Yehova Namukwashi Yehoshafwati

Yehoshafwati, mwanta waYuda, wakisañeni tumeña twaBayali niankishi amwituña. Wakeñeleña antu eluki nshimbi jaYehova. Dichi watemesheli atulamba niaLevi mwahita Yuda yejima nakudizisha antu nshimbi jaYehova.

Nyuza yadiña mukamwihi yachiinineña kulukuka Yuda muloña yelukili nawu Yehova wakwashileña antu jindi. Mwanta Yehoshafwati amuleteleleña niyawaana. Ilaña aMowabi, aAmoni niantu ashakamineña mwiluña daSeyiri enjili nakuzuña naYuda. Yehoshafwati welukili nindi wakeñekeleña wukwashu waYehova. Dichi watambikili amayala ejima, ambanda nianyana kulonda enzi kuYerusalema. Wemeni kumbidi yawu nakulomba nindi: ‘Eyi Yehova, chakadi eyi, hitukutwesha kushindaku. Mwani tuleji chuma chitwatela kwila.’

Yehova waakwili iku kulomba nindi: ‘Bayi mutiya womaku. Nukuyikwasha. Mukumini dakwimana, mwimani hohu nzo-o, kulonda mumoni chinukuyamwina.’ Yehova wayamwinini ñahi?

Hefuku dalondelelihu nantetemena, Yehoshafwati watondeli añimbi nawa wayilejeli nindi atwaminiku hambidi yawamashidika. Endeli kufuma muYerusalema nakuya kwiluña dazuñilileñawu dateneneñawu nawu Tekowa.

Añimbi chamushimekeleñawu Yehova namuzañalu nawa nezu datiyakana, Yehova wayizuñilileñaku antu jindi. Wakojejeli aAmoni nawaMowabi kuluwankana chakwila atachikili kuzuña mulwawu nawa hosi niwumu wapulukili. Ilaña Yehova wayikiñili antu amuYuda, amashidika niatupristu. Antu ejima amumatuña amukamwihi atiyili chuma cheliliyi Yehova, nawa elukili nawu Yehova wuchidi kukwasha antu jindi. Yehova wamwinaña ñahi antu jindi? Wayamwinaña munjila jajivulu. Hakeñaña wukwashu kudi antu hakwila yeli mwenimuku.