Yesu Hadiñayi Kansi

AYosefu naMariya ashakamineña muNazareta hamu naYesu nianyanawu amakwawu awamayala niawambanda. Mumudimu wakusoña dimwakwashilileñayi Yosefu chisaka chindi nawa wayidizishileña kulonda amwiluki Yehova niNshimbi jindi. Ichi chisaka chayileña kusinagogi mpinji yejima nakudifukula nikuYerusalema kuChipandakenu hachaaka-hachaaka.

Yesu chadiñayi nayaaka 12, chisaka chindi chendeli lwendu lwalulehi nakuya kuYerusalema neyi chelileñawu mpinji yejima. Mumusumba mwenzeli antu amavulu enjili kuchawija chaChipandakenu. Chamanini chawija, aYosefu naMariya atachikili kufunta kumukala, atoñojokeleña nawu Yesu wadiña hezanvu dawantu afuntileña. Ilaña chamukeñakeñeliwu hadi antaña jawu, hiyamuwaniniku.

Afuntili kuYerusalema nawa amukeñakeñeli mwanawu hadi mafuku asatu. Nkumininaku, ayili kutembeli. Amuwanini Yesu kwenoku, nashakami hakachi kawantañishi, nakuyitiyilila chikupu nikuyihula malwihu amawahi. Antañishi amutiyili Yesu kuwaha chakwila atachikili kumwihula malwihu nawa ahayamini chayakwileñayi. Amweni nawu weluka chikupu Nshimbi jaYehova.

AYosefu naMariya akameneni nankashi. Mariya wahosheli nindi: ‘Eyi mwana, tunakukeñakeñi kwejima! Wadiña kudihi?’ Yesu wahosheli nindi: ‘Komana himweluka nenu natela kwikala kunu kwitala daTata yamiku?’

Yesu wafuntili nawanvwali jindi kumukala wawu kuNazareta. Yosefu wamudizishili Yesu mudimu wakusoña. Wunakutoñojoka neyi Yesu wadiña muntu wamuchidinyi hadiñayi kansi? Chakulileñayi, Yesu watwalekelihu kwikala namaana nawa amutiyileña kuwaha kudi Nzambi niantu.