Mushidika naKansi waMumbanda

Mwituña daSiriya, mwadiña kansi wamumbanda kaIsarela wadiña kwakulehi namukala wawu. Amashidika awaSiriya amusendeli nakumufumisha kuchisaka chindi nawa wekalili ñamba yañoda Nayamani, mukulumpi wamashidika. Iwu kansi wadifukwileña kudi Yehova, hela chakwila antu ashakamineñayi nawu hiyadifukwileñaku.

Nayamani wakatili musoñu watama wahekowa nawa watiyileña kuyeña mpinji yejima. Iwu kansi wakeñeleña chikupu kumukwasha. Wamulejeli ñoda Nayamani nindi: ‘Neluki muntu wunateli kumuuka nfumweyi. MuIsarela mudi kaprofwetu kaYehova wejina daElisha. Nateli kumuuka nfumweyi.’

Ñoda Nayamani wamulejeli nfumwindi mazu ahosheliyi iwu kansi. Wakeñeleña kwila chuma chidi chejima hakwila akoli, dichi wayili kwitala daElisha muIsarela. Nayamani wakuhweleleli nindi Elisha wukumutambwila neyi muntu walema. Ilaña chatela ahoshi nindi yomweni, Elisha watemesheli kambuñindi kuya nakumwimusha Nayamani nawa wamulejeli nindi: ‘Yaña wuweli mapampa 7 muKaloña Yodani. Kuhiñahu wukukola.’

Nayamani watiyili kutama nankashi. Wahosheli nindi: ‘Nakuhwelela nami iwu kaprofwetu wukuñuuka kuhitila mukutambika hejina daNzambi yindi nikuhitañesha chikasa hamujimba wami. Ilaña, yena nanleji nindi niyi kunaka kaloña kamuIsarela. Tukweti tuloña twatuwahi muSiriya. Kwila niya kunitu tuloña nehi?’ Nayamani wahilili nawa wafumini kwitala daElisha.

Nayamani amukwashili kudi ambuñindi nawu atoñojokihu chiwahi. Amulejeli nawu: ‘Kwila wila chuma chidi chejima kulonda akuuki nehi? Chuma chinakulejiyi nindi wili chapela nankashi. Kwila wilamu hohu nehi?’ Nayamani wayitiyilili. Wayili kuKaloña Yodani nawa wadijimikili mumenji mapampa 7. Hanyima yakudijimika mumenji kapampa kamu 7, Nayamani wafumini mumenji iku nakoli chikupu. Watiyili kuwaha nankashi nawa wafuntili nakumusakilila Elisha. Wahosheli nindi: ‘Ichi dinu neluki nami Yehova diyi Nzambi walala.’ Wunakutoñojoka neyi iwu kansi kaIsarela watiyili ñahi chafuntiliyi Nayamani iku anamuuki?