mwanta wakayilombaña yuma yayivulu.’ Hela chochu, antu ahosheli nawu: ‘Oju nehi. Etu tunakukeña hohu mwanta!’

Yehova wamulejeli Samweli nindi iyala wejina daSawulu diyi wukwikala mwanta watachi. Sawulu chayiliyi nakumutala Samweli kuRama, Samweli wamuwayishili nakwikala mwanta kuhitila mukumuhuñunwina manji hamutu.

Chimwahitili mpinji, Samweli wayipompesheli aIsarela kulonda ayileji mwanta wawu wamuha. Ilaña Sawulu amumweni wanyi. Wuneluki chaletesheli? Waswamini muyiteli. Chamuwaniniwu Sawulu, amuleteli nakumwimika mukachi kawantu. Sawulu wadiña wamulehi kubadika antu ejima nawa wadiña walubanji chikupu. Samweli wahosheli nindi: ‘Talenu muntu anatondiwu kudi Yehova.’ Antu abidikili nawu: “Mwanta ahandi yaaka yayivulu!”

Hakusambila, Mwanta Sawulu wamutiyilileña Samweli nawa wamwovwahilileña Yehova. Nkumininaku, wahimpili. Chakutalilahu, mwanta hateleleli kulambula nyilambuku. Ifuku dimu, Samweli wamulejeli Sawulu nindi amuhembeleli sampu nenzi, ilaña Samweli henjili swayiku. Dichi Sawulu wafuukwilihu kulambula nyilambu yomwenindi. Indi Samweli welili ñahi? Wamulejeli nindi: ‘Chiña wadikaña naYehova wanyi.’ Komana Sawulu wadizilili kuchiluwa chindi?

Kuhiñahu, Sawulu chayiliyi nakuzuña nawaAmaleki, Samweli wamulejeli Sawulu nindi abuli kupulwishahu muntu hela wumu. Ilaña Sawulu wafuukwilihu kubula kumujaha Mwanta Agagi. Yehova wamulejeli Samweli nindi: ‘Sawulu naleki kunlondela, nawa hanakwovwahila mazu amiku.’ Samweli wahilili nankashi nawa wamulejeli Sawulu nindi: ‘Chineli wunaleki kumwovwahila Yehova, wukutonda mwanta wacheñi.’ Samweli chabalumukiliyi nindi ayeña, Sawulu wakwatili kwishina dachakuvwala chaSamweli nawa chatabukili. Kuhiñahu, Samweli wamulejeli Sawulu nindi: ‘Yehova natabuli wanta kufuma kudi eyi.’ Yehova wafuukwilihu kuwuhana kudi muntu wukumukeña nawa wukumwovwahilaña.